Bantu Boonse Bayanda Kuyooba Abuumi Bubotu Kumbele
Ino mbuumi buli buti mbomuyanda kuyooba ambubo kumbele? Mbubwenya mbuli bantu banji, tacidoonekwi kuti mulayanda kuyooba abuumi bubotu kumbele nywebo amukwasyi wanu, nkokuti buumi bwalukkomano, bwakutaciswa, bwaluumuno alimwi akuzwidilila.
Nokuba boobo, bantu banji baladooneka kuti balakonzya kuyooba abuumi mbobalombozya. Nkaambo babona zintu zicitika cakutayeeyela, mbuli bulwazi bwa COVID-19, kabunyonganya bukkale bwabantu mukulaba kwaliso, ikuleta bucete, mane buya akujaya bantu banji kapati. Akaambo kaceeci, bayeeya kuti tabakonzyi kuyooba abuumi bubotu kumbele.
Akaambo kakutazyiba zintu ziboola kumbele, bantu baluujisi kuyandaula cintu cikonzya kubapa kuyooba abuumi bubotu kumbele. Bamwi bayeeya kuti zintu izyakabambilwa limwi kuti ziyoomucitikila muntu naa zyoolwe nzyozyeendelezya buumi bwabo. Bamwi babikkila kapati maano kuba alwiiyo alimwi alubono, kabayeeya kuti eezyi zyezintu iziyoobapa kujana zyoonse nzyobayanda. Alimwi bamwi balimvwa kuti kuba muntu uuli kabotu ncecintu cilikke ciyandika kutegwa bakabe abuumi bubotu.
Sena kuli cintu cimwi akati kazintu eezyi zyaambwa icikonzya kumusololela kubuumi mbomuyanda? Kutegwa muzyibe, muyandika kulanga-langa mibuzyo eeyi:
Ncinzi cini cikonzya kumupa kuzyiba buumi bwanu mbobunoobede kumbele?
Sena lwiiyo alimwi amali zilakonzya kupa muntu kuyooba abuumi bubotu?
Sena kuba muntu uuli kabotu kulakonzya kupa muntu kuyooba abuumi bubotu kumbele?
Nkookuli nkomukonzya kujana busolozi bugwasya bwakuyooba abuumi bubotu kumbele?
Magazini eeyi ya Ngazi Yamulindizi ilakonzya kumugwasya kujana bwiinguzi.