Mutazwi mu Paradaiso Yakumuuya

1. Ino paradaiso yakumuuya ninzi? Alimwi tweelede kuba amakanze nzi?

MAZUBA aano, kuli paradaiso yacikozyanyo anyika imuli bantu banji bajisi bubi kucita zintu zibotu. Izwide bantu banji kapati ibajisi luumuno lwini-lwini. Aabo ibakanjila kale muparadaiso eeyi balikanzide kutazwa mulinjiyo. Alimwi bayanda kuti bantu banji babasangane. Kubasangana kuli? Muparadaiso yakumuuya!a

2. Ncinzi cikkomanisya kujatikizya paradaiso yakumuuya?

² Munzila yaalubazu, Jehova wapanga paradaiso yakumuuya mwalo bantu bakwe mobali muluumuno alimwi mobakamantene, nokuba kuti bakkala munyika ya Saatani mbyaabi, iizwide bantu batayandani. (1Joh. 5:19; Ciy. 12:12) Leza wesu siluyando ulabubona bweende bwazintu oobu mbobubanyonganya bantu, pele ulabakwabilila babelesi bakwe kutegwa bazumanane kumubelekela kumwi kabakkomene. Ijwi lyakwe lyaamba paradaiso yakumuuya kuti mbusena bukwabilidwe ‘bwakutijila’ akuti “muunda uutilailwa kabotu.” (Is. 4:6; 58:11) Kwiinda mukulongezyegwa a Jehova, aabo bapona muparadaiso eeyi balikkomene alimwi akulimvwa kukwabililwa muziindi eezyi zikatazya zyamazuba aamamanino.—Is. 54:14; 2Tim. 3:1.

3. Ino businsimi buli kulugwalo lwa Isaya caandaano 65 bwakazuzikizyigwa buti ciindi cakusaanguna?

³ Kwiinda mumusinsimi Isaya, Jehova wakapandulula mbobanoopona bantu muparadaiso yakumuuya. Mulakonzya kubujana bupanduluzi oobu ku Isaya caandaano 65, bwalo ibwakazuzikizyigwa ciindi cakusaanguna mu 537 B.C.E. Aciindi eeco, ba Juda ibakeempwa bakaangununwa kuzwa mubuzike ku Babuloni akupiluka kumunzi wabo. Jehova wakabalongezya bantu bakwe akubagwasya kubambulula munzi wa Jerusalemu iwakanyonyookede, akupa kuti tempele bube busena bwakukombela Jehova alimwi mu Israyeli.—Is. 51:11; Zek. 8:3.

4. Ino businsimi buli kulugwalo lwa Isaya caandaano 65 buzuzikizyigwa buti mazuba aano?

⁴ Kuzuzikizyigwa kwabili kwabusinsimi bwa Isaya kwakatalika mu 1919 C.E. ciindi bakombi ba Jehova bamazuba aano nobakaangununwa mubuzike bwa Babuloni Mupati. Kumane paradaiso yakumuuya yakatalika kuyaabukomena mumasena oonse aamunyika. Basikwaambilizya Bwami bakatalisya mbungano zinji alimwi akutondezya bube bwa Bunakristo. Bamaalumi alimwi abamakaintu ibakali basinkondo alimwi ibatakali kulilemeka ‘bakasama buntu bupya ibwakalengwa kweelana akuyanda kwa Leza.’(Ef. 4:24) Bwini mbwakuti, bunji bwazilongezyo nzyaakaamba Isaya ziyoozuzikizyigwa cacigaminina munyika mpya iiboola. Pele noliba lino, tulagwasyigwa munzila zinji aparadaiso yakumuuya. Lino atubandike mbotugwasyigwa aparadaiso yakumuuya alimwi akaambo ncotuteelede kuzwa mulinjiyo.

MBOBABEDE AABO BALI MUPARADAISO YAKUMUUYA

5. Kweelana acisyomezyo cili kulugwalo lwa Isaya 65:​13, ncinzi citukkomanisya kujatikizya paradaiso yakumuuya?

⁵ Basaninwa kabotu akukatalusyigwa. Businsimi bwa Isaya bulapandulula kwiindana kupati kuliko akati kabaabo ibali muparadaiso yakumuuya alimwi abaabo batali mulinjiyo. (Amubale Isaya 65:13.) Jehova cabwaabi, wabapa zintu zyoonse nzyobayandika babelesi bakwe kutegwa bazumanane kuba acilongwe ciyumu anguwe. Tulijisi muuya wakwe uusalala, Jwi lyakwe alimwi acakulya cakumuuya cinji kutegwa katukonzya ‘kulya, . . . kunywa, . . . alimwi akusekelela.’ (Amweezyanisye Ciyubunuzyo 22:17.) Mukwiimpana, aabo ibatali muparadaiso yakumuuya ‘balafwa nzala . . . , balafwa nyota . . . , akufwa nsoni.’ Tabajisi cilongwe a Leza.—Am. 8:11.

6. Nzintu nzi nzyatupa Jehova izyaambidwe kulugwalo lwa Joeli 2:​21-24? Alimwi mbuti mbotugwasyigwa anzizyo?

⁶ Mubusinsimi bwakwe, Joeli wakabelesya zintu ziyandika kapati kutegwa tuzumanane kupona, zintu mbuli maila, waini amafwuta aamaolifa kutondezya kuti Jehova ulabapa nzyobayandika bantu bakwe, kubikkilizya acakulya cakumuuya. (Joel. 2:​21-24) Ulacita oobo kwiinda mu Bbaibbele, mabbuku eesu aayeeme a Bbaibbele, webbusaiti yesu, miswaangano yambungano, yabbazu alimwi ayacooko. Tulalya cakulya cakumuuya abuzuba, akaambo kaceeci, kunyina notufwa nzala alimwi tulakatalusyigwa.

7. Ncinzi citupa ‘kukkomana mumoyo’? (Isaya 65:14)

⁷ Balikkomene alimwi akukkutila. Bantu ba Leza balakonzya ‘koongolola cakukondwa’ akaambo kakuti balalumba kapati kuzintu nzyabacitila Jehova. (Amubale Isaya 65:14.) Kasimpe kakulwaizya zisyomezyo zili mu Jwi lya Leza alimwi abulangizi bwakumbele buyumu iziyeeme acinunuzyo ca Kristo zitupa ‘kukkomana mumoyo.’ Kubandika zintu zili boobu abakwesu abacizyi citupa kukkomana kapati!—Int. 34:8; 133:​1-3.

8. Ino nzintu nzi zyobilo ziyandika kapati izili muparadaiso yakumuuya?

⁸ Luyando alimwi alukamantano iluli akati kabantu ba Jehova nzintu zyobilo ziyandika kapati izitondezya mboibede paradaiso yakumuuya. “Caanzyo calukamantano” eeci citupa kweezeezya buumi mbobunoobede munyika mpya, mwalo bantu ba Jehova mobanooyandana akukamantana kapati kwiinda mbocibede mazuba aano. (Kol. 3:14) Mucizyi umwi wakaamba ncaakabona kujatikizya bantu ba Jehova naakabonana ambabo ciindi cakusaanguna. Wakaamba kuti: “Kunyina nondakazyi mbondakali kukonzya kuba alukkomano, nomuba mumukwasyi wangu. Ciindi cakusaanguna nondakazyiba bantu bayandana ncobeni cakali ciindi nondakabonana a Bakamboni ba Jehova.” Kuti muntu kayanda kukkomana ncobeni alimwi akukkutila, weelede kuba muparadaiso yesu yakumuuya. Tacikwe makani abantu mbobababona babelesi ba Jehova, bajisi zina libotu kulinguwe alimwi akumukwasyi wakwe waanyika.—Is. 65:15.

9. Ino lugwalo lwa Isaya 65:​16, 17 lutusyomezya nzi kujatikizya zintu zitupenzya?

⁹ Baliliibide alimwi akubatama. Lugwalo lwa Isaya 65:14 lwaamba baabo ibatali muparadaiso yakumuuya kuti ‘balalila akaambo kakucisa kwamyoyo yabo alimwi baloomoka akaambo kamuuya uuside.’ Pele mbuti kujatikizya zintu zyoonse zipa bantu ba Leza kupenga? Kumbele, zintu zyoonse eezyi ‘ziyoolubwa alimwi ziyoosiswa kumeso aa [Leza].’ (Amubale Isaya 65:​16, 17.) Jehova uyakwaagusya mapenzi eesu alimwi aciindi cimwi tuyakwaaluba cakumaninina.

10. Nkaambo nzi ncomulimvwa kuti ncilongezyo kuyanzana abakwesu abacizyi? (Amubone acifwanikiso.)

¹⁰ Noliba lino tulaliiba kapati ciindi notuli kumiswaangano yesu ya Bunakristo akuleka kubikkila maano kumapenzi aali munyika eeyi mbyaabi. Alimwi tulabagwasya bakwesu abacizyi kuliiba ciindi notubatondezya luyando, lukkomano, luzyalo alimwi akubomba moyo zyalo zili ncibeela camuuya wa Leza. (Gal. 5:​22, 23) Eelo kaka tulaacoolwe cilibedelede kuba mumbunga ya Leza! Aabo ibazumanana kuba muparadaiso yakumuuya, bayoolibonena mbociyoozuzikizyigwa cakumaninina cisyomezyo ca Leza cijatikizya “majulu mapya anyika mpya.”

11. Kweelana alugwalo lwa Isaya 65:​18, 19, mbuti mbotujatikizyigwa aparadaiso yakumuuya njaakabamba Jehova?

¹¹ Balalumba alimwi balikkomene. Isaya wakapandulula kaambo ncotweelede ‘kusekelela akukondwa’ muparadaiso yakumuuya. Jehova ngowakatalisya paradaiso eeyi yakumuuya. (Amubale Isaya 65:​18, 19.) Aboobo tacigambyi kuti Jehova ubelesya ndiswe kugwasya bantu kusiya mbunga zyamunyika eeyi, zyalo zitayiisyi kasimpe kajatikizya Leza alimwi akugwasya bantu kuba muparadaiso yakumuuya. Tulikkomene kapati kujatikizya zilongezyo nzyotujisi akaambo kakuzyiba kasimpe, aboobo eeci citupa kwaambila bamwi kujatikizya nzizyo.—Jer. 31:12.

12. Ino zisyomezyo izili kulugwalo lwa Isaya 65:​20-24 zimupa kulimvwa buti? Alimwi nkaambo nzi?

¹² Tulikkomene alimwi akulumba kubulangizi mbotujisi akaambo kakuba muparadaiso yakumuuya. Amuyeeye buyo kujatikizya zintu zyoonse nzyotuyoobona alimwi akucita munyika mpya ya Leza! Bbaibbele lisyomezya kuti: “Takukabi limbi mwana muvwanda uupona buyo mazuba masyoonto . . . naba mudaala waalilwa kupona mazuba aabuumi bwakwe.” ‘Tuyooyaka maanda akukkala mulingawo, tuyoosyanga myuunda yamisaansa akulya micelo yanjiyo.’ ‘Tatukabelekeli maliminya pe’ nkaambo ‘tunoolelekedwe a Jehova.’ Utusyomezya kuyoopona buumi bukkomanisya alimwi bulaampindu. ‘Katutanaita’ uyoozyiba nzyayandika umwi aumwi wesu alimwi “akukkutya cilenge coonse cipona kwiinda mukucipa ncociyanda.”—Is. 65:​20-24; Int. 145:16.

13. Mbuti lugwalo lwa Isaya 65:25 mbolutondezya kucinca nkobapanga bantu bamwi ciindi nobatalika kubelekela Jehova?

¹³ Bali muluumuno alimwi balikwabilidwe. Kwiinda mukugwasyigwa amuuya wa Leza, banji ibakali basinkondo, bakali alimwi batakali kusyomeka bakapanga kucinca kupati mubuumi bwabo. (Amubale Isaya 65:25.) Bakabeleka canguzu kuleka bube bwabo bubyaabi. (Rom. 12:2; Ef. 4:​22-24) Masimpe ngakuti, bantu ba Leza tabalondokede, aboobo tunoolubizya. Nokuba boobo, Jehova wabakamantanya ‘bantu boonse,’ ibamuyanda alimwi batondezyanya luyando. Eeci capa kuti kube luumuno alukamantano. (Tit. 2:11) Leza singuzuzyoonse, ngonguwe alikke uukonzya kucita cintu cili boobu!

14. Ino lugwalo lwa Isaya 65:25 lwakazuzikizyigwa buti mubukkale bwamukwesu umwi?

¹⁴ Sena masimpe kuti bantu balakonzya kucinca bube bwabo? Amubone cakuluula eeci. Mukubusi umwi wakali kuvwula kwaangwa kusikila ciindi naakakkwanya myaka iili 20, wakali kujatikizyigwa kapati mukutalilemeka alimwi amunkondo. Wakali kwaangwa akaambo kakubba myoota, kubba mumaanda alimwi akucita milandu iimbi mipati. Wakalilibambilide kulwana amuntu uuli woonse. Ciindi cakusaanguna naakamvwa kasimpe kamu Bbaibbele alimwi akutalika kujanika kumiswaangano ya Bakamboni ba Jehova, wakabona kuti wajana cintu cimwi mubuumi, nkokuti kukomba Jehova muparadaiso yakumuuya. Naakabbapatizyigwa, bunji bwaziindi wakali kuyeeya kujatikizya lugwalo lwa Isaya 65:25 mbolwakazuzikizyigwa mubukkale bwakwe. Wakacinca akuleka kuba mbuli syuumbwa, wakaleka kuba sinkondo, muciindi caboobo wakaba mbuli mwanaambelele, wakaba siluumuno.

15. Nkaambo nzi ncotweelede kubatamba bamwi kuti batusangane muparadaiso yakumuuya? Mbuti mbotukonzya kucita oobo?

¹⁵ Lugwalo lwa Isaya 65:13 lulatalika amajwi aakuti: “Mboobu mbwaamba Mwami Singuzuzyoonse Jehova.” Mpoonya kapango 25 kalamana amajwi aakuti “mbwaamba Jehova.” Zisyomezyo zyakwe lyoonse zilazuzikizyigwa. (Is. 55:​10, 11) Paradaiso yakumuuya nkoili kale lino. Jehova wakapanga mukwasyi wabakombi bakwe uulibedelede. Akaambo kakuti tuli cibeela camukwasyi ooyu, tulijisi luumuno lunji lino alimwi tulimvwa kukwabililwa munyika eeyi iizwide nkondo. (Int. 72:7) Akaambo kaceeci, tuyanda kugwasya bantu banji kutegwa batusangane mubunyina bwanyika yoonse bwa Bunakristo. Tulakonzya kucita oobo kwiinda mukubikkila maano kugwasya bantu kuba basikwiiya.—Mt. 28:​19, 20.

MBOTUKONZYA KUKWELELEZYA BAMWI KUPARADAISO YAKUMUUYA

16. Ncinzi cipa kuti bantu bakwelelezyegwe kuparadaiso yakumuuya?

¹⁶ Umwi aumwi wesu ulijisi lubazu lupati mukupa kuti paradaiso yakumuuya kaikwelelezya. Tulakonzya kucita oobo kwiinda mukwiiya Jehova. Kunyina nabasinikizya bantu kuti babe cibeela cambunga yakwe. Muciindi caboobo, ‘ulabakwela’ kulinguwe munzila yaluyando. (Joh. 6:44; Jer. 31:3) Bantu babombe moyo ibaiya kujatikizya luyando ndwajisi Jehova alimwi abube bwakwe bubotu, balakwelelezyegwa kulinguwe kakunyina kusinikizyigwa. Mbuti bube bubotu alimwi abukkale bwesu mbobukonzya kukwelelezya bamwi kuparadaiso yakumuuya?

17. Mbuti mbotukonzya kukwelelezya bamwi kuparadaiso yakumuuya?

¹⁷ Nzila imwi mbotukonzya kukwelelezya bamwi kuparadaiso yakumuuya nkwiinda mukweendelezya bakombima caluyando. Ciindi bapya nobajanika kumiswaangano, tuyanda kuti kabalimvwa mbuli mbobakalimvwa aabo batakali basyomi ibakali kujanika kumiswaangano ku Korinto. Bakaamba kuti: “Ncobeni Leza mpali akati kanu.” (1Kor. 14:​24, 25; Zek. 8:23) Aboobo, tweelede kuzumanana kulutobela lulayo ‘lwakukkala muluumuno umwi amweenzinyina.’—1Tes. 5:13.

18. Ncinzi cikonzya kukwelelezya bantu kumbunga yesu?

¹⁸ Lyoonse tweelede kubona bakwesu abacizyi mbuli mbwababona Jehova. Tulacita oobo kwiinda mukubikkila buyo maano kubube bubotu mbobajisi ikutali kukutalondoka kwabo, kwalo kuyoomana kumbele. Tulakonzya kukumana kutamvwana kuli koonse munzila yaluyando kwiinda ‘mukufwidilana luzyalo, kuba amoyo mutete walubomba, akulekelelana camoyo woonse.’ (Ef. 4:32) Mpoonya bantu ibayanda kweendelezyegwa munzila eeyi yaluyando, bayookwelelezyegwa kuparadaiso yakumuuya.b

MUTAZWI MUPARADAISO YAKUMUUYA

19. (a) Kweelana ambokatondezya kabbokesi kakuti “Bakazwa Akupiluka Alimwi,” ncinzi ncobakaamba bamwi nobakapiluka muparadaiso yakumuuya? (b) Ino tweelede kuba amakanze nzi? (Amubone acifwanikiso.)

¹⁹ Eelo kaka tulalumba kapati akaambo kaparadaiso yesu yakumuuya! Nimbotu kapati kwiinda kaindi, alimwi izwide basikutembaula Jehova banji kwiinda kaindi. Atuzumanane kutondezya kulumba kuparadaiso eeyi Jehova njaatubambila. Kufwumbwa uuyanda kukatalusyigwa, kukkutila, kubatama alimwi akulimvwa kukwabililwa weelede kunjila muparadaiso yakumuuya akuzumanana kukkala mulinjiyo! Pele tweelede kucenjela, nkaambo Saatani uluujisi kucita kufwumbwa ncakonzya kutegwa tuzwe mulinjiyo. (1Pet. 5:8; Ciy. 12:9) Tatweelede kumuzumizya kutuzunda. Atubeleke canguzu kukwabilila kweebeka, kusalala alimwi aluumuno luli muparadaiso eeyi yakumuuya.