Nkaambo Nzi Leza Ncatayiinguli Mipailo Yoonse?
Taateesu wakujulu, Jehova Leza ulilisungwide alimwi ulakkomana kumvwa mipailo yesu iizwa ansi aamoyo. Pele kuli zintu zimwi zikonzya kupa kuti atayiinguli mipailo yesu. Ino nzintu nzi eezyo, alimwi ncinzi ncotweelede kuyeeya ciindi notupaila? Nceeci ncolyaamba Bbaibbele.
“Ciindi nomupaila, mutanikwaambi majwi ngoonya cakwiinduluka-induluka.”—Matayo 6:7.
Jehova tayandi kuti katwiinduluka mipailo njotwakaswata naa kwiibala buya mukabbuku kamipailo. Muciindi caboobo, uyanda kuti katupaila kuzwa ansi aamoyo. Amuyeeye buyo mbomukonzya kulimvwa kuti mulongwe wanu lyoonse kainduluka buyo kwaamba majwi ngaonya buzuba abuzuba. Balongwe bali kabotu balalikwaya kubandika alimwi akwaamba zyoonse zili mumoyo. Ciindi notupaila kubelesya majwi eesu, tutondezya kuti Taateesu wakujulu tumubona kuti mulongwe wesu.
“Nomulomba, tamupegwi pe akaambo kakuti mulalomba kamujisi makanze mabi.”—Jakobo 4:3.
Tulizyi kuti Leza takonzyi kuyiingula mipailo yesu ikuti twamulomba zintu nzyotuzyi kuti tayandi kuti tube aanzizyo naa tuzicite. Mucikozyanyo, ikuti umwi kauma njuka mpoonya wapaila kuli Leza kuti amugwasye kuba acoolwe cakuwina mali, sena Jehova inga wawiingula mupailo ooyo? Kakuli utwaambila kuti tatweelede kuba basyaacivwulemwangu naa kusyoma zintu zitali zyamasimpe mbuli coolwe. (Isaya 65:11; Luka 12:15) Tacidoonekwi buya kuti Jehova takonzyi kuyiingula mipailo iili boobu! Kutegwa Leza ayiingule mipailo yesu, tweelede kuba masimpe kuti nzyotulomba zileendelana ancatwaambila mu Bbaibbele.
“Ooyo uukaka kumvwa mulawo, nouba mupailo wakwe ulasesemya.”—Tusimpi 28:9.
Kaindi, Leza tanaakali kubaingula aabo ibakali kukaka kutobela milawo yakwe iiluleme. (Isaya 1:15, 16) Leza tacincide pe. (Malaki 3:6) Kutegwa Leza ayiingule mipailo yesu, tweelede kupona kweelana amilawo yakwe. Pele ino mbuti kuti kaindi twakacita zintu zibi? Sena eeci caamba kuti Jehova talangilwi kwiiswiilila mipailo yesu? Peepe! Caluyando, Leza ulakonzya kutulekelela ikuti naa twatondezya kuti tuluuside akaambo kacibi eeco alimwi akusolekesya kucita zintu zimukkomanisya.—Milimo 3:19.