KUPONA BUUMI BWA BUNAKRISTO
Mbomukonzya Kubelesya Mavidiyo Aajatikizya Ciiyo ca Bbaibbele
Tujisi mavidiyo one aajatikizya ciiyo ca Bbaibbele ngotubelesya mumulimo wamumuunda. Ino imwi aimwi yakapangilwa nzi?
Kavidiyo kakuti Nkaambo Nzi Ncomweelede Kwiiya Bbaibbele?—Kavidiyo Kalamfwu kakapangwa muunzila yakuti bantu kabakonzya kuba aaluyandisisyo lwakwiiya Bbaibbele tacikwe makani anzyobasyoma. Kakulwaizya bantu kuyandaula bwiinguzi bwamibuzyo iibakatazya kapati mubuumi kuzwa mu Bbaibbele alimwi kalapa bwiinguzi bumwi bujanika mulindilyo. Kuyungizya waawo, kalatondezya mbobakonzya kulomba ciiyo ca Bbaibbele.
Kavidiyo kakuti Nkaambo Nzi Ncomweelede Kwiiya Bbaibbele? (kavidiyo kafwaafwi) kalikozyenye akavidiyo kalamfwu pele nkuti buyo kalo nkafwaafwi. Kalagwasya kapati muzilawo muli bantu bajisi bubi.
Kavidiyo kakuti Ino Ciiyo ca Bbaibbele Cicitwa Buti? kakapangwa munzila yakuti kakapa bantu kuba aaluyandisisyo lwakwiiya Bbaibbele alimwi akwiingula mibuzyo kujatikizya bubambe oobu, kubikkilizya ambobakonzya kutalika kwiiya.
Kavidiyo kakuti Mwatambulwa Kuciiyo Canu ca Bbaibbele kakapangilwa kuti kakatondezyegwa kuli basikwiiya. Nokuba kuti kavidiyo aaka kali apeeji yabili mubbuku lyakuti Amupone Kukabe Kutamani!, kalakonzya kutondezyegwa ciindi nomubandika mubroshuwa ya Amupone Kukabe Kutamani! Kunze lyaboobo, kalaamba izili mubbuku alimwi azintu sikwiiya nzyalangila kwiiya.
Nokuba kuti kavidiyo kamwi akamwi kalijisi makanze aankako, tulakonzya kubatumina bantu kufwumbwa buyo kuti kakuyandika kucita oobo. Basikumwaya bakulwaizigwa kwaazyiba alimwi akwaabelesya kabotu ciindi nobali mumulimo wamumuunda.