CIBALO CAKWIIYA 18
Amukulwaizyanye Kumiswaangano Yambungano
“Katubikkilana maano . . . , katukulwaizyanya umwi amweenzinyina.”—HEB. 10:24, 25.
LWIIMBO 88 Kondipa Kuzyiba Nzila Zyako
IZILI MUCIBALOa
1. Nkaambo nzi ncotupeda bwiinguzi lyamiswaangano?
NKAAMBO nzi ncotujanika kumiswaangano yambungano? Kaambo kapati, nkutembaula Jehova. (Int. 26:12; 111:1) Alimwi tulajanika kumiswaangano kutegwa tukulwaizyanye umwi amweenzinyina muziindi eezyi zikatazya. (1Tes. 5:11) Aboobo ciindi notupa bwiinguzi lyamiswaangano, nkokuti tucita zintu eezyi zyobilo.
2. Ino nzibeela nzi zyamiswaangano motukonzya kupa bwiinguzi?
2 Nsondo ansondo, tulijisi zyoolwe zyakupa bwiinguzi kumiswaangano yesu. Mucikozyanyo, kumiswaangano yakumamanino aansondo, tulakonzya kutola lubazu mu Ciiyo ca Ngazi Yamulindizi. Mpoonya lyamiswaangano yamukati kansondo, tulakonzya kupa bwiinguzi mucibeela ca Mbono Zyakumuuya, Ciiyo ca Bbaibbele Cambungano azibeela zimbi ziyandika kupa bwiinguzi.
3. Ncinzi cikonzya kupa kuti cikatazye kupa bwiinguzi, alimwi ino lugwalo lwa Bahebrayo 10:24, 25 inga lwatugwasya buti?
3 Toonse tulayanda kumutembaula Jehova alimwi akukulwaizya bakombima. Pele kuli zintu zikonzya kupa kuti cikatazye kucita boobo. Tulakonzya kuyoowa kutambika kutegwa tupe bwiinguzi, naa ambweni tulakonzya kuti katuyandide kutola lubazu ziindi zinji mpoonya tiitwapegwa coolwe. Ncinzi ncotukonzya kucita mubukkale oobu? Tulakonzya kubujana bwiinguzi kwiinda mukulanga majwi aamwaapostolo Paulo ngaakalembela bana Hebrayo. Ciindi naakali kwaamba mbociyandika kapati kuswaangana antoomwe, wakaamba kuti tweelede kubikkila maano ‘kukulwaizyanya umwi amweenzinyina.’ (Amubale Bahebrayo 10:24, 25.) Kuyeeya kuti tulakonzya kubakulwaizya bamwi kwiinda mukupa bwiinguzi nobuba bufwaafwi buyo ibutondezya lusyomo lwesu, kulakonzya kupa kuti tutanooyoowi kutambika. Mpoonya kuti naa tiitwapegwa coolwe cakupa bwiinguzi ziindi zinji kweelana ambotwali kuyanda, tulakonzya kukkomana kuzyiba kuti bamwi baba acoolwe cakupa bwiinguzi.—1Pet. 3:8.
4. Nzintu nzi zyotatwe nzyotutiibandike mucibalo eeci?
4 Mucibalo eeci, tulasaanguna kubandika mbotukonzya kukulwaizyanya umwi amweenzinyina mumbungano nsyoonto imuli basikupa bwiinguzi basyoonto. Mpoonya tulabandika mbotukonzya kukulwaizyanya umwi amweenzinyina mumbungano mpati mwalo muli bantu banji batambika kutegwa bape bwiinguzi. Camamanino, tulabandika mbotukonzya kukulwaizya bamwi kwiinda muzintu nzyotwaamba notwiingula.
AMUKULWAIZYANYE MUMBUNGANO NSYOONTO
5. Mbuti mbotukonzya kukulwaizyanya kuti katuli mumbungano nsyoonto?
5 Mumbungano nsyoonto naa kabunga, inga kuli buyo bantu basyoonto sikusololela mbakonzya kupa coolwe cakwiingula. Zimwi ziindi, inga wayandika kulindila buya kutegwa umwi atambike kulyaaba kupa bwiinguzi. Eeci inga capa kuti miswaangano kaitanoneezyi naa kukulwaizya. Aboobo, ncinzi ncomukonzya kucita mubukkale buli boobu? Kamulyaaba kutambika ziindi zinji. Kwiinda mukucita boobo, mulakonzya kukulwaizya bamwi kuti abalo kabatola lubazu ziindi zinji.
6-7. Mbuti mbotukonzya kucesya kuyoowa caboola kukupa bwiinguzi?
6 Ncinzi ncomukonzya kucita kuti kuyeeya buyo makani akwiingula kakumupa kuyoowa? Eeci tacigambyi pe nkaambo abamwi mbobalimvwa oobo. Pele kutegwa mubakulwaizye kapati bakwesu alimwi abacizyi, mulakonzya kujana nzila zyakucesya kuyoowa ooko. Mbuti mbomukonzya kucita oobo?
7 Mulakonzya kujana nzila zigwasya mumagazini aa Ngazi Yamulindizi aakamwaigwa musyule.b Mucikozyanyo, amulibambile kabotu. (Tus. 21:5) Ikuti naa mwacimvwisya kabotu cibalo ciyiigwa, tamukayoowi kupa bwiinguzi. Kunze lyaboobo, amusole kupa bwiinguzi bufwaafwi. (Tus. 15:23; 17:27) Kupa bwiinguzi bufwaafwi inga tiikwamupa kuyoowa kapati. Alimwi bwiinguzi bufwaafwi, ambweni ibujisi buyo kaambo komwe, bulakonzya kubagwasya kapati bakwesu abacizyi kwiinda bwiinguzi bulamfwu bujisi twaambo tunji. Aboobo kwiinda mukupa bwiinguzi bufwaafwi kubelesya majwi aanu, ciyootondezya kuti mwakalibambila kabotu alimwi mwakacimvwisya cibalo ciyiigwa.
8. Ino Jehova ulimvwa buti kujatikizya kusolekesya nkotucita?
8 Mbuti kuti nokuba kuti mwasola kuzibelesya nzila eezyi pele kamuciyoowa kupa bwiinguzi bwiinda alibomwe naa bobilo? Amusyome kuti Jehova ulalumba kapati akaambo kakusolekesya nkomucita kusikila mpomugolela. (Lk. 21:1-4) Jehova tatwaambili kucita zintu nzyotutakonzyi kucita. (Flp. 4:5) Amucizyibe ncomukonzya kucita, amulibikkile mbaakani yakucicita mpoonya akupaila kutegwa moyo kaukkede nomucicita. Kusaanguna, ambweni inga mwalibikkila mbaakani yakupa bwiinguzi bomwe bufwaafwi.
AMUKULWAIZYANYE MUMBUNGANO MPATI
9. Nkaambo nzi ncocikonzya kukatazya kupa bwiinguzi mumbungano mpati?
9 Kuti naa mbungano yanu kaijisi basikumwaya banji, inga kamujisi buyumuyumu bwiindene abwambungano nsyoonto. Ambweni mbanji bakwesu abacizyi batambika kutegwa bape bwiinguzi calo cikonzya kupa kuti nywebo mutapegwi coolwe cakwiingula. Mucikozyanyo, mucizyi Danielle lyoonse wali kukukkomanina kupa bwiinguzi lyamiswaangano.c Ukubona kuba cibeela cabukombi bwakwe, inzila yakukulwaizya bamwi alimwi akuyumya lusyomo lwakwe kujatikizya ncoliyiisya Bbaibbele. Pele ciindi naakalongela kumbungano mpati, tanaakali kupegwa zyoolwe zinji zyakwiingula, mane buya zimwi ziindi muswaangano woonse wakali kumana kakunyina kupegwa coolwe cakwiingula. Wakaamba kuti: “Ndakali kulimvwa bubi kapati. Ndakali kulimvwa mbuli kuti ndaindwa coolwe cimwi caalubazu. Ciindi eeci nocakali kwiinduluka-induluka kucitika, ndakali kulimvwa mbuli kuti sikusololela wakali kucita caali kutanditondeka.”
10. Mbuti mbotukonzya kuba azyoolwe zinji zyakwiingula?
10 Sena kuli nomulimvwa mbuli Danielle? Kuti kacili boobo, ambweni mulakonzya kuyeeya buyo kuti mucileke kutambika akutalika buyo kuswiilila. Pele tamweelede kucileka. Ino ncinzi ncomweelede kucita? Inga cagwasya kulibambila bwiinguzi buli mbobubede kumuswaangano umwi aumwi. Mpoonya kuti naa tiimwapegwa coolwe cakwiingula kumatalikilo, nkokuti mulakonzya kuba azyoolwe zimbi zyakwiingula. Ciindi nomulibambila Ciiyo ca Ngazi Yamulindizi, amubone muncali umwi aumwi mboweendelana amutwe wacibalo. Kuti mwacita oobo, tacidoonekwi buya kuti munoojisi bwiinguzi bunji mbomukonzya kupa lyaciiyo. Kuyungizya waawo, mulakonzya kulibambila kupa bwiinguzi mumincali iijisi njiisyo zyamu Bbaibbele zikatazya kupandulula. (1Kor. 2:10) Nkaambo nzi? Nkaambo kakuti ambweni inga kwatambika buyo basyoonto mumincali eeyo. Pele mbuti kuti nokuba kuti mwasola kuzibelesya nzila eezyi, mwabona kuti tamupegwi coolwe cakwiingula? Mulakonzya kubandika asikusololela kautanatalika muswaangano akumwaambila mubuzyo uugaminide ngomuyanda kwiingula.
11. Ino lugwalo lwa Bafilipi 2:4 lutukulwaizya kucita nzi?
11 Amubale Bafilipi 2:4. Kasololelwa amuuya, mwaapostolo Paulo wakakulwaizya Banakristo kubikkila maano kuzintu nzyobayandika bamwi. Mbuti mbotukonzya kulubelesya lulayo oolu lyamiswaangano? Nkwiinda mukuyeeya kuti abamwi balayanda kwiingula mbubonya mbuli ndiswe.
Mbubonya mbomulekela bamwi kwaambaula ciindi nomubandika, amubalekele abamwi kwiingula ciindi camiswaangano (Amubone muncali 12)
12. Ino ninzila nzi yiinda kubota mbotukonzya kukulwaizya bamwi lyamiswaangano? (Amubone acifwanikiso.)
12 Amusole kuciyeeyela munzila eeyi: Ikuti naa mulabandika abeenzinyoko, sena inga mwayanda kuti kamubandika buyo ndinywe nyolikke? Peepe! Inga mwayanda kuti abalo kababandika. Mbubwenya buyo, tuyanda kuti banji kabatola lubazu lyamiswaangano. Alimwi buya, nzila yiinda kubota mbotukonzya kubakulwaizya bakwesu abacizyi, nkwiinda mukubapa coolwe cakuti abalo baingule. (1Kor. 10:24) Amuleke tubone mbotukonzya kucita oobo.
13. Mbuti mbotukonzya kupa kuti banji babe acoolwe cakwiingula?
13 Nzila imwi, nkwiinda mukupa bwiinguzi bufwaafwi, calo cikonzya kupa kuti banji batole lubazu. Baalu alimwi abasikumwaya basimide beelede kuba cikozyanyo cibotu mumakani aaya. Pele noliba leelyo nomupa bwiinguzi bufwaafwi, tamweelede kwaamba twaambo toonse tuli mumuncali. Ikuti naa mwatwaamba twaambo toonse tuli mumuncali, nkokuti bamwi balabula cakwaamba. Mucikozyanyo, mumuncali ooyu kwaambwa twaambo tobilo, nkokuti kupa bwiinguzi bufwaafwi alimwi akutaamba twaambo tunji. Aboobo, ikuti naa ndinywe mwasaanguna kupegwa coolwe cakupa bwiinguzi mumuncali ooyu, amusole kwaamba buyo kaambo komwe akati katwaambo ootu.
Ndilili notukonzya kusala kutatambika ciindi camiswaangano? (Amubone muncali 14)f
14. Ncinzi cikonzya kutugwasya caboola kumakani aakutambika? (Amubone acifwanikiso.)
14 Amubelesye bupampu caboola kumakani aakutambika. Ikuti naa katutambika ziindi zinji, tulakonzya kupa kuti sikusololela katutondeka buyo nokuba kuti bamwi tabanaba acoolwe cakwiingula. Eeci cilakonzya kupa kuti bamwi batyompwe akuleka kutambika.—Muk. 3:7.
15. (a) Ino tweelede kucita buti kuti tiitwapegwa coolwe cakwiingula? (b) Mbuti basikusololela mbobakonzya kutondezya kuti balababikkila maano baswiilizi boonse? (Amubone kabbokesi kakuti “Kuti Kamusololela.”)
15 Kuti kakuli basikumwaya banji batambika ciindi caciiyo, ambweni inga tiitwaba acoolwe cakwiingula ziindi zinji kweelana ambotuyanda. Zimwi ziindi sikusololela inga taatudoma buya. Eeci cilakonzya kututyompya, pele tatweelede kunyema kuti naa tiitwapegwa coolwe cakwiingula.—Muk. 7:9.
16. Mbuti mbotukonzya kubakulwaizya aabo bapa bwiinguzi?
16 Ikuti naa tiimwapegwa zyoolwe zinji zyakwiingula kweelana ambomwali kuyanda, amuswiilisisye ciindi bamwi nobaingula mpoonya akubalumbaizya yamana miswaangano. Bakwesu abacizyi balakonzya kukulwaizyigwa kapati ciindi nomubalumbaizya mbubonya mbobakonzya kukulwaizyigwa abwiinguzi mbomwali kuyanda kupa. (Tus. 10:21) Aboobo kulumbaizya bamwi, ninzila imwi mbotukonzya kukulwaizyanya umwi amweenzinyina.
NZILA ZIMBI MBOTUKONZYA KUKULWAIZYANYA
17. (a) Ino bazyali inga babagwasya buti bana babo kulibambila bwiinguzi? (b) Kweelana akavidiyo, ninzila nzi zyone zigwasya kulibambila bwiinguzi? (Amubone abupanduluzi buyungizyidwe.)
17 Ninzila nzi zimbi mbotukonzya kukulwaizyanya umwi amweenzinyina lyamiswaangano yesu? Kuti naa muli bazyali, amubagwasye bana banu kulibambila bwiinguzi butakatazyi kweelana aciimo cabo. (Mt. 21:16) Zimwi ziindi, kulaba ziiyo zijatikizya makani mapati, mbuli mapenzi aamucikwati naa makani aakulilemeka, pele inga kulaba muncali omwe naa yobilo iijisi twaambo ntobakonzya kwiingula bana. Alimwi amubagwasye bana banu, ikuzyiba kaambo ncobatakonzyi kupegwa coolwe cakwiingula kufwumbwa leelyo nobatambika. Kucita boobo kulakonzya kubagwasya kutanyema ciindi bamwi nobapegwa coolwe cakwiingula muciindi cambabo.—1Tim. 6:18.d
18. Ciindi notwiingula, mbuti mbotukonzya kutapa bamwi kubikkila ndiswe maano? (Tusimpi 27:2)
18 Toonse tulakonzya kulibambila bwiinguzi bukulwaizya, ibupa kuti Jehova alemekwe alimwi akukulwaizya Banakristoma. (Tus. 25:11) Nokuba kuti zimwi ziindi tulakonzya kwaamba zyakatucitikila, tatweelede kuba acilengwa cakwaamba buyo makani aajatikizya ndiswe. (Amubale Tusimpi 27:2; 2Kor. 10:18) Muciindi caboobo, tweelede kubikkila maano kwaamba makani aajatikizya Jehova, Ijwi lyakwe alimwi abantu bakwe. (Ciy. 4:11) Pele kuti naa mubuzyo wamuncali kauyanda kuti twaambe makani aajatikizya ndiswe, tulakonzya kucita oobo. Tulacibona cikozyanyo eeci mumuncali uutobela.
19. (a) Ncinzi cikonzya kucitika kuti katubikkilana maano kumiswaangano yambungano? (Baroma 1:11, 12) (b) Ncinzi cimukkomanisya nywebo kumugama kujatikizya kwiingula kumiswaangano?
19 Nokuba kuti kunyina milawo iiliko iijatikizya mbotweelede kupa bwiinguzi, toonse tulakonzya kusolekesya kupa bwiinguzi bukulwaizya. Eeci cilakonzya kwaamba kupa bwiinguzi ziindi zinji. Naa kukkutila azyoolwe nzyotwapegwa zyakupa bwiinguzi alimwi akukkomana ciindi bamwi nobapegwa coolwe cakwiingula. Kuti katubikkila maano kuzintu nzyobayandika bamwi kumiswaangano yambungano, toonse tulakonzya “kuyumizyanya.”—Amubale Baroma 1:11, 12.
LWIIMBO 93 Kotuleleka Twaswaangana
a Ciindi notupa bwiinguzi kumiswaangano, tulakulwaizyanya umwi amweenzinyina. Nokuba boobo, ibamwi balayoowa kupa bwiinguzi. Pele bamwi balakukkomanina kapati cakuti inga balombozya kuti kabapegwa coolwe cakwiingula ziindi zinji. Kufwumbwa bukkale mbobubede, mbuti mbotukonzya kubikkilana maano ikutegwa toonse tulimvwe kukulwaizyigwa? Alimwi mbuti mbotukonzya kupa bwiinguzi bukonzya kukulwaizya bakwesu abacizyi kutondezya luyando akucita milimo mibotu? Cibalo eeci cilapandulula.
b Kutegwa mujane nzila zimbi zigwasya, amubone Ngazi Yamulindizi ya January 2019, pp. 8-13, alimwi ayamu Cikuwa ya September 1, 2003, pp. 19-22
c Izina lyacincwa.
d Amweebelele kavidiyo kali a jw.org kakuti Amube Balongwe ba Jehova—Amulibambile Bwiinguzi.
e Amubone Ngazi Yamulindizi ya July 15, 2013, p. 32, ayamu Cikuwa ya September 1, 2003, pp. 21-22.
f BUPANDULUZI BWACIFWANIKISO: Mumbungano mpati, mukwesu waingwide kale wapa coolwe kuti abamwi baingule.