Muzeezo Uugwasya

Sena mulakkomana kubala makani aakuluula aabakwesu abacizyi?

Banabukwetene bamwi ibakali kubala makani aakuluula aamuntu omwe abuzuba kuseeni, bakaamba kuti: “Eelo kaka cilatukulwaizya alimwi akutukkomanisya kubala zibalo eezyi! Inga zituyeezya kuti andiswe tulakonzya kuzumanana kusyomeka mubukkale buli boonse.” Mucizyi umwi awalo uulimvwa boobu wakalemba kuti: “Makani aakuluula aaya alaumbulizya, alakulwaizya alimwi akukkomanisya kapati. Bakwesu abacizyi bapona buumi bulaampindu. Aboobo makani aabo aakuluula alandikulwaizya kucita zinji mumulimo wakukambauka alimwi akundigwasya kukulwaizya bana bangu kubelekela Jehova mumulimo waciindi coonse.”

Makani aakuluula alakonzya kumugwasya kulibikkila mbaakani zibotu, kuleka cilengwa citali kabotu alimwi akuliyumya mubukkale bukatazya calukkomano acabulemu. Ino inga mwaajana buti makani aaya?

• Amuyandaule zibalo izijisi mutwe wakuti “Zyakuluula zya Bakamboni ba Jehova” a jw.org naa a JW Library®.

• Amuyandaule mutwe wakuti “Zyakuluula zya Bakamboni ba Jehova” a LAIBBULALI YAA INTANETI YA Watchtower ONLINE LIBRARY^™ naa Watchtower Library.