Mbuti Mbomukonzya Kupaila Kutegwa Leza Ayimvwe Mipailo Yanu?
Jehova Leza ‘ngusikuswiilila mipailo.’ (Intembauzyo 65:2) Tulakonzya kubandika anguwe kufwumbwa nkotubede alimwi kufwumbwa ciindi, icakupozya naa cakaumuumu. Jehova uyanda kuti katumwiita kuti “Taata,” alimwi ngu Taata wiinda kubota ngotukonzya kuba anguwe. (Matayo 6:9) Caluyando, Jehova ulatuyiisya mbotukonzya kupaila alimwi akumvwugwa anguwe.
AMUPAILE KULI JEHOVA LEZA KWIINDA MUZINA LYA JESU
“Ikuti mwamulomba cintu cili coonse Taata, uyoomupa ncico muzina lyangu.”—Johane 16:23.
Cilisalede kuti majwi aa Jesu atondezya kuti Jehova uyanda kuti katupaila kulinguwe ikutali kwiinda muzibumbwa, mubasaante, mubangelo naa mubantu bakafwa, pele kwiinda muzina lya Jesu Kristo. Ciindi notupaila kuli Leza kwiinda muzina lya Jesu, tutondezya kuti tulizyi kuti Leza ulaimvwa mipailo yesu akaambo kancaakatucitila Jesu. Jesu wakaamba kuti: “Kunyina uuboola kuli Taata ccita kuti wainda mulindime.”—Johane 14:6.
AMWAAMBE KUZWA ANSI AAMOYO
“Amumwaambile zyoonse zili mumyoyo yanu.”—Intembauzyo 62:8.
Ciindi notupaila kuli Jehova, tweelede kwaambaula mbubonya mbotukonzya kwaambaula kuli taata siluyando. Muciindi cakubala buya kuzwa mubbuku naa kwiinduluka buyo nzyotwakaswata, tweelede kwaambaula anguwe cabulemu alimwi acakuzwa ansi aamoyo.
AMUPAILE KWEELANA AKUYANDA KWA LEZA
“Kufwumbwa cintu ncotumulomba ceendelana akuyanda kwakwe, ulatumvwa.”—1 Johane 5:14.
Mu Bbaibbele, Jehova Leza ulatwaambila ncayootucitila alimwi ancayanda kuti swebo tumucitile. Kutegwa mipailo yesu ayitambule Leza, tweelede kupaila ‘kweelana akuyanda kwakwe.’ Kutegwa tucikonzye kucita boobo, tuyandika kwiiya Bbaibbele kutegwa tumuzyibe kabotu. Ikuti twacita oobo, mipailo yesu inoomukkomanisya.
INO NZINTU NZI NZYOTUKONZYA KUPAILILA?
Amupailile Zintu Nzyomuyandika. Tulakonzya kupaila kuli Leza kujatikizya zintu nzyotuyandika buzuba abuzuba mbuli zyakulya, zisani alimwi aakukkala. Alimwi tulakonzya kupailila busongo kutegwa tucikonzye kusala kabotu alimwi akulomba nguzu zyakuliyumya kumapenzi. Tulakonzya kupailila lusyomo, kulekelelwa alimwi alugwasyo lwa Leza.—Luka 11:3, 4, 13; Jakobo 1:5, 17.
Amupailile Bamwi. Bazyali ibabayanda bana babo balakkomana ciindi nobabona bana babo kabayandana. Awalo Jehova uyanda kuti bana bakwe anyika kababikkilana maano. Alimwi cileelela kupailila muntu ngotukwetene limwi, bana besu, mukwasyi wesu alimwi abalongwe besu. Sikwiiya Jakobo wakalemba kuti: “Amupaililane.”—Jakobo 5:16.
Amupaile Kutondezya Kulumba. Kujatikizya Mulengi wesu, Bbaibbele lyaamba kuti: “Wakacita zibotu, wakamupa mvwula kuzwa kujulu aziindi eelyo nokuba micelo minji, alimwi wakamukkutya azilyo akuzuzya myoyo yanu akubotelwa.” (Milimo 14:17) Ciindi notuzinzibala kuyeeya zintu zyoonse nzyaatucitila Leza, tuyookulwaizyigwa kumulumba kwiinda mumupailo. Pele alimwi tweelede kutondezya kuti tulalumba kuli Leza kwiinda mukumumvwida.—Bakolose 3:15.
AMUKKAZIKE MOYO AKUZUMANANA KUPAILA
Zimwi ziindi, tulakonzya kutyompwa akaambo kakutafwambaana kujana bwiinguzi bwamipailo yesu iizwa ansi aamoyo. Sena tweelede kuyeeya kuti Leza tatubikkili maano? Peepe! Amubone zyakuluula zitobela izitondezya kuti tuyandika buyo kuzumanana kupaila.
Ba Steve ibaambwa kale mucibalo cakusaanguna, bakaamba kuti: “Ikuti nondatakazumanana kupaila, nobwakamana kaindi bulangizi boonse mbondakajisi ibwakuba alukkomano alimwi.” Ino ncinzi cakabagwasya kucinca? Bakatalika kwiiya Bbaibbele mpoonya bakaiya kujatikizya mbociyandika kupaila alimwi akuzumanana. Ba Steve bakaamba kuti: “Ndilapaila kuli Leza kumulumba akaambo kalugwasyo loonse ndondajana kwiinda mubalongwe bandiyanda. Lino ndilikkomene kapati kwiinda kaindi.”
Ino mbuti kujatikizya ba Jenny, balo ibakali kulimvwa kuti Leza takonzya kubamvwa? Bakaamba kuti: “Ciindi nondakalimvwide kubula mpindu kapati, ndakalomba Leza kuti andigwasye kumvwisya kaambo ncondakali kulimvwa boobu.” Ino eeci cakabagwasya buti? Bakaamba kuti: “Kubandika a Leza kwakandigwasya kulibona mbuli mbwandibona walo, kubona kuti nokuba kuti moyo wangu undipa kulimvwa kubula mulimo, walo tandiboni boobo pe. Alimwi eeci candigwasya kutatyompwa pe, pele kuzumanana.” Ino ncinzi cakatobela? Bakaamba kuti: “Mupailo wandigwasya kubona Jehova kuti ngu Leza siluyando, Taata uubikkila maano alimwi Mulongwe walo uulibambilide kundigwasya ciindi coonse kufwumbwa buyo kuti ndazumanana kucita ncayanda.”
Ba Isabel bakaamba kuti: “Ndilazyiba kuti mbobwiinguzi bwiinda kubota bwamipailo yangu,” ciindi nobabona mwanaabo Gerard kakkomene mubuumi nokuba kuti mulema
Amubone alimwi cakuluula caba Isabel. Ciindi nobakamita, bamadokota bakabaambila kuti mwanaabo wakali kuyoozyalwa kali mulema citaambiki. Bakatyompwa kapati. Mane bamwi bakabaambila kuti baligwisye buyo da. Ba Isabel bakaamba kuti: “Ndakalimvwa mbuli kuti ndilafwa buya akaambo kakupenga mumoyo.” Ino bakacita buti? Bakaamba kuti: “Ndakapaila cakwiinduluka-induluka kuli Leza kulomba lugwasyo.” Mukuya kwaciindi, bakatumbuka mwana musankwa ngobakaulika kuti Gerard alimwi wakali mulema. Sena ba Isabel balimvwa kuti Leza wakayiingula mipailo yabo? Inzya, mbobalimvwa! Munzila nzi? Ba Isabel bakaamba kuti: “Ciindi nondibona mwanaangu, walo uujisi myaka iili 14 lino, kakkomene nokuba kuti mulema, ndilazyiba kuti mbobwiinguzi bwiinda kubota bwamipailo yangu, cilongezyo cibotu ncaakandipa Jehova Leza.”
Majwi aali boobu aazwa ansi aamoyo atuyeezya majwi aasintembauzyo aakuti: “Yebo uyoomvwa kulomba kwababombe myoyo, O Jehova. Yebo uyookkazika myoyo yabo akubaswiililisya.” (Intembauzyo 10:17) Eelo kaka ootu twaambo tubotu itweelede kutupa kuzumanana kupaila!
Bbaibbele lilijisi mipailo minji njaakapaila Jesu. Pele uuzyibidwe kapati ngooyo ngwakayiisya basikwiiya bakwe. Ncinzi ncotukonzya kwiiya kumupailo ooyu?