Kulekelela Zibi Zyakacitika Kaindi

Tulakonzya kulekelelwa zibi akaambo buyo kacipaizyo cacinunuzyo ca Jesu ncaakapa kubelesya bulowa bwakwe. (Ef. 1:7) Nokuba boobo, Bbaibbele lyaamba kuti: “Leza wakali kukkazika moyo akulekelela zibi zyakacitika kaindi,” nkokuti, Jesu katanapa cinunuzyo. (Rom. 3:25) Ino cakali kukonzyeka buti kuli Jehova kulekelela zibi kacitanapegwa cinunuzyo pele alimwi kaambwa kuti ngu Leza uuyandisya bululami?

Jehova wakasyomezya kupa “lunyungu” ilwakali kuyoonununa baabo ibakali kuyooba alusyomo mulinguwe amuzisyomezyo zyakwe. Aboobo ciindi naakaamba cisyomezyo eeci, cakali mbuli kuti wacipa kale cinunuzyo. (Matl. 3:15; 22:18) Leza wakalisinizyide ncobeni kuti muciindi cakwe cibikkidwe, Mwanaakwe simuzyalwaalikke wakali kuyoolisungula kupa cinunuzyo. (Gal. 4:4; Heb. 10:​7-10) Ciindi Jesu naakali waano anyika, Jehova wakamupa nguzu zyakulekelela zibi kacitanapegwa cinunuzyo. Aboobo Jesu wakali kukonzya kubalekelela zibi aabo ibakajisi lusyomo nkaambo wakalizyi kuti, cinunuzyo ncaakali kuyoopa cakali kuyoozivwumba zibi zyabo.—Mt. 9:​2-6.