Nobakubusi Amuzumanane Kuyaambele Mwamana Kubbapatizyigwa

1. Nzintu nzi bakubusi banji nzyobakacita kale?

MWAKA AMWAKA, bakubusi Banakristo banji balabbapatizyigwa. Sena mwakabweza ntaamu iili boobu? Ikuti mwakacita oobo, bakwesu abacizyi balamukkomanina alimwi awalo Jehova ulakkomana! (Tus. 27:11) Amuyeeye buyo zintu zibotu nzyomwakacita kale. Mucikozyanyo, mwakaiya Bbaibbele cabusungu, ambweni kwamyaka minji. Nzyomwakaiya zyakamupa kusinizya kuti Bbaibbele ndi Jwi lya Leza. Pele kwiinda zyoonse, mwakamuzyiba alimwi akumuyanda Sikwaanza bbuku eeli lisetekene. Luyando ndomujisi kuli Jehova lwakakomena cakuti lino mwakalyaaba kulinguwe akubbapatizyigwa. Eelo kaka cilakkomanisya!

2. Ncinzi ncotutiibandike mucibalo eeci?

² Tacidoonekwi buya kuti lusyomo lwanu lwakasunkwa munzila zinji ciindi nomwakali kuyaambele kutegwa mubbapatizyigwe. Pele mbomuyaabukomena, munoojana masunko mapya. Saatani uyoosola kupa kuti luyando ndomujisi kuli Jehova luceye alimwi akuti mucileka kumubelekela. (Ef. 4:14) Pele mutalekeli kuti eeco cimucitikile. Ncinzi cikonzya kumugwasya kuzumanana kusyomeka kuli Jehova alimwi akuzuzikizya cikonke canu cakulyaaba? Mweelede kuzumanana ‘kuyaambele’ kutegwa mube Banakristo basimide. (Heb. 6:1) Pele ino mbuti mbomukonzya kucita boobo?

MBUTI MBOMUKONZYA KUZUMANANA KUYAAMBELE MBULI MUNAKRISTO?

3. Nkuyaambele kuli buti Banakristo boonse nkobeelede kucita bamana kubbapatizyigwa?

³ Twamana kubbapatizyigwa, toonse tuyandika kutobela lulayo lwamwaapostolo Paulo ndwaakapa basyominyina mu Efeso. Wakabakulwaizya kuba “bantu bapati.” (Ef. 4:13) Munzila imwi, wakali kwaamba kuti ‘bazumanane kuyaambele.’ Paulo wakakozyanisya kuyaambele kwesu kumuuya mbubwenya mwana mbwakomena kumubili. Mwana muvwanda ulabakkomanisya bazyali alimwi balamuyanda kapati. Pele takonzyi kuzumanana kali muvwanda mane kukabe kutamani. Mukuya kwaciindi, weelede kutuleka “tulengwa twabwana.” (1Kor. 13:11) Ncimwi buyo a Banakristo. Twamana kubbapatizyigwa tweelede kuzumanana kuyaambele. Atulange-lange nzila zimwi zikonzya kutugwasya kutegwa tucite oobo.

4. Mbube nzi bukonzya kutugwasya kuyaambele kumuuya? Amupandulule. (Bafilipi 1:9)

⁴ Amuzumanane kuyungizya luyando lwanu kuli Jehova. Mulamuyanda kapati Jehova. Pele luyando lwanu kulinguwe lulakonzya kukomena. Munzila nzi? Mwaapostolo Paulo wakaamba nzila imwi kweelana alugwalo lwa Bafilipi 1:9. (Amubale.) Paulo wakapaila kuti luyando lwabana Filipi “luzumanane kuvwula lyoonse.” Aboobo tulakonzya kuluyungizya luyando lwesu kuli Jehova. Mbuti mbotukonzya kucita oobo? Tulakonzya kucita oobo kwiinda mukuba “aluzyibo lwini-lwini alimwi akumvwisya koonse.” Mbotunooyaabumuzyiba Jehova, tunoomuyanda kapati, kumulumba akaambo kabube bwakwe alimwi anzila mbwacita zintu. Luyandisisyo lwesu lwakumukkomanisya luyookomena alimwi tatukayandi kucita cintu cili coonse cikonzya kumutyompya. Kuyungizya waawo, tuyoocita zyoonse nzyotukonzya kutegwa tumvwisye zintu nzyayanda kuti katucita alimwi ambotweelede kuzicita.

5-6. Mbuti mbotukonzya kuyungizya luyando lwesu kuli Jehova? Amupandulule.

⁵ Tulakonzya kuyungizya luyando lwesu kuli Jehova kwiinda mukumuzyiba kabotu Mwanaakwe, walo uubutondezya bube bwa Bausyi cakulondoka. (Heb. 1:3) Nzila iinda kubota mbotukonzya kumuzyiba Jesu, nkubala mabbuku one aa Makani Mabotu. Ikuti naa tamujisi cilengwa cakubala Bbaibbele abuzuba, sena inga tiimwatalika lino? Ciindi nomubala zibalo eezyi zyaamba Jesu, amubikkile maano kapati kubube bwakwe. Wakali kusikilika; wakabafwukatila bana basyoonto caluyando. (Mk. 10:13-16) Basikwiiya bakwe bakali kulikwaya kuba anguwe; bakali kwaanguluka kumwaambila mbobayeeya. (Mt. 16:22) Munzila eeyi, Jesu wakaiya Bausyi bakujulu. Awalo Jehova ulasikilika kapati. Kayi, tulakonzya kupaila kulinguwe. Alimwi ciindi notupaila tulakonzya kwaamba zili mumoyo wesu. Tulijisi lusyomo lwakuti takonzyi kutubeteka. Ulatuyanda; alimwi ulatubikkila maano.—1Pet. 5:7.

⁶ Jesu wakali kubeetelela bantu. Mwaapostolo Matayo wakaamba kuti: “Lino naakabona makamu aabantu, wakabeetelela nkaambo bakali kupenzyegwa alimwi bakalimwaikide mbuli mbelele zitakwe mweembezi.” (Mt. 9:36) Ino Jehova ulimvwa buti? Jesu wakaamba kuti: “Awalo Taata uuli kujulu tayandi kuti umwi wabasyoonto aaba alobe.” (Mt. 18:14) Eelo kaka majwi aaya alakkazika moyo! Mbotunooyaabumuzyiba Jesu, luyando lwesu kuli Jehova lunooyaabukomena.

7. Ino kuyanzana a Banakristo basimide inga kwamugwasya buti?

⁷ Mulakonzya kuyungizya luyando lwanu akuyaambele kumuuya kwiinda mukuyanzana abakwesu abacizyi mumbungano yanu basimide kumuuya. Amubone mbobakkomene. Kunyina nobausa akaambo kakusala kubelekela Jehova. Amubalombe kuti bamwaambile zyakuluula zyabo mumulimo wa Jehova. Ciindi nomuyanda kusala mumakani mapati, amulombe lugwasyo lwabo. Kamuyeeya kuti, “kulaba kuzwidilila ikuti kakuli basikulaya banji.”—Tus. 11:14.

8. Ncinzi ncomukonzya kucita ikuti kamudooneka ncolyaamba Bbaibbele?

⁸ Amukuzunde kudooneka. Mbubwenya mbokwaambwa kale mumuncali 2, Saatani uyoosola kumusinkila kuzumanana kuyaambele kumuuya. Nzila imwi mbwakonzya kucita oobo nkwiinda mukumupa kudooneka kujatikizya njiisyo zimwi zyamu Bbaibbele. Mucikozyanyo, bamwi balakonzya kumupa kuyeeya kuti kunyina notwakalengwa buya a Leza, pele twakasanduka buya. Ambweni nomwakacili bana kunyina nomwakali kwaayeeya makani aaya, pele lino nomwakomena ambweni mulaiya buya kucikolo. Nzyobaamba bamayi banu kusumpula njiisyo yakusanduka zilakonzya kulibonya mbuli kuti zili kabotu. Pele ambweni kunyina nobakasolede kulanga-langa bumboni butondezya kuti kuli Mulengi. Amuyeeye njiisyo iijanika ku Tusimpi 18:17 yakuti: “Uusaanguna kwaamba kaambo kakwe ulibonya kuti uliluleme, kusikila mane mweenzinyina waboola akumubuzyisisya.” Muciindi cakusyoma zintu zyoonse nzyomwiiya kucikolo, mweelede kubikkila maano kulanga-langa kasimpe nkoliyiisya Jwi lya Leza Bbaibbele. Amuvwuntauzye mumabbuku eesu. Amubandike abakwesu abacizyi ibakali kusyoma njiisyo yakusanduka. Amubabuzye icakabapa kusyoma kuti kuli Mulengi uutuyanda. Mibandi iili boobu ilakonzya kumugwasya kuba abumboni butondezya kuti kuli Mulengi.

9. Ncinzi ncomwiiya kucakuluula camucizyi Melissa?

⁹ Mucizyi Melissa wakagwasyigwa kapati ciindi naakavwuntauzya kujatikizya njiisyo yakusanduka.b Wakaamba kuti: “Muzikolo, njiisyo yakusanduka ilapandululwa munzila iipa bantu kusyoma kuti njamasimpe. Kumatalikilo tiindakali kuyanda kuvwuntauzya. Nkaambo ndakali kuyoowa kuti ndilajana kuti njiisyo eeyi njamasimpe. Pele ndakayeeya kuti Jehova uyanda kuti katujisi bumboni businizyide kujatikizya zintu nzyotusyoma. Aboobo ndakatalika kuvwuntauzya. Ndakabala bbuku lyakuti Is There a Creator Who Cares About You? alimwi abroshuwa yakuti Was Life Created? ayakuti The Origin of Life—Five Questions Worth Asking. Kucita boobo cakaliluzi. Alimwi ndilimvwa kuti ndakamuka kucita oobo.”

10-11. Ncinzi cikonzya kumugwasya kuzumanana kusalala mukulilemeka? (1 Batesalonika 4:3, 4)

¹⁰ Amukukake kutalilemeka. Ciindi nomwakubuka, muzeezo wakoonana ulakomena, alimwi bamwi balakonzya kumoongelezya koonana. Eeci Saatani ncayanda kuti mucite. Aboobo ncinzi cikonzya kumugwasya kuzumanana kusalala mukulilemeka? (Amubale 1 Batesalonika 4:3, 4.) Ciindi nomupaila kuli Jehova, amumwaambile mbomulimvwa. Alimwi akumulomba kuti amugwasye kuliyumya. (Mt. 6:13) Kamuyeeya kuti Jehova uyanda kumugwasya ikutali kumubeteka. (Int. 103:13, 14) Alyalo Bbaibbele lilakonzya kumugwasya. Mucizyi Melissa iwaambwa kale wakapenga amizeezo iitali kabotu. Wakaamba kuti: “Kubala Bbaibbele kwakandigwasya kulwana mizeezo iitali kabotu. Kwakandiyeezya kuti ndizulilwa kuli Jehova alimwi akuti ulayandika mubuumi bwangu.”—Int. 119:9.

¹¹ Mutasoli kwaalwana mapenzi ngomujisi nyolikke. Amubandike abazyali banu. Nokuba kuti tacili cuubauba kubandika makani aali boobu, pele cilayandika kucita oobo. Mucizyi Melissa wakaamba kuti: “Ndakapaila kuli Jehova kulomba busicamba akubandika abataata kujatikizya penzi ndyondakajisi. Mpoonya ndakalimvwa kwaanguluka. Ndakalizyi kuti Jehova ulandiyanda kapati.”

12. Mbuti mbomukonzya kusala kabotu?

¹² Amusololelwe anjiisyo zyamu Bbaibbele. Ciindi mwaakukomena muyooba alwaanguluko lwakulisalila zyakucita. Pele kuli zintu zinji nzyomutazyi. Mbuti mbomukonzya kweeleba kucita cintu cili coonse cikonzya kunyonganya cilongwe canu a Jehova? (Tus. 22:3) Mucizyi Kari ulapandulula cakamugwasya kutegwa kasala kabotu. Wakabona kuti Munakristo uusimide tayandiki milawo mubukkale buli boonse. Wakaamba kuti: “Ndakali kuyandika kumvwisya njiisyo zyamu Bbaibbele muciindi cakutobela buyo milawo.” Ciindi nomubala Bbaibbele amulibuzye kuti: ‘Ino cibalo eeci cindaambila nzi kujatikizya mbwayeeya Jehova? Sena cijisi njiisyo zikonzya kundigwasya kucita ciluzi? Ikuti kacili boobo, mbuti mbondikonzya kugwasyigwa ciindi nondizitobela?’ (Int. 19:7; Is. 48:17, 18) Kwiinda mukubala Bbaibbele alimwi akuzinzibala kuyeeya, ciyoomuubaubila kusala zintu izimukkomanisya Jehova. Nomuzumanana kuyaambele, muyoobona kuti tamuyandiki milawo mubukkale buliboonse nkaambo muyoomvwisya mbwayeeya Jehova mumakani aali woonse.

13. Ino balongwe bali kabotu inga bamugwasya buti? (Tusimpi 13:20)

¹³ Amusale balongwe bamuyanda Jehova. Mbubwenya mbokwaambwa kale, balongwe mbomusala balakonzya kumugwasya kusima kumuuya. (Amubale Tusimpi 13:20.) Mucizyi Sara wakali kuyaabumaninwa lukkomano. Mpoonya kwakacitika cintu cimwi icakamugwasya kuba alukkomano alimwi. Wakaamba kuti: “Ndakajana balongwe ibali kabotu aciindi ceelede. Kumane mebo amucizyi uucili mwana-mwana twakatalika kulibambila ciiyo ca Ngazi Yamulindizi nsondo ansondo. Mulongwe uumbi wakandigwasya kutalika kupa bwiinguzi kumiswaangano. Akaambo kakugwasyigwa abalongwe, ndakatalika kubikkila maano kuciiyo cangu alimwi akupaila. Kwiinda mukucita boobo cilongwe cangu a Jehova cakayuma, mpoonya ndakatalika kuba alukkomano alimwi.”

14. Ino ba Julien bakabajana buti balongwe bali kabotu?

¹⁴ Mbuti mbomukonzya kujana balongwe bali kabotu bakonzya kumugwasya? Mukwesu Julien, imwaalu, wakaamba kuti: “Nondakali mwana ndakajana balongwe bali kabotu kwiinda mukubeleka abakwesu abacizyi mumulimo wakukambauka. Balongwe aaba bakali basungu alimwi bakandigwasya kubona mboukkomanisya mulimo ooyu. Aboobo ndakalibikkila mbaakani yakutalika mulimo waciindi coonse. Kuyungizya waawo, ndakabona kuti ndakali kwiindwa coolwe cakuba abalongwe banji babotu akaambo kakumvwana buyo abaabo bamusela wangu. Mukuya kwaciindi, ndakaba abalongwe baku Beteli. Cikozyanyo cabo cakandigwasya kusala zyakulikondelezya zili kabotu, calo cakayumya cilongwe cangu a Jehova.”

15. Ncinzi Paulo ncaakacenjezya Timoteyo kujatikizya balongwe? (2 Timoteyo 2:20-22)

¹⁵ Mbuti kuti mwabona kuti muntu umwi tali mulongwe mubotu? Paulo wakalizyi kuti bamwi mumbungano yamumwaanda wamyaka wakusaanguna tiibakali kubikkila maano kuzintu zyakumuuya, aboobo wakacenjezya Timoteyo kubatantamuka bantu bali boobo. (Amubale 2 Timoteyo 2:20-22.) Cilongwe cesu a Jehova cilayandika kapati. Aboobo tatweelede kulekela muntu uuli woonse kunyonganya cilongwe ncotujisi a Taateesu wakujulu, calo ncotwakabelekela canguzu kutegwa tube aancico.—Int. 26:4.

INO KULIBIKKILA MBAAKANI INGA KWAMUGWASYA BUTI KUYAAMBELE KUMUUYA?

16. Nimbaakani nzi nzyomukonzya kulibikkila?

¹⁶ Amulibikkile mbaakani zigwasya. Amusale mbaakani zikonzya kuyumya lusyomo lwanu akumugwasya kuba Munakristo uusimide. (Ef. 3:16) Mucikozyanyo, amubikkile maano kuciiyo canu alimwi akubala Bbaibbele lyoonse. (Int. 1:2, 3) Amulange-lange ziindi nzyomupaila alimwi ambomupaila. Kuyungizya waawo, mweelede kubikkila maano kapati kujatikizya zyakulikondelezya nzyomusala aciindi ncomubelesya. (Ef. 5:15, 16) Ciindi Jehova nabona mbomubeleka canguzu kutegwa muyaambele, ulakkomana.

17. Mbubotu nzi mbomukonzya kujana kwiinda mukugwasya bamwi?

¹⁷ Muyooba Munakristo uusimide ciindi nomugwasya bamwi. Jesu wakaamba kuti: “Kupa kulakkomanisya kapati kwiinda kupegwa.” (Mil. 20:35) Muyookkomana kapati ikuti mwabelesya ciindi canu alimwi anguzu kugwasya bamwi. Mucikozyanyo, mulakonzya kulibikkila mbaakani yakugwasya bacembeede alimwi abalema mumbungano yanu. Ambweni mulakonzya kubaulila zintu akubagwasyilizya kuzyiba mbwaabelesyegwa mafooni amatabuleti. Ikuti kamuli mukwesu, amulibikkile mbaakani yakuba mukutausi, kamujisi makanze aakugwasyilizya bakwesu abacizyi. (Flp. 2:4) Kuyungizya waawo, mulakonzya kutondezya luyando kuli bamwi kwiinda mukubakambaukila makani mabotu aa Bwami. (Mt. 9:36, 37) Ikuti kacikonzyeka amulibikkile mbaakani yakutalika mulimo waciindi coonse.

18. Mbuti kubeleka mulimo waciindi coonse mbokukonzya kumugwasya kusima kumuuya?

¹⁸ Mulimo waciindi coonse ulakonzya kumupa zyoolwe zinji zyakuyaambele kumuuya. Kuti kamuli mupainiya, mulakonzya kunjila Cikolo Cabakambausi ba Bwami, kubelekela ku Beteli naa kuyaka masena mucitilwa milimo ya Bwami. Mucizyi Kaitlyn, mupainiya uucili mwana-mwana wakaamba kuti: “Kubeleka mumulimo abakwesu abacizyi bajisi luzyibo kwakandigwasya kapati kusima kumuuya nondakamana kubbapatizyigwa. Cikozyanyo cabo cakandikulwaizya kuyungizya luzyibo lwamu Bbaibbele alimwi akuyungizya luzyibo lwangu mukuyiisya.”

19. Nzilongezyo nzi nzyomuyoojana kwiinda mukuzumanana kuyaambele kumuuya?

¹⁹ Ciindi nomuzumanana kuyaambele kumuuya, muyooba azilongezyo zinji. Tamukabelesyi bukubusi bwanu muzintu zitagwasyi. (1Joh. 2:17) Muyootantamuka mapenzi aaboola akaambo kakutasala kabotu. Muyoozwidilila alimwi akukkomana. (Tus. 16:3) Cikozyanyo canu cibotu ciyoobakulwaizya bakombinyoko bana abapati. (1Tim. 4:12) Kwiinda zyoonse, muyooba aluumuno alimwi akukkutila ikuboola kwiinda mukukkomanisya Jehova akuba acilongwe cibotu anguwe.—Tus. 23:15, 16.