Bantu ba Jehova Balabuyanda Bululami

1. Ndisunko nzi ndyaakajana Josefa, alimwi wakacita buti?

JOSEFA mwana wa Jakobo wakali musunko lipati. Mukaintu umwi wakamwaambila kuti: “Koona andime.” Ooyu wakali mukaintu wasimalelaakwe, Potifara. Pele Josefa wakakaka. Umwi inga wabuzya kuti, mbwaanga Potifara tanaakaliko, ‘nkaambo nzi Josefa ncaakalikaka sunko eeli?’ Kuyungizya waawo, Josefa wakali muzike muŋanda yakwe; alimwi buya mukaintu ooyu wakali kukonzya kumuyumizyila buumi Josefa akaambo kakukaka. Nokuba boobo, Josefa wakazumanana kukaka. Nkaambo nzi? Wakaamba kuti: “Ino inga ndacitila nzi cibi cipati cili boobu akubisizya Leza?”—Matl. 39:7-12.

2. Ino Josefa wakazyiba buti kuti kucita bumambe nkubisizya Leza?

² Mbuti Josefa mbwaakazyiba kuti Leza wakali kubona kuti bumambe ‘ncibi cipati’? Bana Israyeli bakapedwe buyo Mulawo wa Musa, iwaamba kuti: “Utaciti bumambe,” nikwakainda myaka iitandila ku 200. (Kul. 20:14) Nokuba boobo, Josefa wakalimuzyi kabotu-kabotu Jehova cakuti wakalizyi mbwaakali kulimvwa kujatikizya bumambe. Mucikozyanyo, kweelede kuti Josefa wakalizyi kuti Jehova wakabikka bubambe bwacikwati kuti kabuli akati kamwaalumi amukaintu. Alimwi kweelede kuti wakamvwa kujatikizya Jehova ziindi zyobilo mbwaakamukwabilila Sara iwakazyala bakaapanyina kuntenda yakutundululwa. Mbubwenya buyo, Leza wakamukwbilila mukaintu wa Izaka, Rebeka. (Matl. 2:24; 12:14-20; 20:2-7; 26:6-11) Ciindi Josefa naakali kuyeeya makani aaya, kweelede kuti wakazyiba kujatikizya ciluzi acitaluzi mumeso aa Leza. Mbwaanga Josefa wakali kumuyanda Leza alimwi azyeelelo zyakwe ziluleme, wakalikanzide kuzumanana kusyomeka.

3. Ncinzi ncotutiibandike mucibalo eeci?

³ Sena mulabuyanda bululami? Tacidoonekwi buya kuti mulabuyanda. Pele toonse tatulondokede, alimwi kuti naa tiitwacenjela, ncuuba-uba kujatikizyigwa amboibubona bululami nyika. (Is. 5:20; Rom. 12:2) Aboobo lino atulange-lange ncobwaamba bululami alimwi ambotugwasyigwa kuti twabuyanda. Mpoonya tulabandika nzila zyotatwe nzyotukonzya kutobela kutegwa tuzumanane kuyanda zyeelelo zya Jehova.

INO BULULAMI NINZI?

4. Ino bantu banji bayeeya kuti muntu mululami uli buti?

⁴ Ciindi bantu nobayeeya kujatikizya muntu mululami, banji balakonzya kuyeeya muntu uulisumpula, uubeteka bamwi naa uulipa kaleza-leza. Pele Leza kunyina nabuyanda bube oobu naaceya. Ciindi Jesu naakali waano anyika, wakabasinsa kapati basololi bazikombelo bamumazuba ngaakali kupona akaambo kakulibikkila zyeelelo zyabululami. (Muk. 7:16; Lk. 16:15) Muntu mululami ncobeni kunyina nalibona kuti ulabainda bamwi munzila iili yoonse naa kulipa kaleza-leza.

5. Kweelana a Bbaibbele, ino bululami ninzi? Amupe zikozyanyo.

⁵ Bululami mbube bubotu kapati. Bbala eeli lyaamba kucita cintu ciluzi mumeso aa Jehova Leza. Kweelana a Bbaibbele, bbala lyakuti “bululami” lipa muzeezo wakupona kweelana azyeelelo zisumpukide kapati, nkokuti zyeelelo zya Jehova. Mucikozyanyo, Jehova wakalailila basambazi kubelesya ‘ceelesyo ciluzi.’ (Dt. 25:15) Bbala lya Chihebrayo ilyakasandululwa kuti “ciluzi,” alimwi lilakonzya kwaamba cintu “ciluleme.” Aboobo, Munakristo uuyanda kuba mululami mumeso aa Leza ulasyomeka cakumaninina mumakwebo woonse ngacita. Muntu uuyanda kucita ciluzi, cilamucisa nabona muntu uucitilwa cakutalulama. Kutegwa ‘amukkomanisye cakumaninina’ Jehova, muntu mululami ncobeni ulabikkila maano kubona Jehova mbwakubona kusala nkwacita.—Kol. 1:10.

6. Nkaambo nzi ncotuzisyoma zyeelelo zya Jehova zijatikizya cintu ciluzi acitaluzi? (Isaya 55:8, 9)

⁶ Bbaibbele lyaamba kuti Jehova Nkasensa kabululami. Akaambo kaceeci, wiitwa kuti ‘ncikkalilo cabululami.’ (Jer. 50:7) Mbwali Mulengi, Jehova ngonguwe alikke uujisi nguzu zyakutusalila cintu ciluzi acitaluzi. Mbwaanga Jehova ulilondokede, mbwacibona cintu ciluzi acitaluzi kuliindene kapati andiswe, nkaambo swebo kanji-kanji tweendelezyegwa aakutalondoka alimwi acibi. (Tus. 14:12; amubale Isaya 55:8, 9.) Nokuba boobo, mbwaanga Leza wakatulenga mucinkozya cakwe, tulakonzya kupona kweelana azyeelelo zyakwe ziluleme. (Matl. 1:27) Alimwi tulayanda buya kucita boobo. Luyando ndotujisi kuli Taateesu lutukulwaizya kumwiiya kusikila mpotugolela.—Ef. 5:1.

7. Nkaambo nzi ncotuyandika zyeelelo zisyomeka? Amupe cikozyanyo.

⁷ Tulagwasyigwa kwiinda mukutobela zyeelelo zya Jehova zijatikizya ciluzi acitaluzi. Sena mwakabona kaambo? Amweezyeezye buyo cikonzya kucitika kuti bbanki iili yoonse kailibikkila zyeelelo zyakuzyiba nguzu nzyaajisi mali naa kkampani iili yoonse yamayake kailibikkila zyeelelo zijatikizya zipimyo. Eelo kaka zintu inga zyanyongana citaambiki! Alimwi kuti bamanesi abamadokota kabatatobeli malailile aagaminide aajatikizya mbobakonzya kusilika bantu, eeci cilakonzya kubajazya balwazi bamwi. Aboobo calibonya kuti kutobela zyeelelo zisyomeka kulakwabilila. Mbubwenya buyo, zyeelelo zya Leza izijatikizya ciluzi acitaluzi zilatukwabilila.

8. Nzilongezyo nzi nzyobayoojana aabo bayandisya kucita ciluzi?

⁸ Jehova ulabalongezya aabo basolekesya kupona kweelana azyeelelo zyakwe. Usyomezya kuti: “Balulami bayookona nyika, alimwi bayookkala alinjiyo lyoonse mane kukabe kutamani.” (Int. 37:29) Amweezyeezye buyo mbokunooli lukamantano, luumuno alimwi alukkomano ciindi bantu boonse baakutobela zyeelelo zya Jehova! Oobo mbombubo Jehova mbwayanda kuti katupona. Eelo kaka umwi aumwi wesu ulijisi kaambo kalimvwisya ikatondezya ncotweelede kubuyanda bululami! Mbuti mbotukonzya kuzumanana kubuyanda bube oobu? Lino atubandike nzila zyotatwe nzyotweelede kutobela.

AMUZUMANANE KUYANDA ZYEELELO ZYA JEHOVA

9. Ncinzi cikonzya kutugwasya kuyanda bululami?

⁹ Nzila Yakusaanguna: Amumuyande muntu iwakabikka zyeelelo. Kutegwa tubuyande bululami, tweelede kuyanda Yooyo wakabikka zyeelelo zijatikizya ciluzi acitaluzi. Kuti twazumanana kumuyanda Jehova, tuyoozumanana kupona kweelana zyeelelo zyakwe. Mucikozyanyo: Kuti ba Adamu a Eva nobakali kumuyanda Jehova, nobakazumanana kumumvwida.—Matl. 3:1-6, 16-19.

10. Ncinzi ncaakacita Abrahamu kutegwa amvwisye mbwayeeya Jehova?

¹⁰ Masimpe kuti swebo tatuyandi kucita mbobakacita ba Adamu a Eva. Kutegwa tutaciti oobo, tweelede kuzumanana kwiiya kujatikizya Jehova, kulumba bube bwakwe, akusolekesya kumvwisya mbwayeeya. Kuti twacita oobo, luyando lwesu kuli Jehova luyooyuma. Amuyeeye kujatikizya Abrahamu. Wakali kumuyanda ncobeni Jehova. Nociba ciindi nocakali kumukatazya kumvwisya Jehova mbwayeeya, Abrahamu taakamuzangila pe. Muciindi caboobo, wakasolekesya kumuzyiba kabotu Jehova. Mucikozyanyo, ciindi naakazyiba kuti Jehova ukanza kunyonyoona munzi wa Sodoma a Gomora, Abrahamu kumatalikilo wakalibilika kuti ambweni “Mubetesi wanyika yoonse” inga wanyonyoona muntu uululeme antoomwe amuntu mubi. Abrahamu wakabona kuti Jehova takonzyi kucita oobo, aboobo wakamubuzya mibuzyo iili mbwiibede. Cakukkazika moyo, Jehova wakamwiingula. Kumamanino, Abrahamu wakazyiba kuti Jehova ulalingula moyo wamuntu uuli woonse alimwi akuti takonzyi kusubula muntu mululami antoomwe amubi.—Matl. 18:20-32.

11. Mbuti Abrahamu mbwaakatondezya kuti wakali kumuyanda Jehova alimwi akumusyoma?

¹¹ Mubandi ngwaakajisi Abrahamu alimwi a Jehova kujatikizya munzi wa Sodoma a Gomora wakamujatikizya kapati Abrahamu. Tacidoonekwi buya kuti luyando lwakwe lwakakomena alimwi akumulemeka Usyi kwiinda mbwaakali kucita kaindi. Kumbele, lusyomo lwa Abrahamu lwakasunkwa kapati. Jehova wakamulomba kuti aabe mwanaakwe ngwaakali kuyandisya kapati, Izaka. Pele aciindi eeci, Abrahamu wakalimuzyi kabotu-kabotu Leza wakwe, aboobo taaku naakamubuzya mibuzyo. Abrahamu wakakuzumina kulomba kwa Jehova. Nokuba boobo, amuyeeye buyo mbocakamuciside ciindi naakali kulibambila kucita mulimo ooyu. Kweelede kuti Abrahamu wakayeeya ziiyo nzyaakaiya kujatikizya Jehova. Wakalizyi kuti Jehova takonzyi kucita cakutalulama naa calunya. Kweelana amwaapostolo Paulo, Abrahamu wakayeeya kuti Jehova wakali kukonzya kumubusya mwanaakwe uuyandwa, Izaka. (Heb. 11:17-19) Kayi, Jehova wakasyomezyede Izaka kuti wakali kuyoozyala cisi, pele aciindi eeci, Izaka tanaakajisi mwana. Abrahamu wakali kumuyanda Jehova, aboobo wakali kusyoma kuti Usyi wakali kuyoocita cabululami. Nokuba kuti tiicakali cuuba-uba, akaambo kalusyomo Abrahamu wakamvwida.—Matl. 22:1-12.

12. Mbuti mbotukonzya kumwiiya Abrahamu? (Intembauzyo 73:28)

¹² Mbuti mbotukonzya kumwiiya Abrahamu? Mbubwenya mbuli nguwe, tweelede kuzumanana kwiiya kujatikizya Jehova. Ciindi notucita oobo, tuyooba acilongwe ciyumu a Leza alimwi akumuyanda kapati. (Amubale Intembauzyo 73:28.) Manjezyeezya eesu aayiisyidwe ayootondezya kuyeeya kwa Leza. (Heb. 5:14) Akaambo kaceeci, twaakusunkwa kucita cintu citaluzi, tuyookaka. Tatukazumini kucita cintu cili coonse cikonzya kumucisa Taateesu akunyonganya cilongwe cesu anguwe. Nokuba boobo, muunzila nzi zimbi motukonzya kutondezya kuti tulabuyanda bululami?

13. Mbuti mbotukonzya kusungwaala kuyanda bululami? (Tusimpi 15:9)

¹³ Nzila yabili: Amusolekesye kuyanda bululami buzuba abuzuba. Ikuti katuyanda kuyumya milambi, tweelede kubeleka canguzu kunyanyaasya mubili abuzuba. Mbubwenya buyo, kuyanda cintu Jehova ncaamba kuti cililuzi kuyandika kubeleka canguzu. Mulimo ooyu weelede kucitwa abuzuba. Jehova ulanyoneka, alimwi kunyina naatwaambila kucita zintu nzyotutakonzyi. (Int. 103:14) Utusyomezya kuti “uyanda yooyo uusungwaala kutobela bululami.” (Amubale Tusimpi 15:9.) Kuti katuyanda kuzuzikizya mbaakani imwi mumulimo wa Jehova, tweelede kubeleka canguzu. Oobu mbocibede aciindi notusungwaala kuyanda bululami. Alimwi Jehova cakukkazika moyo uyootugwasya kuyaambele mbwaayaabuya mazuba.—Int. 84:5, 7.

14. Ino “cilikwabilizyo cakucamba cabululami” ninzi, alimwi nkaambo nzi ncotweelede kuba ancico?

¹⁴ Jehova caluyando utuyeezya kuti kuyanda bululami takuminyi. (1Joh. 5:3) Muciindi caboobo, ncilikwabilizyo, icintu ncotuyandika abuzuba. Amuyeeye kujatikizya zilwanyo zyakumuuya mwaapostolo Paulo nzyaakapandulula. (Ef. 6:14-18) Ncibeela icili icakali kukwabilila moyo wasikalumamba? ‘Ncilikwabilizyo cakucamba cabululami,’ calo iciiminina zyeelelo zya Jehova zyabululami. Mbubwenya cilikwabilizyo cakucamba mbocikwabilila moyo wini, azyalo zyeelelo zya Jehova zyabululami zilakonzya kukwabilila moyo wanu wacikozyanyo, nkokuti buntu bwanu bwamukati. Nkakaambo kaako, cilayandika kuti kamujisi cilikwabilizyo cakucamba cabululami ciindi coonse.—Tus. 4:23.

15. Mbuti mbomukonzya kusama cilikwabilizyo cakucamba cabululami?

¹⁵ Mbuti mbomukonzya kusama cilikwabilizyo cakucamba cabululami? Mulakonzya kucita oobo kwiinda mukubikkila maano kuzyeelelo zya Leza ciindi nomusala zyakucita buzuba abuzuba. Nomusala makani aakwaamba, nyimbo zyakuswiilila, mafilimu akweebelela, naa mabbuku aakubala, mweelede kulibuzya kuti: ‘Ino makani aaya alaujatikizya buti moyo wangu? Sena alamukkomanisya Jehova? Naa sena akulwaizya kutalilemeka, nkondo, bulyato, busyaacivwulemwangu, izintu Jehova nzyabona kuti nkutalulama?’ (Flp. 4:8) Kuti kusala kwanu kakweendelana akuyanda kwa Jehova, nkokuti zyeelelo zyabululami ziyookwabilila moyo wanu.

16-17. Mbuti lugwalo lwa Isaya 48:18 mbolutukulwaizya kupona kweelana azyeelelo zya Jehova lyoonse?

¹⁶ Sena kuli nomulibilika kuti naa muyoozumanana kutobela zyeelelo zya Jehova buzuba abuzuba, mvwiki amvwiki, mwezi amwezi naa mwaka amwaka? Amubone cikozyanyo Jehova ncabelesya, cijanika kulugwalo lwa Isaya 48:18. (Amubale.) Jehova usyomezya kuti bululami bwesu bulakonzya kuba “mbuli mayuwe aamulwizi.” Amweezyeezye kuti muliimvwi kunkomwe aalwizi lupati, kamulangilila mayuwe aayenda cakutaleka! Mubukkale oobu bwaluumuno, sena inga mwalibilika kuti mayuwe aayo aayenda bumwi buzuba ayakwiile kucileka? Peepe! Mulizyi kuti mayuwe aayo alikuuma kunkomwe aalwizi kwamyaka minji, alimwi buya taakacileki pe.

¹⁷ Bululami bwanu bulakonzya kuba mbuli mayuwe aamulwizi! Munzila nzi? Ciindi nomuyanda kusala cakucita, cakusaanguna amubone Jehova ncayanda kuti mucite. Mpoonya amucicite. Kufwumbwa naa kusala ooko nkomucita kulakatazya, amusyome kuti Taateesu siluyando uyoomupa nguzu nomuzumanana kupona kweelana azyeelelo zyakwe zyabululami.—Is. 40:29-31.

18. Nkaambo nzi ncotweelede kutantamuka cilengwa cakubeteka bamwi kweelana azyeelelo zyesu?

¹⁸ Nzila Yatatu: Amulekele Jehova kubeteka. Notusolekesya kupona kweelana azyeelelo zya Jehova zyabululami, tweelede kutantamuka cilengwa cakubeteka bamwi akulipa kaleza-leza. Muciindi cakubona kuti tulabainda bamwi mbuli kuti tulijisi nguzu zyakubabeteka kweelana azyeelelo zyesu, tweelede kuyeeya kuti Jehova ngo “Mubetesi wanyika yoonse.” (Matl. 18:25) Jehova tanaakatupa nguzu zyakubeteka bamwi. Mane buya, Jesu wakalailila kuti: “Amuleke kubeteka kutegwa mutabetekwi.”—Mt. 7:1.b

19. Mbuti Josefa mbwaakatondezya kuti ulakusyoma kubeteka kwa Jehova?

¹⁹ Atucilange-lange alimwi cikozyanyo camwaalumi mululami Josefa. Tanaakababeteka bamwi, nobaba baabo ibakamweendelezya munzila mbyaabi. Banabokwabo bakamucitila calunya, bakamusambala mubuzike akwaambila bausyi kuti Josefa ulifwide. Kumbele, Josefa wakakamantana alimwi amukwasyi wakwe. Lino kali mweendelezi uulaanguzu, Josefa naakababeteka calunya banabokwabo akubapilusizya cibi. Banabokwabo Josefa bakalilibilikide kuti ambweni ulacita mbubwenya oobo, nokuba kuti bakaluuside kapati kuzintu nzyobakacita. Pele Josefa wakabaambila kuti: “Mutayoowi pe. Sena mebo ndili mubusena bwa Leza?” (Matl. 37:18-20, 27, 28, 31-35; 50:15-21) Cakulicesya, Josefa wakalekela Jehova kubeteka.

20-21. Mbuti mbotukonzya kutantamuka kulipa kaleza-leza?

²⁰ Mbubwenya mbuli Josefa, atulekele Jehova kubeteka. Mucikozyanyo, tatweelede kuyeeyela kuti tulizyi cipa bakwesu abacizyi kucita zintu munzila imwi. Kayi tatukonzyi kuzyiba zili mumoyo; ‘Jehova alikke nguulingula makanze aali mumoyo.’ (Tus. 16:2) Ulabayanda bantu boonse ibazwa mubukkale bwiindene-indene alimwi azilengwa. Kunze lyaboobo, Jehova utukulwaizya ‘kujalula myoyo yesu.’ (2Kor. 6:13) Tulabayanda bakwesu abacizyi boonse alimwi tatweelede kubabeteka.

²¹ Eeci caamba kuti tatweelede kubabeteka nobaba baabo batali Bakamboni. (1Tim. 2:3, 4) Sena kuli nomunga mwabeteka munamukwasyi walo uutali Kamboni, kwiinda mukwaamba kuti, “Ooyu kunyina nayakwiiya kasimpe”? Peepe, ooku nkulisumpula, nkulipa kaleza-leza. Jehova ucibapede coolwe “bantu boonse bali kumasena oonse” cakuti beempwe. (Mil. 17:30) Lyoonse tweelede kuyeeya kuti kulipa kaleza-leza nkutalulama.

22. Nkaambo nzi ncomukanzide kuzumanana kuyanda bululami?

²² Kuyanda zyeelelo zya Jehova zyabululami akutupe kuba alukkomano alimwi akukulwaizya bamwi, kubagwasya kuba acilongwe andiswe alimwi a Leza. Tutaleki ‘kufwa nzala anyota yabululami.’ (Mt. 5:6) Amusyome kuti Jehova ulakubona kusolekesya nkomucita alimwi lyoonse ulakukkomanina kuyaambele kwanu. Ciindi bantu munyika eeyi nobayabwiindila buya kutalulama, mutatyompwi. Lyoonse kamuyeeya kuti “Jehova ulabayanda baluleme.”—Int. 146:8.