Ncinzi Ncotuzyi Kujatikizya Jehova Mbwayoobabeteka Bantu Kumbele?

1. Nkaambo nzi ncotwaambila kuti tupona muciindi cikkomanisya kapati?

TUPONA muciindi cikkomanisya kapati! Buzuba abuzuba, tulalibonena businsimi bwamu Bbaibbele kabuzuzikizyigwa. Mucikozyanyo, tulabona “mwami wakunyika” alimwi ‘amwami wakumusanza’ kabazundana akaambo kakuyanda kweendelezya nyika. (Dan. 11:40) Tulabona makani mabotu aa Bwami bwa Leza kaakambaukwa munyika yoonse, alimwi bantu banji kapati basala kubelekela Jehova. (Is. 60:22; Mt. 24:14) Alimwi tulatambula cakulya cakumuuya cinji “aciindi ceelede.”—Mt. 24:​45-47.

2. Ncinzi ncotuli masimpe kuti ciyoocitika? Pele ino ncinzi ncotweelede kuzyiba?

² Jehova wazumanana kutugwasya kumvwisya mboziyandika kapati zintu ziyoocitika ino-ino. (Tus. 4:18; Dan. 2:28) Tuli masimpe kuti kusikila ciindi naayootalika mapenzi mapati, tuyoozizyiba zyoonse nzyotuyandika kuzyiba kutegwa tukaliyumye cakusyomeka alimwi buya akuzumanana kukamantana muciindi eeco cinookatazya kapati. Nokuba boobo, tweelede kuzyiba kuti kuli zintu nzyotutazyi kujatikizya zintu zyakumbele. Aboobo mucibalo eeci, tulasaanguna kulanga-langa kaambo ncokwaba kucinca kujatikizya zintu zimwi nzyotwakaambide. Mpoonya tulalanga-langa zintu zimwi nzyotuzyi kujatikizya zintu zyakumbele alimwi antaamu njayoobweza Taateesu wakujulu.

NZYOTUTAZYI

3. Ncinzi ncotwakali kwaamba kujatikizya bantu batasyomi aakutalika mapenzi mapati? Nkaambo nzi ncotwakali kwaambila boobo?

³ Musyule twakali kwaamba kuti aakutalika mapenzi mapati, kunyina muntu uutasyomi uyoopegwa coolwe cakuzyiba Jehova akufwutuka lyankondo ya Armagedoni. Twakaambide boobo akaambo kakuti twakali kuyeeya kuti makani aamba zya Zambangulwe bwakali businsimi. Mucikozyanyo, twakali kuyeeya kuti mbubwenya Jehova mbwaakaujala mulyango kalitanatalika Zambangulwe, acalo ciindi aakutalika mapenzi mapati uyakuujala mulyango, calo ciyoopa kuti bantu bambi batakafwutuki.—Mt. 24:​37-39.

4. Nkaambo nzi lino ncotutacaambi makani aajatikizya Zambangulwe kuti mbusinsimi? Amupandulule.

⁴ Sena makani aajatikizya Zambangulwe tweelede kwaabona kuti bwakali businsimi? Peepe. Nkaambo nzi? Akaambo kakuti Bbaibbele kunyina nolyaamba oobo.a Masimpe kuti Jesu wakakozyanisya “mazuba aa Nowa” kuciindi cakubako kwakwe. Pele kunyina naakaamba kuti zintu zyoonse izyakacitika muciindi ca Nowa zyakali kuyoozuzikizyigwa alimwi kumbele, mbuli ciindi Jehova naakajala mulyango wabwato. Nokuba boobo, eeci tacaambi kuti kunyina ncotukonzya kwiiya kucibalo cijatikizya Nowa alimwi a Zambangulwe.

5. (a) Ino nintaamu nzi Nowa njaakabweza Zambangulwe kalitanasika? (Bahebrayo 11:7; 1 Petro 3:20) (b) Ino mulimo wesu wakukambauka ukozyenye buti amulimo ngwaakali kucita Nowa?

⁵ Ciindi Nowa naakamvwa mulumbe wa Jehova wakucenjezya, wakatondezya kuti wakalijisi lusyomo kwiinda mukuyaka bwato. (Amubale Bahebrayo 11:7; 1 Petro 3:20.) Mbubwenya buyo, bantu ibamvwa makani mabotu aa Bwami bwa Leza beelede kubweza ntaamu akutalika kupona kweelana anzyobaiya. (Mil. 3:​17-20) Petro wakaamba Nowa kuti wakali “mukambausi wabululami.” (2Pet. 2:5) Nokuba boobo, kweelana acibalo cainda, tatuzyi kuti naa Nowa aaciindi eeco wakapanga bubambe bwakukambaukila bantu boonse anyika Zambangulwe kalitanasika. Mazuba aano, tulasolekesya kukambaukila bantu boonse munyika alimwi tulacita oobo cabusungu. Pele nokuba kuti twasolekesya buti, tatukonzyi kubakambaukila makani mabotu bantu boonse mamanino kaatanasika. Nkaambo nzi?

6-7. Nkaambo nzi ncotukonzya kwaamba kuti tatukacikonzyi kwaambila muntu uli woonse makani mabotu mamanino kaatanasika? Amupandulule.

⁶ Atubone ncaakaamba Jesu kujatikizya mulimo wesu wakukambauka. Wakasinsima kuti makani mabotu akali kuyookambaukwa “munyika yoonse kuti bukabe bumboni kumasi oonse.” (Mt. 24:14) Businsimi oobu buli mukuzuzikizyigwa mazuba aano kwiinda kaindi. Mulumbe wa Bwami uli mukumwaigwa mumyaambo yiinda ku 1,000 alimwi kwiinda mukubelesya webbusaiti yesu ya jw.org, bantu banji nyika yoonse balaamvwa makani mabotu aa Bwami bwa Leza.

⁷ Nokuba boobo, alimwi Jesu wakaambila basikwiiya bakwe kuti ‘tiibakali kuyoomanizya kuzinguluka minzi,’ naa kukambaukila bantu boonse katanaboola. (Mt. 10:23; 25:​31-33) Eeci ncaakaamba Jesu ciyoocitika amumazuba eesu. Bantu banji mazuba aano bakkala mumasena mulimo wakukambauka moulesyedwe. Kuyungizya waawo, muminiti yomwe buyo kuli bana banji bazyalwa. Aboobo, tulacita kufwumbwa ncotukonzya kutegwa twaambilizye makani mabotu kubantu bazwa ‘kumasi oonse, kumisyobo yoonse, akumilaka yoonse.’ (Ciy. 14:6) Pele masimpe ngakuti tatukacikonzyi kwaambila muntu uli woonse makani mabotu mamanino kaatanasika.

8. Mubuzyo nzi ngotukonzya kulibuzya kujatikizya Jehova mbwayoobeteka bantu kumbele? (Amubone acifwanikiso.)

⁸ Pele lino inga twabuzya kuti: Ino Jehova a Jesu bayoobalanganya buti aabo ibatakabi acoolwe cakumvwa makani mabotu kaatanasika mapenzi mapati? (Joh. 5:​19, 22, 27; Mil. 17:31) Lugwalo aayeeme cibalo eeci lwaamba kuti Jehova “tayandi kuti muntu uuli woonse anyonyoonwe.” Muciindi caboobo, uyanda kuti “boonse bakonzye kweempwa.” (2Pet. 3:9; 1Tim. 2:4) Nokuba kuti tulizizyi zintu eezyi kujatikizya Jehova, tanatwaambila mbwayoobabeteka bantu ibatakaba acoolwe cakumvwa makani mabotu. Alimwi buya, tayelede kutwaambila zintu zyoonse nzyaakacita naa nzyayoocita.

9. Ncinzi Jehova ncaatwaambila kwiinda mu Jwi lyakwe, Bbaibbele?

⁹ Mu Jwi lyakwe, Jehova watwaambila zintu zimwi nzyayoocita. Mucikozyanyo, Bbaibbele litwaambila kuti uyoobabusya bantu “bataluleme” balo ibatakaba acoolwe cakumvwa makani mabotu akucinca bukkale bwabo. (Mil. 24:15; Lk. 23:​42, 43) Pele eeci cipa kubuzya mubuzyo uumwi uyandika kapati.

10. Ino mibuzyo nzi aimbi njotukonzya kubuzya?

¹⁰ Sena boonse aabo ibayoofwa lyamapenzi mapati tabanoojisi bulangizi bwabubuke? Magwalo alaamba cakusalazya kuti basikukazya boonse aabo mbayoonyonyoona Jehova lyankondo ya Armagedoni tabakabusyigwi pe. (2Tes. 1:​6-10) Pele mbuti kujatikizya bantu bamwi? Mucikozyanyo, bamwi ambweni bayoofwa lyamapenzi mapati akaambo kakuciswa naa kucembaala, bamwi akaambo kakuba muntenda naa kujaigwa buya abantunyina. (Muk. 9:11; Zek. 14:13) Sena bamwi banooli akati kabantu “bataluleme” ibayoobusyigwa munyika mpya? Tatuzyi pe.

NZYOTUZYI

11. Ino lubeta lwabantu lunooyeeme anzi?

¹¹ Tulizyi makani manji kujatikizya zintu ziyoocitika kumbele. Mucikozyanyo, tulizyi kuti bantu bayoobetekwa kweelana ambobakabeendelezya banabokwabo Kristo. (Mt. 25:40) Aabo bayoobetekwa kuba mbelele banooli bakabagwasyilizya kale bananike a Kristo. Alimwi tulizyi kuti banabokwabo Kristo banoocili anyika aakutalika mapenzi mapati, akuti tabakaunki kujulu kusikila mane yaakuyanda kutalika nkondo ya Armagedoni. Kufwumbwa buyo kuti banabokwabo Kristo kabacili anyika, kweelede kuti bantu babombe myoyo bacinoojisi coolwe cakubagwasyilizya balo alimwi amulimo ngobacita. (Mt. 25:​31, 32; Ciy. 12:17) Nkaambo nzi twaambo ootu twamasimpe ncotuyandika kapati?

12-13. Ino bantu bamwi bayoocita buti baakubona kunyonyoonwa kwa “Babuloni Mupati”? (Amubone azifwanikiso.)

¹² Nociba ciindi mapenzi mapati aakutalika, kweelede kuti bantu banji ibayoobona kunyonyoonwa kwa “Babuloni Mupati” bayooyeeya kuti kwamyaka minji Bakamboni ba Jehova bakalaambide kuti eeci ciyoocitika. Sena bantu bamwi ibayoobona kunyonyoonwa kwa “Babuloni Mupati” bayootalika kusyoma Jehova?—Ciy. 17:5; Ezk. 33:33.

¹³ Ikuti cintu cili boobu cikacitike, cinooli mbuli ceeco cakacitika ku Egepita mumazuba aa Musa. Amuyeeye kuti “nkamu mpati yabantu bamisyobo-misyobo” yakasangana bana Israyeli nobakali kuzwa mu Egepita. Bamwi akati kabo ambweni bakatalika kusyoma Jehova ciindi nobakabona kuti kucenjezya kwa Musa kujatikizya Zipenzyo Zili 10 kwacitika ncobeni. (Kul. 12:38) Ikuti cili boobu caakucitika aakunyonyoonwa Babuloni Mupati, sena tuyootyompwa kuti bamwi baakutusangana kwaakucaala buyo ciindi cisyoonto kuti Armagedoni italike? Peepe! Tuyanda kwiiya Taateesu wakujulu, “Leza siluse alimwi silweetelelo, uutafwambaani kukalala alimwi uuzwide luyando lutamani akasimpe.”b—Kul. 34:6.

14-15. Sena kupona kwamuntu mane kukabe kutamani kuyeeme aciindi ncaakafwa naa busena nkwakkala? Amupandulule. (Intembauzyo 33:​4, 5)

¹⁴ Zimwi ziindi tulamvwa bantu kabaamba kuti, “Kubota wamukwasyi wangu wafwa kaatanatalika mapenzi mapati kutegwa akabe abulangizi bwabubuke.” Inga kabajisi makanze mabotu nobaamba boobu. Pele kupona kwamuntu mane kukabe kutamani takuyeeme aciindi ncayoofwa. Jehova mubetesi uulondokede, usala munzila iiluzi alimwi cabululami (Amubale Intembauzyo 33:​4, 5.) Tulakonzya kuba masimpe kuti “mubetesi wanyika yoonse” uyoocita ciluzi.—Matl. 18:25.

¹⁵ Alimwi ncabusongo kwaamba kuti kupona kwamuntu mane kukabe kutamani kunyina nokuyeeme abusena nkwakkala. Jehova kunyina nayoobeteka mamiliyoni aabantu kuba mpongo akaambo buyo kakuti bakkala mumasena mobatakajisi coolwe cakutambula mulumbe wa Bwami. (Mt. 25:46) Mubetesi wanyika yoonse ulababikkila kapati maano bantu bali boobu kwiinda mbotuyeeya. Tatuzyi Jehova mbwayoocinca zintu lyamapenzi mapati. Ambweni bantu bamwi bali boobu bayooba acoolwe cakwiiya kujatikizya Jehova, kumusyoma alimwi akuba kulubazu lwakwe ciindi aakusalazya zina lyakwe kumasi woonse.—Ezk. 38:16.

16. Ino ncinzi ncotwazyiba kujatikizya Jehova? (Amubone acifwanikiso.)

¹⁶ Kwiiya Bbaibbele kwatugwasya kuzyiba kuti bantu balayandika kapati kuli Jehova. Wakaaba buumi bwa Mwanaakwe kutegwa toonse tube abulangizi bwakuyoopona mane kukabe kutamani. (Joh. 3:16) Toonse twalibonena mbwatuyanda kapati Jehova. (Is. 49:15) Ulituzyi mazina eesu toonse. Alimwi buya, ulituzyi kabotu cakuti naa twafwa, ulakonzya kutubusya nkaambo ulayeeya bwini mbotwakabede azintu zyoonse nzyotwakali kuyeeya! (Mt. 10:​29-31) Cakutadooneka, tulijisi twaambo tubotu itweelede kutupa kusyoma kuti Taateesu wakujulu siluyando uyoomubeteka muntu umwi aumwi munzila iilondokede, cabululami alimwi akumufwida luse.—Jak. 2:13.

17. Ncinzi ncotuyoobandika mucibalo citobela?

¹⁷ Mbwaanga lino twakumvwisya kucinca ooku, twabona mboubindide kapati mulimo wakukambauka. Nkaambo nzi ncotwaambila boobo? Alimwi ncinzi citukulwaizya kuzumanana kukambauka makani mabotu cabusungu? Mibuzyo eeyi tuyakuyiingula mucibalo citobela.