Sena Mulizyi?
Nkaambo nzi ncocakali cibotu kuti Jehova wakali kuzumizya bana Israyeli kutuula nziba ankwilimba?
MU MULAWO, nziba alimwi ankwilimba zyakalizumizyidwe kupegwa kazili zituuzyo kuli Jehova. Aaba bayuni bobilo lyoonse bakali kwaambwa aantoomwe mumilawo caboola kuzituuzyo alimwi umwi wakali kukonzya kutuulwa mubusena bwaumwi. (Lev. 1:14; 12:8; 14:30) Nkaambo nzi eeci ncocakali cibotu? Kaambo kamwi nkakuti nziba tiizyakali kujanika lyoonse pe. Nkaambo nzi?
Nziba
Nziba mbayuni balonga ibakali kujanika mu Israyeli lyacilimo. Mu October lyoonse, nziba zyakali kulonga kutozya kumusanza kumasi aakasaala, mpoonya akupiluka mu Israyeli kumatalikilo aamupeyo. (Lwi. 2:11, 12; Jer. 8:7) Muciindi cabana Israyeli cansiku, eeci caamba kuti cakali kukatazya kujana nziba zyakutuula ciindi camupeyo.
Nkwilimba yamumabwe
Kulubazu lumwi, nkwilimba tabali bayuni balonga, nkokuti zyakali kujanika mu Israyeli mwaka woonse. Amana buya, nkwilimba mbayuni bavwubwa. (Amweezyanisye Johane 2:14, 16.) Bbuku lyakuti Bible Plants and Animals lyaamba kuti, “muminzi yoonse alimwi amumadolopo aamu Palestine kwakali nkwilimba. Aŋanda iili yoonse kwakali caanda cankwiilimba, naa mpako abwaanda, mwalo bayuni mobakali kukkala.”—Amweezyanisye Isaya 60:8.
Nkwilimba iili mucaanda
Aboobo Jehova wakatondezya kuti ulaaluyando alimwi akunyoneka kwiinda mukutambula bayuni ibakali kujanika mwaka woonse kacili cituuzyo kubana Israyeli.