Muzeezo Uugwasya

Sena mulagwasyigwa abupanduluzi bwatupango twamu Bbaibbele bujanika mu Bbuku Ligwasya Kuvwuntauzya lya Bakamboni ba Jehova?

Bupanduluzi oobu bulakonzya kumugwasya kulimvwisya kabotu Jwi lya Leza. Zimwi ziindi bulakonzya kubikkilizya twaambo tujatikizya zintu mbozyakabede ciindi nozyakacitika zintu eezyo nzyaambidwe mukapango kamu Bbaibbele, kaambo ncokakalembelwa, bantu ibakali kulembelwa, ncaapandulula mabala aamwi naa majwi.

LAIBBULALI YAA INTANETI ya Watchtower^™ alimwi a JW Library^® ilagwasya kubona malifalensi aali mu Bbuku Ligwasya Kuvwuntauzya aapandulula kapango kamwi kamu Bbaibbele. Mulakonzya kwaabona malifalensi aaya mukabbokesi kaboola kululyo mwatyanka akapango.

Ciindi nomubelesya malifalensi aaya, amubikkile maano mbwaatobelana. Zibalo zipya inga zili atala. Mpoonya aansi eeni, inga kuli zibalo zyakaindi ambweni zijisi kumvwisya kwakacinca.

• Malifalensi aali mu Bbuku Ligwasya Kuvwuntauzya inga nkwaali kale mu LAIBBULALI YAA INTANETI ya Watchtower.

• Kutegwa malifalensi aatupango kaalibonya a JW Library, amulidaunilode Bbuku Ligwasya Kuvwuntauzya mpoonya akunoocita apudeti ciindi nokwasika maapudeti. Kutegwa mulidaunilode bbuku eeli, amuunke aalembedwe kuti Library akutyanka a Index, mpoonya amutyanke a Bbuku Ligwasya Kuvwuntauzya.