Tulakonzya Kucisyoma Ncolyaamba Bbaibbele Kujatikizya Cintu Ciluzi Alimwi Acitaluzi

Tatukonzyi kusinizya kwaamba kuti zyakusala zyesu mumakani aakulilemeka zinooluzi ikuti kaziyeeme buyo ambotulimvwa alimwi ambobalimvwa bantu bamwi. Bbaibbele lilaamba ncocili boobo alimwi lilaamba amakani aambi. Lilatugwasya kuzyiba ciluzi acitaluzi, calo citupa kuti katukkomene.

TUYANDIKA BUSOLOZI BWA LEZA

Mu Bbaibbele tubala kuti Jehovaa Leza wakali kuyanda kuti bantu kabasololelwa anguwe kutali kuti kabalyeendelezya. (Jeremiya 10:23) Nkakaambo kaako wakabikka malailile aajatikizya kulilemeka mu Bbaibbele. Ulabayanda bantu alimwi tayandi kuti kabapanga zyakusala zikonzya kubaletela mapenzi. (Deuteronomo 5:29; 1 Johane 4:8) Kuyungizya waawo, mbwali Mulengi wesu, ulijisi busongo alimwi aluzyibo calo cipa kuti keelela kutupa busolozi mbotuyandika ibujatikizya zyeelelo zyakulilemeka. (Intembauzyo 100:3; 104:24) Pele tasinikizyi bantu kupona kweelana azyeelelo zyakwe.

Jehova wakapa mwaalumi alimwi amukaintu bakusaanguna, Adamu a Eva, zintu zyoonse nzyobakali kuyandika kutegwa kabakkomene mubuumi. (Matalikilo 1:28, 29; 2:8, 15) Alimwi wakabapa malailile aatakali kukatazya ngaakali kuyanda kuti kabatobela. Nokuba boobo, wakabapa coolwe cakusala kwaatobela malailile naa pe. (Matalikilo 2:9, 16, 17) Cuusisya ncakuti, ba Adamu a Eva bakasala kutobela zyeelelo zyabo beni muciindi cakutobela zyeelelo zya Leza. (Matalikilo 3:6) Ino ncinzi cakazwa mpawo? Sena cilabaletela lukkomano bantu kucita kufwumbwa ncobayeeya kuti cililuzi? Peepe. Kuzwa kaindi twabona kuti kutatobela zyeelelo zya Leza takuleteli luumuno lutamani alimwi alukkomano.—Mukambausi 8:9.

Mu Bbaibbele kuli busolozi ibutugwasya kupanga zyakusala tacikwe makani ankotukkala naa mukwasyi wesu mboubede. (2 Timoteyo 3:16, 17; amubone kabbokesi kakuti “Bbuku Lyabantu Boonse.”) Amubone Bbaibbele mbolicita oobo.

Amwiiye zinji kujatikizya kaambo Bbaibbele ncoliitwa kuti ‘Ijwi lya Leza.’—1 Batesalonika 2:13. Amweebelele kavidiyo kajanika a jw.org ikajisi mutwe wakuti Ino Sikwaanza Bbaibbele Nguni?

KAAMBO BAMWI NCOBAYEEYA KUTI BBAIBBELE TALIKONZYI KUBAGWASYA

Bantu bamwi baamba kuti Bbaibbele talikonzyi kubapa busolozi bubotu kujatikizya makani aakulilemeka. Balakonzya kwaamba twaambo ootu tutobela.

Nzyobaamba bamwi: “Twaambo tuli mu Bbaibbele tulakazyanya.”

Twaambo twamasimpe: Kumatalikilo, inga cilibonya mbuli kuti zibeela zimbi zya Bbaibbele tazyeendelani azibeela zimbi. Pele kuti twazyiba mbozyakalembwa alimwi aciindi nozyakalembwa inga twabona kuti mubwini zileendelana.

Kutegwa mubone zikozyanyo zigaminide, amubone cibalo cili a jw.org cakuti “Sena Twaambo Tuli mu Bbaibbele Tulakazyanya?”

Nzyobaamba bamwi: “Bantu ibalyaamba kuti batobela ncolyaamba Bbaibbele bacita zintu zibi, aboobo talikonzyi kupa busolozi bubotu kujatikizya makani aakulilemeka.”

Twaambo twamasimpe: Tatweelede kutongooka Bbaibbele ciindi bantu ibatazyibelesyi nzyoliyiisya nobalijana mumapenzi. Lyakasinsima kuti bantu banji kubikkilizya abasololi bazikombelo ibalyaamba kuti batobela ncolyaamba Bbaibbele banoocita zintu munzila yiimpene ancolyaamba. Alimwi lyaamba kuti akaambo kaceeci, njiisyo zyamu Bbaibbele ‘ziyoosampaulwa.’—2 Petro 2:1, 2.

Kutegwa mubone cikozyanyo cimwi, cijatikizya basololi bazikombelo banji mbobatatobeli Bbaibbele ncolyaamba, amubale cibalo cakuti “Sena Bukombi Makwebo?” icijanika a jw.org.

Nzyobaamba bamwi: “Bantu basyoma ncolyaamba Bbaibbele tababalemeki bantu batatobeli ncolyaamba.”

Twaambo twamasimpe: Bbaibbele likulwaizya kutondezya bulemu kubantu boonse. Talikulwaizyi mizeezo eeyi iitobela. . .

kulibona kuti tulayandika kapati kwiinda bamwi.—Bafilipi 2:3.
kutalemeka bantu bamusyobo uumbi naa kutalemeka nzyobasyoma.—1 Petro 2:17.
kusinikizya bamwi kuti bazumine nzyotusyoma.—Matayo 10:14.

Bbaibbele litondezya kuti Leza lyoonse ulabeendelezya caluzyalo abululami bantu alimwi uyanda kuti andiswe katucita oobo.—Baroma 9:14.

Kutegwa muzyibe zinji amubale cibalo cakuti “Bbaibbele Mbolikonzya Kutugwasya Kutabeteka Bamwi” icijanika a jw.org.

BBAIBBELE LILATWAAMBILA LEZA NCAYANDA KUTI TUCITE

Bbaibbele lilatwaambila cilongwe cili akati kabantu a Leza kuzwa kumatalikilo. Makani aali mu Bbaibbele alatugwasya kumvwisya zintu Leza nzyabona kuti zililuzi, taziluzi, zilakonzya kutugwasya naa kutuletela mapenzi. (Intembauzyo 19:7, 11) Nzyotwiiya lyoonse zyamasimpe alimwi zilatugwasya kusala cabusongo caboola kumakani aabuumi bwabuzuba-abuzuba ibujatikizya kulilemeka.

Mucikozyanyo, amubone lulayo lujanika kulugwalo lwa Tusimpi 13:20 lwakuti: “Ooyo weenda abasongo ulaba musongo, pele ooyo uuyanzana abafwubafwuba ulajana mapenzi.” Lulayo oolu, lulagwasya amazuba aano mbuli mbolwakali kugwasya kaindi. Mu Bbaibbele kuli lulayo lunji lugwasya kapati.—Amubone kabbokesi kakuti “Lulayo Lwamu Bbaibbele Lucigwasya Amazuba Aano.”

Ambweni inga mwalibuzya kuti, ‘Mbuti mbondikonzya kusinizya kuti lulayo lwamu Bbaibbele lulakonzya kundigwasya mazuba aano?’ Mucibalo citobela kuli zikozyanyo zyakacitika ncobeni.

a Jehova ndezina lya Leza limugeme.—Intembauzyo 83:18.

LULAYO LWAMU BBAIBBELE LUCIGWASYA AMAZUBA AANO

Nokuba kuti Bbaibbele lyakamana kulembwa myaka iitandila ku 2,000 yainda, lilagwasya amazuba aano. Bantu lyoonse bayanda kuti kabakkomene alimwi akuba abuumi buli kabotu. (Mukambausi 1:9) Lulayo lwamu Bbaibbele lulakonzya kutugwasya kuzuzikizya mbaakani eeyi.

Kusyomeka

“Tuyanda kuti katusyomeka muzintu zyoonse.”—Bahebrayo 13:18.
“Ooyo uubba atabbi limbi pe, muciindi cakubba abeleke mulimo canguzu.”—Baefeso 4:28.

Zilongwe abamwi

“Umwi aumwi kayandisya kugwasya bamwi ikutali buyo kuligwasya lwakwe mwini.”—1 Bakorinto 10:24.
“Amuzumanane kweengelelana akulekelelana camoyo woonse.”—Bakolose 3:13.

Kupanga zyakusala

“Muntu mufwubafwuba ulaasyoma makani oonse, pele ooyo uucenjede ulakkala ansi kuyeeya ntaamu zyakwe.”—Tusimpi 14:15.
“Muntu uucenjede abona mapenzi ulayuba, pele aabo batakwe maano balaunka nkukonya ooko, aboobo balapenga.”—Tusimpi 22:3.