“Amuswene kuli Leza, eelyo awalo ulaswena kulindinywe”—Jakobo 4:8
Sena Leza Ulaimvwa Mipailo Yesu?
Sena kuli nomwakalibuzyide kale kuti naa Leza ulamumvwa ciindi nomupaila? Ikuti kacili boobo, tamuli nyolikke pe. Banji bakapaila kale kuli Leza kujatikizya mapenzi aamwi, pele mapenzi aayo akazumanana. Sena eeci caamba kuti Leza taibikkili maano mipailo yesu? Peepe, tacili boobo. Bbaibbele lyaamba kuti Leza ulatuswiilila ciindi notupaila kulinguwe munzila iili kabotu. Atubone Bbaibbele ncolyaamba.
LEZA ULASWIILILA.
“Yebo Ooswiilila mipailo, bantu bamisyobo yoonse bayooboola kulinduwe.”—Intembauzyo 65:2.
Bantu bamwi balapaila akaambo kakuti baamba kuti kucita boobo kubapa kulimvwa kabotu, nokuba kuti tabasyomi kuti kuli uubaswiilila ciindi nobapaila. Pele mupailo tacili buyo cintu cicitwa kutegwa tulimvwe kabotu akuliyumya kumapenzi eesu. Bbaibbele litwaambila kuti “Jehovaa ulaafwaafwi abaabo boonse bamwiita, aabo boonse bamwiita mukasimpe. . . . Ulamvwa nobakwiilila lugwasyo, alimwi ulabavwuna.”—Intembauzyo 145:18, 19.
Aboobo, tulakonzya kuba masimpe kuti Jehova Leza ulaiswiilila mipailo yabakombi bakwe. Caluyando waamba kuti: “Muyoondiita alimwi muyooboola akupaila kulindime, eelyo ndiyoomuswiilila.”—Jeremiya 29:12.
LEZA UYANDA KUTI KAMUPAILA KULINGUWE.
“Amujatisye kupaila.”—Baroma 12:12.
Mu Bbaibbele, tukulwaizyigwa ‘kuzumanana kupaila’ alimwi ‘akupaila ciindi coonse.’ Cilisalede kuti, Jehova Leza uyanda kuti katupaila kulinguwe.—Matayo 26:41; Baefeso 6:18.
Nkaambo nzi Leza ncayanda kuti katupaila kulinguwe? Amulange-lange kaambo aaka: Muzyali nzi uunga taayanda kumvwa mwanaakwe kaamba kuti “Bataata, ndalomba amundigwasye”! Masimpe kuti, muzyali inga kazizyi kale zintu nzyayandika mwanaakwe naa mbwalimvwa, pele ciindi namvwwa mwanaakwe kamulomba lugwasyo, citondezya kuti mwana ulamusyoma alimwi ulamvwana anguwe. Mbubwenya buyo, ciindi notupaila kuli Jehova Leza, tutondezya kuti tulamusyoma alimwi tuyanda kuba acilongwe anguwe.—Tusimpi 15:8; Jakobo 4:8.
LEZA ULAMUBIKKILA MAANO KAPATI.
“Kamuwaala makatazyo aanu oonse kulinguwe, nkaambo ulamubikkila maano.”—1 Petro 5:7.
Leza uyanda kuti katupaila kulinguwe nkaambo ulatuyanda alimwi ulatubikkila maano. Ulaazyi mapenzi eesu oonse azintu zyoonse izitupa kulibilika, aboobo uyanda kutugwasya.
Mubuumi bwakwe boonse, Mwami Davida wakali kupaila kuli Jehova Leza kulomba lugwasyo alimwi wakali kumwaambila nzyaakali kuyeeya ambwaakali kulimvwa. (Intembauzyo 23:1-6) Ino Leza wakalimvwa buti kujatikizya Davida? Leza wakamuyanda kapati Davida alimwi wakaiswiilila mipailo yakwe. (Milimo 13:22) Mbubwenya buyo, Leza ulaiswiilila mipailo yesu nkaambo ulatubikkila maano.
“NDILAMUYANDA JEHOVA NKAAMBO ULAMVWA JWI LYANGU”
Aaya majwi aamulembi wantembauzyo imwi yamu Bbaibbele. Wakalisinizyide kuti Leza wakaimvwa mipailo yakwe, alimwi eeci cakamugwasya kapati. Wakalimvwa kuba acilongwe ciyumu a Leza alimwi wakaba anguzu zyakulwana mapenzi aamakatazyo aamubuumi.—Intembauzyo 116:1-9.
Ciindi notuli masimpe kuti Leza ulaimvwa mipailo yesu, tuyoozumanana kupaila kulinguwe. Amubone icakabacitikila ba Pedro, ibakkala ku Spain nkoili kunyika. Bakafwidwa mwanaabo musankwa wakajisi myaka iili 19 muntenda yamumugwagwa. Ba Pedro bakamwaambila Leza bwini mbobakalimvwide mumoyo alimwi bakali kupaila cakwiinduluka-induluka kulomba lugwasyo aluumbulizyo. Ino ncinzi icakacitika? Ba Pedro bakaamba kuti: “Jehova wakayiingula mipaila yangu kwiinda mulugwasyo aluumbulizyo ndobakatupa Banakristoma.”
Bwiinguzi bwamipailo yesu kanji-kanji bulaboola kwiinda mulugwasyo alimwi aluumbulizyo ndotujana kubalongwe ibatuyanda
Nokuba kuti mipailo tiiyakapa kuti mwanaabo abuke, pele yakabagwasya kapati ba Pedro antoomwe amukwasyi wabo. Bakaintu babo ba María Carmen bakaamba kuti: “Mipailo yakandigwasya kuliyumya kubuumba bwangu. Ndakalizyi kuti Jehova Leza wakali kundiswiilila nkaambo ciindi nondakali kupaila kulinguwe, ndakali kulimvwa kuba aluumuno alimwi akukkalwa moyo.”
Ibbaibbele alimwi azintu zyakabacitikila bamwi mubuumi zilatondezya caantangalala kuti Leza ulaimvwa mipailo. Pele alimwi cilisalede kuti, taili mipailo yoonse Leza njayingula. Nkaambo nzi Leza ncayingula mipailo imwi pele imwi tayiinguli?
a Jehova ndezina lya Leza limugeme.—Intembauzyo 83:18.