Amubelesye Peeji Yakusaanguna ya JW.ORG Nomuli Mumulimo Wamumuunda

Peeji yakusaanguna iili awebbusaiti yesu ijisi zibalo alimwi amavidiyo aabambilidwe kukwelelezya bantu balaamyoyo mibotu ibatali Bakamboni ba Jehova. (Mil. 13:48) Ilatondezya mitwe yamakani iili anyuuzi naa zintu bantu nzyobali mukuyeeya alimwi akwaamba.

Ino mbuti mbomukonzya kwiibelesya peeji eeyi nomuli mumulimo wamumuunda?

• Lyoonse mweelede kunoolanga-langa awebbusaiti. Amubone zibalo ziliko atala, alimwi akubona mbomukonzya kugwasya muntu uuyanda kwiiya. (Kutegwa mubone zintu zyakaliko ino-ino, amutyanke aalembedwe kuti “Makani Aayungizyidwe.”) Kuzitobela lyoonse izili awebbusaiti kuyoomugwasya kuba anzila zipya zyakubelesya ciindi nomuli mubukambausi.

• Amubelesye makani aali muzibalo alimwi amavidiyo aali apeeji yakusaanguna kutalisya mubandi. Makani aaya alakonzya kutupa muzeezo kujatikizya mbobayeeya bantu bali mucilawo cesu.

• Amubatondezye bantu izili apeeji yakusaanguna. Amumwaambile muntu mitwe iigaminide acibeela cakuti “Amusale Mutwe Uukonzya Kumukkomanisya”, alimwi akumutondezya mbwakonzya kujana makani manji awebbusaiti.

• Amumutumine liinki. Bantu bamwi tabayandi kubandika andiswe cacigaminina, pele inga kabayanda kuunka awebbusaiti yesu. Aboobo mutawayiwayi kubatumina liinki iibatola apeeji yakusaanguna, kucibalo cigaminide naa kuvidiyo aabo bajisi luyandisisyo.