LAIBBULALI YAA INTANETI ya Watchower
Watchtower
LAIBBULALI YAA INTANETI
Chitonga
  • BBAIBBELE
  • ZYAKAMWAIGWA
  • MISWAANGANO
  • wp24 No. 1 map. 4-5
  • Ino Kusala Kwabantu Kanji-Kanji Kuyeeme Anzi?

Kunyina vidiyo aawa mpomwasala.

Vidiyo yakaka kulila.

  • Ino Kusala Kwabantu Kanji-Kanji Kuyeeme Anzi?
  • Ngazi Yamulindizi Yaambilizya Bwami bwa Jehova (Yakubuleya)—2024
  • Tutwe Twamakani
  • Makani Aakozyenye
  • MBOTULIMVWA
  • MBOBALIMVWA BAMWI
  • SENA KULI NZILA IIGWASYA KUPANGA ZYAKUSALA IZILI KABOTU?
  • Toonse Tulayeeya Kujatikizya Cintu Ciluzi Acitaluzi
    Ngazi Yamulindizi Yaambilizya Bwami bwa Jehova (Yakubuleya)—2024
  • Intalisyo
    Ngazi Yamulindizi Yaambilizya Bwami bwa Jehova (Yakubuleya)—2024
  • Mbociyandika Kuzyiba Zyeelelo Zyakulilemeka
    Sinsimuka!—2019
  • Kuba Amanjezyeezya Mabotu Kuli Leza
    Mbomukonzya Kukkala Muluyando lwa Leza
Amubone Azimwi
Ngazi Yamulindizi Yaambilizya Bwami bwa Jehova (Yakubuleya)—2024
wp24 No. 1 map. 4-5
Musankwa uucili mukubusi uutondezyedwe mucibalo cainda ubelesya kkampasi ciindi nayaabweenda munzila. Wasika kumbali aajeleele.

Sena lyoonse cilagwasya kucita zintu kweelana ambotulimvwa?

Ino Kusala Kwabantu Kanji-Kanji Kuyeeme Anzi?

Bunji bwabantu balazuminizya kuti nzyobacita bantu bambi zililuzi naa pe. Mucikozyanyo, kujaya muntu, kujata naa koona muntu cakumusinikizya alimwi akutundulula bana mumakani aakoonana micito iizyibidwe abantu banji kuti taiyandiki. Mpoonya bululami, luse alimwi alweetelelo mbube bukulwaizyigwa kapati. Pele ino mbuti kujatikizya zintu mbuli, kusala muntu wakoonana limwi, kwaamba masimpe alimwi ambotukonzya kukomezya bana? Bantu banji bayeeya kuti tacikwe makani ambwaasala muntu. Bayeeya kuti kusala kuli koonse kuli buyo kabotu. Kanji-kanji bantu balapanga zyakusala kweelana ambolimvwa alimwi ambobayeeya bantu babazingulukide kujatikizya makani aayo. Sena lyoonse cili kabotu kucita boobo?

MBOTULIMVWA

Kanji-kanji tulapanga zyakusala iziyeeme ambotulimvwa kujatikizya ciluzi alimwi acitaluzi. (Baroma 2:​14, 15) Nobaba bana basyoonto balazyiba ciindi nobateendelezyegwa kabotu alimwi balalipa mulandu ciindi nobacita cintu citaluzi. Mbotuyaabukomena, tulaiya kujatikizya ciluzi acitaluzi kuzwa kubantu mbotuyanzana limwi naa kuzwa kucikombelo nkotuzulilwa. Ciindi notupanga zyakusala, manjezeezya eesu akayiisyigwa alatwaambila kujatikizya ciluzi alimwi acitaluzi.

Kuzyiba ciluzi alimwi acitaluzi kulakonzya kutugwasya kutondezya lweetelelo, kulumba, bululami alimwi aluzyalo kubantu. Kunze lyaboobo, kulatugwasya kulilesya kutacitila bamwi zintu zikonzya kubacisa naa zikonzya kupa kuti tusampuke alimwi akulipa mulandu.

Sena lyoonse cilagwasya kucita zintu kweelana ambotulimvwa? Mukubusi wazina lya Garrick wakaamba boobu kujatikizya buumi mbwaakasala: “Ndakali kupona kufwumbwa mbondakali kuyanda.” Pele wakajana kuti kucita cintu ncaakali kuyeeyela kuti nceciluzi, tiikwakali kumugwasya. Wakapandulula kuti buumi bwakwe tiibwakali kukkomanisya nkaambo bwakali bwakutalilemeka mumakani aakoonana, kubelesya misamu iikola, bucakolwa alimwi abukali.

MBOBALIMVWA BAMWI

Kunze lyakutobela mbotulimvwa, kanji-kanji tulabikkila maano kujatikizya bantu bamwi mbobakonzya kukubona kusala kwesu. Aboobo tulakonzya kwiiya kuluzyibo ndobajisi alimwi abusongo. Tulalemekwa abanamukwasyi, balongwe alimwi abantu bakubusena nkotukkala ciindi notucita cintu ncobayeeya kuti nceciluzi.

Sena lyoonse cilagwasya kutobela mbobalimvwa bantu bamwi? Ciindi naakacili mukubusi, Priscila wakali kucita zintu nzyobakali kucita bamusela wakwe nzyaakali kuyeeya kuti zyakaliluzi alimwi wakali kujatikizyigwa mukoonana kwabantu batakwetene. Pele nokuba kuti bamwi bakali kubona kuti ncaakali kucita cakaliluzi, walo kunyina naakakkomene. Wakaamba kuti: “Kucita zintu nzyobakali kucita bantu boonse tiikwakali kundikkomanisya. Cakandipa kucita zintu zyatakaluzi alimwi akubikka buumi bwangu muntenda.”

SENA KULI NZILA IIGWASYA KUPANGA ZYAKUSALA IZILI KABOTU?

Mbotulimvwa alimwi ambobalimvwa bamwi kulagwasya kapati kucikonzya kwiindanya ciluzi acitaluzi. Pele kucita boobo talili lyoonse nokugwasya. Zimwi ziindi tulakonzya kuliletela mapenzi alimwi abamwi akaambo kakuti tatuzyi ciyoozwa mpawo akaambo kakusala kwesu. (Tusimpi 14:12) Alimwi buya ciindi notubona kuti nzyotuyeeya alimwi anzyobayeeya bamwi zililuzi, tacaambi kuti tatukonzyi kulijana muntenda iili yoonse naa kuti tatuyandiki kupanga kucinca kuli koonse. Amana buya, zintu izyakali kubonwa kuti taziluzi kaindi, lino zibonwa kuti zili buyo kabotu, mpoonya bukkale ibwakali kubonwa kuti buli kabotu lino bubonwa kuti tabuli kabotu.

Musankwa uucili mukubusi uliimvwi atala aabbwe lilembedwe zitondezyo. Ibamwi tiibazibikkila maano zitondezyo eezyo.

Sena kutobela mizeezo yabamwi lyoonse kulagwasya kupanga zyakusala zili kabotu?

Sena kuli busolozi bugwasya kwiindanya ciluzi alimwi acitaluzi? Sena kuli zyeelelo zyakulilemeka nzyotukonzya kutobela mazuba aano zyalo izitakatupi kuusa kumbele?

Cikkomanisya ncakuti, nkokuli nkotukonzya kujana busolozi bujatikizya makani aakulilemeka ibukonzya kutugwasya toonse tacikwe makani ankotukkala. Cibalo citobela cilabandika nkotukonzya kujana busolozi buluzi ibugwasya kwiindanya ciluzi alimwi acitaluzi.

    Chitonga Publications (1991-2024)
    Log Out
    Log In
    • Chitonga
    • Amutumine Bamwi
    • Makani Ngomuyanda
    • Copyright © 2025 Watch Tower Bible and Tract Society of Pennsylvania
    • Nzyomweelede Kuzumina
    • Mulawo Uujatikizya Kubamba Maseseke
    • Privacy Settings
    • JW.ORG
    • Log In
    Amutumine Bamwi