Sena Mulikazyi Kasimpe?

1. Ino mulimvwa buti kujatikizya kasimpe?

BANTU ba Jehova balakayanda kasimpe kajanika mu Jwi lya Leza. Lusyomo lwesu luyeeme alinkako. (Rom. 10:17) Twakasinizya kuti Jehova wakapanga mbungano ya Bunakristo kuba “imusemu alimwi cisiko cakasimpe.” (1Tim. 3:15) Alimwi calukkomano tulabamvwida “aabo basololela” akati kesu ciindi nobapandulula kasimpe kazwa mu Bbaibbele alimwi akupa busolozi bweendelana akuyanda kwa Leza.—Heb. 13:17.

2. Kweelana alugwalo lwa Jakobo 5:​19, ncinzi cikonzya kutucitikila notwamana kwiiya kasimpe?

² Nokuba boobo, twamana kwiiya kasimpe akuzumina kuti tweelede kutobela busolozi buzwa kumbunga ya Leza, tulakonzya kweenwa. (Amubale Jakobo 5:19.) Pele Saatani uyanda kuti tuleke kusyoma Bbaibbele naa busolozi buzwa kumbunga ya Leza.—Ef. 4:14.

3. Nkaambo nzi ncotweelede kukakatila kukasimpe? (Baefeso 6:​13, 14)

³ Amubale Baefeso 6:​13, 14. Lino-lino, Diabolosi uyooyunga bantu banji kapati kwiinda mukubelesya makani aakubeja kutegwa bazangile bweendelezi bwa Jehova. (Ciy. 16:​13, 14) Alimwi tulizyi kuti Saatani uyoobeleka canguzu kapati kuyunga bantu ba Jehova. (Ciy. 12:9) Nkakaambo kaako, cilayandika kapati kuliyiisya akubona kwiindana kuliko akati kakasimpe abubeji, akuzumanana kukakatila kukasimpe. (Rom. 6:17; 1Pet. 1:22) Lyamapenzi mapati lufwutuko lwesu lunooyeme akucita boobo!

4. Ncinzi ncotutiilange-lange mucibalo eeci?

⁴ Mucibalo eeci, tulabandika bube bobilo ibukonzya kutugwasya kutegwa tuzyibe kasimpe kamu Bbaibbele alimwi akutambula busolozi buzwa kumbunga ya Leza. Kumane tulabandika twaambo totatwe tukonzya kutugwasya kutegwa tukakatile kukasimpe.

BUBE MBOTWEELEDE KUBA AMBUBO KUTEGWA TUKAZYIBE KASIMPE

5. Ino kuyoowa Jehova kutugwasya buti kuzyiba kasimpe?

⁵ Kuyoowa Jehova. Kuyoowa Jehova caamba kumuyanda alimwi akutacita cintu cili coonse cikonzya kumunyemya. Tuliyandide kwiiya kwiindana kuliko kujatikizya ciluzi acitaluzi, kasimpe alimwi abubeji, kutegwa tutambulike kuli Jehova. (Tus. 2:​3-6; Heb. 5:14) Tatweelede kuciindizya kuyoowa bantu kwiinda mbotuyanda Jehova. Ikuti twacita oobo inga twakkomanisya bantu, alimwi buya kanji-kanji zintu zikkomanisya bantu tazimukkomanisyi Jehova.

6. Mbuti kuyoowa bantu mbokwakapa basikutwela bali 10 kutaamba masimpe?

⁶ Kuti katubayoowa kapati bantu kwiinda mbotuyoowa Leza, tulakonzya kukasiya kasimpe. Amuyeeye kujatikizya cikozyanyo cabasikutwela bali 12, ibakaunka kuyootwela nyika eeyo Jehova njaakasyomezyede bana Israyeli. Basikutwela bali 10 bakabayoowa kapati bana Kanana kwiinda mbobakali kumuyanda Jehova. Bakaambila bana Israyelinyina kuti: “Tatukonzyi kuyoobalwana bantu aaba pe, nkaambo balaanguzu kwiinda ndiswe.” (My. 13:​27-31) Kuzilanga munzila yabuntu zintu, bana Kanana bakalaanguzu kapati kwiinda bana Israyeli. Pele kufwumbwa ooyo iwakali kwaamba kuti bana Israyeli bakali kuyoozundwa kuli basinkondonyina, kunyina naakali kuyeeya kujatikizya Jehova. Basikutwela aabo bali 10 bakeelede kubikkila maano kujatikizya Jehova ncaakali kuyanda kuti bana Israyeli bacite. Alimwi bakeelede kuzinzibala kuyeeya Jehova ncaakabacitilide kakutanainda ciindi cilamfwu. Mpoonya eeci nocakabagwasya kuzyiba kuti Jehova Singuzuzyoonse wakalijisi nguzu kapati kwiinda bana Kanana. Mukwiimpana abasikutwela aabo batasyomeki, Joshua alimwi a Kalebe bakali kuyanda kukkomaninwa a Jehova. Bakaambila bantu kuti: “Ikuti naa Jehova watukkomanina, masimpe uyootunjizya munyika eeyi akutupa njiyo.”—My. 14:​6-9.

7. Mbuti mbotukonzya kuzumanana kuyoowa Jehova? (Amubone acifwanikiso.)

⁷ Kutegwa tuzumanane kumuyoowa Jehova, tweelede kubikkila maano kuyanda kumukkomanisya lyoonse ciindi notupanga zyakusala. (Int. 16:8) Ciindi nomubala zibalo zyamu Bbaibbele, amulibuzye kuti, ‘Ikuti nondali mubukkale oobu, ino inga ndapanga cakusala cili buti?’ Mucikozyanyo, amweezeezye kuti nkomuli andinywe ciindi basikutwela bali 10 nobakali kwaamba kuti bana Israyeli balazundwa kubana Kanana. Sena nomwakaasyoma makani ngomwakamvwa akutalika kuyoowa bantu? Naa luyando ndomujisi kuli Jehova akuyanda kumukkomanisya nolwali lupati kwiinda kuyoowa bantu? Izyalani lyoonse lyabana Israyeli kunyina nolyakasyoma kuti Joshua a Kalebe bakali kwaamba masimpe. Akaambo kaceeci, bakasweekelwa coolwe cakunjila Munyika Yakasyomezyedwe.—My. 14:​10, 22, 23.

8. Mbube nzi mbotweelede kubeleka canguzu kutegwa tube ambubo alimwi nkaambo nzi?

⁸ Kulicesya. Jehova ulakayubununa kasimpe kubantu balicesya. (Mt. 11:25) Kulicesya nkokwakatupa kukatambula kasimpe. (Mil. 8:​30, 31) Alimwi tuyandika kucenjela kutegwa tutataliki kulisumpula. Kuti twatalika kulisumpula tulakonzya kutalika kuyeeya kuti mizeezo yesu njabusongo kwiinda njiisyo zyamu Magwalo alimwi abusolozi mbotutambula kuzwa kumbunga ya Jehova.

9. Mbuti mbotukonzya kuzumanana kuba bantu balicesya?

⁹ Kutegwa tuzumanane kulicesya, tweelede kuyeeya mbotuli basyoonto kapati twalyeezyanisya a Jehova. (Int. 8:​3, 4) Alimwi tulakonzya kupaila kutegwa tube abube bwakulicesya. Jehova uyootugwasya kubona mboiyandika kapati mizeezo yakwe njotwakaiya mu Bbaibbele akumbunga yakwe kwiinda mizeezo yesu. Nomubala Bbaibbele, amubone Jehova mbwakuyanda kulicesya alimwi ambwakusulide kulisumpula. Amubikkile kapati maano kutegwa muzumanane kuba bantu balicesya ciindi nomwapegwa mikuli imwi iikonzya kulibonya mbuli kuti mwaba atala kwiinda bamwi.

MBUTI MBOTUKONZYA KUKAKATILA KUKASIMPE

10. Mbaani Jehova mbaakali kubelesya kupa busolozi kubantu bakwe?

¹⁰ Amuzumanane kusyoma busolozi ibuzwa kumbunga ya Jehova. Mu Israyeli yansiku, Jehova wakali kubelesya Musa kumane kumbele wakabelesya Joshua, ikutola mulumbe kubantu bakwe. (Jos. 1:​16, 17) Bana Israyeli bakali kulongezyegwa ciindi nobakali kubona bamaalumi aaba kuti bakali baiminizi ba Jehova Leza. Nokwakainda myaka minji ciindi mbungano ya Bunakristo noyakatalisyigwa, baapostolo bali 12 mbobakali kupa busolozi kubantu ba Leza. (Mil. 8:​14, 15) Kumbele, nkamu eeyi yakazyoobikkilizya abaalu mu Jerusalemu. Kwiinda mukutobela busolozi bwakali kupegwa abamaalumi aaba basyomeka, “bamumbungano eezyo bakazumanana kuyumizyigwa mulusyomo alimwi bakali kuyaabuvwula buzuba abuzuba.” (Mil. 16:​4, 5) Mazuba aano, andiswe tulalongezyegwa ciindi notutobela busolozi buzwa kumbunga ya Jehova. Pele ino Jehova inga walimvwa buti kuti twaalilwa kubamvwida aabo mbaakasala kuti kabatusololela? Kutegwa tujane bwiinguzi, atubandike cakacitika ciindi bana Israyeli nobakali kuunka Kunyika Yakasyomezyedwe.

11. Ncinzi cakabacitikila aabo ibatakamulemeka Musa, imuntu ngwaakasalide Jehova kusololela bantu bakwe? (Amubone acifwanikiso.)

¹¹ Aciindi cimwi bana Israyeli nobakali mulweendo kuunka Kunyika Yakasyomezyedwe, baalumi basalidwe basimpuwo bakamuzangila Musa alimwi akunyansya mukuli ngwaakamupede Jehova. Bakaamba kuti: “Bantu boonse mumbungano [kutali buyo Musa] balasalala alimwi Jehova mpali akati kabo.” (My. 16:​1-3) Nokuba kuti mumeso aa Leza “boonse mumbungano” bakali kusalala, Jehova wakasalide Musa kusololela bantu bakwe. (My. 16:28) Kwiinda mukufwubaazya Musa, bazangi aabo bakali kufwubaazya Jehova. Tiibakabikkila maano kujatikizya Jehova ncaakali kuyanda, pele bakabikkila maano kujatikizya ncobakali kuyanda balo, nkokuti kuba mubweendelezi alimwi akulijanina mpuwo. Leza wakabanyonyoona basololi babazangi aabo, kubikkilizya abantu banji kapati ibakasala kuba kulubazu lwabo. (My. 16:​30-35, 41, 49) Mazuba aano, tuli masimpe kuti Jehova tabakkomanini aabo ibatabulemeki bubambe bubikkidwe mumbunga yakwe.

12. Nkaambo nzi ncotweelede kwiisyoma mbunga ya Jehova?

¹² Tulakonzya kuzumanana kwiisyoma mbunga ya Jehova. Ciindi nokwayandika kuti kube kucinca mukumvwisya kasimpe kamwi kamu Bbaibbele naa cintu cimwi kujatikizya mbotumubelekela Jehova, aabo ibasololela kunyina nobawaya-waya kupanga kucinca. (Tus. 4:18) Balacita oobo akaambo kacintu cimwi cipati, nkokuti ikuyanda kukkomanisya Jehova. Alimwi balasolekesya kusikila mpobagolela kupanga zyakusala kweelana ancolyaamba Jwi lya Leza, iceelelo bantu ba Leza boonse ncobeelede kutobela.

13. Ino “ceelelo camajwi mabotu” ninzi? Alimwi ncinzi ncotweelede kucita kujatikizya ncico?

¹³ ‘Amuzumanane kukakatila kuceelelo camajwi mabotu.’ (2Tim. 1:13) “Ceelelo camajwi mabotu” caamba njiisyo zya Bunakristo izijanika mu Bbaibbele. (Joh. 17:17) Njiisyo eezyi mpaayeeme zintu zyoonse nzyotusyoma. Mbunga ya Jehova iba masimpe kuti nzyotusyoma ziyeeme aceelelo eeci. Kufwumbwa kuti katucita oobo, tuyoolongezyegwa.

14. Mbuti Banakristo bamwi mbobakaleka kutobela “ceelelo camajwi mabotu”?

¹⁴ Ncinzi cikonzya kucitika kuti twaleka kusyoma “ceelelo camajwi mabotu”? Mucikozyanyo, mumwaanda wamyaka wakusaanguna, Banakristo bamwi bakatalika kumwaya makani aakubeja aakuti buzuba bwa Jehova bwakalisikide. Kweelede kuti kwakali lugwalo bantu ndobakali kuyeeyela kuti lwakalembwa amwaapostolo Paulo, ilwakali kwaamba makani aaya. Kakunyina kwaavwuntauzya makani aaya kutegwa bazyibe masimpe, Banakristo bamwi bana Tesalonika bakatalika kumwaya makani aatasinizyidwe. Nobatakeenwa kuti nobakayeeya zintu nzyaakabayiisya Paulo ciindi naakacili aambabo. (2Tes. 2:​1-5) Paulo wakabapa lulayo bakwesu lwakuti tiibakeelede kusyoma makani oonse ngobamvwa. Kutegwa akabagwasye kumbele, Paulo wakamanizya majwi aakwe mulugwalo lwabili kubana Tesalonika kwiinda mukwaamba kuti: “Mebo nde Paulo, ndamulembela kwaanzya kwangu ooku ajanza lyangu ndemwini, icili ncitondezyo mumagwalo aangu oonse; oobu mbondilemba.”—2Tes. 3:17.

15. Mbuti mbotukonzya kulikwabilila kumakani aakubeja aalibonya mbuli kuti ngamasimpe? Amupe cikozyanyo. (Amubone azifwanikiso.)

¹⁵ Ncinzi ncotwiiya kumajwi aa Paulo ngaakalembela bana Tesalonika? Ciindi notwamvwa makani amwi aateendelani anzyotwakaiya mu Bbaibbele naa notwamvwa makani aatyompya, tweelede kubelesya busongo. Mu Soviet Union yakaindi, babelesi bamfwulumende bakapa bakwesu lugwalo ilwakali kulibonya mbuli kuti luzwa kumaofesi mapati. Lugwalo oolo lwakali kukulwaizya bakwesu bamwi kupanga mbunga iimbi. Lwakali kulibonya mbuli kuti lwakali kuzwa kumaofesi mapati ncobeni. Pele bakwesu basyomeka kunyina nobakeenwa. Bakabona kuti mulumbe wakali mulugwalo oolo tiiwakali kweendelana anzyobakaiya. Mazuba aano, basinkondoma babelesya zintu mbuli Intaneti alimwi amawebbusaiti aakubandikila kusola kutunyonganya alimwi akutwaandaanya. Muciindi cakufwambaana kulekela mizeezo yesu, tulakonzya kulikwabilila kwiinda mukubikkila maano kubona naa zintu nzyotumvwa naa kubala zileendelana akasimpe nkotwakaiya.—2Tes. 2:2; 1Joh. 4:1.

16. Kweelana alugwalo lwa Baroma 16:​17, 18, ncinzi ncotweelede kucita kuti bamwi baleka kusyoma kasimpe?

¹⁶ Amuzumanane kukamantana abaabo basyomeka kuli Jehova. Leza uyanda kuti katukamantene mubukombi bwesu. Tuyoozumanana kukamantana kufwumbwa buyo kuti twakakatila kukasimpe. Kufwumbwa bantu bamwaya makani aateendelani akasimpe baleta lwaandaano mumbungano, aboobo Leza utucenjezya kuti ‘tubatantamuke.’ Buyo-buyo, tulakonzya kutalika kusyoma makani aakubeja akuleka kusyomeka kuli Jehova.—Amubale Baroma 16:​17, 18.

17. Ino tugwasyigwa buti kwiinda mukuzyiba kasimpe alimwi akukakatila kuli nkako?

¹⁷ Ciindi notukazyiba kasimpe alimwi akukakatila kuli nkako, tuyooba acilongwe ciyumu a Jehova alimwi lusyomo lwesu luyooyuma. (Ef. 4:​15, 16) Tatukeenwi anjiisyo zya Saatani zyakubeja alimwi Jehova uyoozumanana kutukwabilila lyamapenzi mapati. Amuzumanane kukakatila kukasimpe, “eelyo Leza waluumuno unoolaandinywe.”—Flp. 4:​8, 9.