Jehova Mbwayanda Kuti Mbungano Kaimweendelezya Ooyo Wacita Cibi Cipati

1. Ncinzi Jehova ncayanda kuti bantu boonse bacite?

JEHOVA wakabalenga bantu kabajisi lwaanguluko lwakulisalila. Alimwi mulacibelesya cipego eeci ciindi nomupanga zyakusala. Cakusala ciyandika kapati muntu ncakonzya kupanga, nkusala kulyaaba kuli Jehova alimwi akuba cibeela camukwasyi wabakombi bakwe. Jehova uyanda kuti bantu boonse bacite oobo. Nkaambo nzi? Akaambo kakuti ulabayanda bantu alimwi uyanda kuti kabakkomene. Uyanda kuti kabali balongwe bakwe akuyoopona mane kukabe kutamani.—Dt. 30:19, 20; Gal. 6:7, 8.

2. Ncinzi Jehova ncayanda kuti bacite aabo bataneempwa? (1 Johane 2:1)

² Nokuba boobo, Jehova kunyina nasinikizya muntu uuli woonse kuti amubelekele. Ulamulekela muntu uuli woonse kuti alisalile ncayanda kuyoocita. Pele ino mbuti kuti Munakristo uubbapatizyidwe watyola mulawo wa Leza kwiinda mukucita cibi cipati? Ikuti naa tanaayempwa, weelede kugusyigwa mumbungano. (1Kor. 5:13) Nokuba boobo, Jehova uyanda kuti muntu ooyo ayempwe akupiluka kulinguwe. Amana buya, aaka nkakaambo kapati ncaakatupeda cinunuzyo, kutegwa cikonzyeke kuli basizibi ibeempwa kulekelelwa zibi zyabo. (Amubale 1 Johane 2:1.) Aboobo Leza wesu siluyando, ukulwaizya baabo bacita zibi zipati kuti beempwe.—Zek. 1:3; Rom. 2:4; Jak. 4:8.

3. Ino tulaiya nzi mucibalo eeci?

³ Jehova ulatwaambila mbwalimvwa kujatikizya cibi alimwi abaabo bacita zibi zipati. Oobo mbwayanda kuti andiswe katulimvwa. Mucibalo eeci, tulabandika nzila mbotukonzya kucita oobo alimwi tulaiya Paulo ncaakaambila mbungano yaku Korinto kuti icite ciindi mukwesu umwi naakacita cibi cipati. Kumane tulalanga-langa Paulo ncaakaambila mbungano kuti icite ciindi mwaalumi ooyo naakeempwa. Kuyungizya waawo, tulaiya Jehova mbwalimvwa kujatikizya bantu ibacita cibi cipati.

ICAKACITIKA CIINDI MUKWESU NAAKACITA CIBI CIPATI

4. Ncinzi cakacitika kumbungano yaku Korinto? (1 Bakorinto 5:​1, 2)

⁴ Amubale 1 Bakorinto 5:​1, 2. Naakali mulweendo lwakwe lwatatu lwabumisyinali, Paulo wakamvwa cintu cibyaabi icakali kucitika kumbungano mpya yaku Korinto. Mukwesu umwi, wakali kucita bwaamu amukaintu wabausyi. Bukkale oobu bwakali kuyumya mate alimwi taakwe nobwakali kucitwa “naaba akati kabamasi.” Pele mbungano yakali kuyeeya kuti cakali buyo kabotu kumukwesu iwakali mubukkale oobu kuzumanana kuba mumbungano. Ambweni bamwi bakali kuyeeya kuti kwiinda mukucita boobo, bakali kwiiya luse lwa Jehova, ndwatondezya kubantu batalondokede. Pele Jehova kunyina nazumizya bantu bakwe kucita zintu zibi. Kwiinda mukucita cintu eeci cibyaabi, mwaalumi ooyu wakali kubisya mpuwo yambungano. Alimwi wakali kukonzya kuyunga Banakristo bamwi ibakali kuyanzana anguwe. Aboobo, ncinzi Paulo ncaakailailila mbungano kuti icite?

5. Ncinzi Paulo ncaakayaambila kucita mbungano? Ino wakali kupandulula nzi? (1 Bakorinto 5:13) (Amubone acifwanikiso.)

⁵ Amubale 1 Bakorinto 5:13. Kwiinda mukusololelwa amuuya, Paulo wakalemba lugwalo, kulailila kuti sizibi ooyu uuteempwi, agusyigwe mumbungano. Ino Banakristo basyomeka bakeelede kumweendelezya buti? Paulo wakabaambila kuti ‘baleke kuyanzana anguwe.’ Ino wakali kupandulula nzi? Paulo wakapandulula kuti mulawo ooyu wakali kubikkilizya ‘akutasola buya nokuba kulya amuntu uuli boobu.’ (1Kor. 5:11) Kayi kukkala kulya amuntu umwi, cilakonzya kupa kuti mutalike kuyanzana anguwe. Aboobo cilisalede kuti Paulo, wakali kupandulula kuti mbungano tiiyakeelede kuyanzana amwaalumi ooyo. Nkaambo kucita boobo, kwakali kukonzya kubakwabilila kuti batayungwi anguwe. (1Kor. 5:5-7) Kuyungizya waawo, kucileka kuyanzana amwaalumi ooyo, cakali kukonzya kumupa kuti abone kuti wakacita cintu cibyaabi kapati, kulimvwa kuusa alimwi akukulwaizyigwa kuti ayempwe.

6. Ncinzi mbungano ncoyakacita ciindi noyakatambula lugwalo lwa Paulo? Ncinzi ncaakacita ooyo mwaalumi iwakali kucita cibi cipati?

⁶ Naakamana kulutuma lugwalo lwakwe ku Banakristo baku Korinto, Paulo wakatalika kulibuzya naa mbungano yakali kuyoocita buti. Mukuya kwaciindi, Tito wakamwaambila makani aakkomanisya Paulo. Wakamwaambila kuti mbungano yakalutambula kabotu lugwalo lwakwe. (2Kor. 7:6, 7) Yakaatobela malailile aakwe alimwi akumugusya mwaalumi ooyo mumbungano. Alimwi ciinda kukkomanisya ncakuti, ciindi mbungano noyakaatobela malailile aa Paulo, mwaalumi ooyo wakeempwa. Wakabuleka bukkale bwakwe bubyaabi akutalika kutobela zyeelelo zya Jehova ziluleme. (2Kor. 7:8-11) Ncinzi lino Paulo ncaakailailila kucita mbungano?

MBUNGANO MBOYAKEELEDE KUMWEENDELEZYA SIZIBI IWAKEEMPWA

7. Ncinzi mwaalumi ncaakacita ciindi naakagusyigwa mumbungano? (2 Bakorinto 2:5-8)

⁷ Amubale 2 Bakorinto 2:5-8. Paulo wakaamba kuti ‘cisubulo icakapegwa abanabunji cakalikkwene kumuntu ooyo.’ Munzila imwi, lulayo ndwaakapegwa lwakacita mulimo wandulo. Ino mulimo nzi ooyo? Kumugwasya kuti ayempwe.—Heb. 12:11.

8. Ncinzi Paulo ncaakaambila baalu kuti bacite?

⁸ Akaambo kakuti mwaalumi ooyo wakeempwa, Paulo wakaambila baalu kuti bamupilusye mumbungano. Kunze lyaboobo, wakabaambila kuti ‘bamulekelele, kumuumbulizya’ alimwi ‘akumutondezya luyando.’ Paulo wakali kuyanda kuti bakwesu batondezye kuti bakamulekelela ncobeni mwaalumi ooyo alimwi akuti bakali kumuyanda kwiinda muzintu nzyobakali kwaamba alimwi akucita. Kwiinda mukucita boobo, eeci cakali kukonzya kupa kuti mwaalumi ooyo alimvwe kuti watambulwa amaanza obilo mumbungano.

9. Ino kulangilwa kuti nkaambo nzi bamwi ncobakawayawaya kumulekelela ooyu sizibi iwakeempwa?

⁹ Sena bamwi mumbungano bakali kuwayawaya kumutambula ooyu sizibi iwakeempwa? Bbaibbele talyaambi, pele kulangilwa kuti bamwi bakacita oobo. Nkaambo nzi ncotwaambila boobu? Akaambo kakuti ambweni bamwi bakacili kunyemede akaambo kamasampu ngaakaletela mbungano. Aboobo ambweni bamwi bakali kulimvwa kuti tiicakali kabotu kumuntu iwakacita cintu cibyaabi boobo kupiluka mumbungano. (Amweezyanisye a Luka 15:28-30.) Pele nkaambo nzi ncocakali kuyandika kapati kuti mbungano imutondezye luyando ooyo mukwesu iwakeempwa?

10-11. Ncinzi cakali kukonzya kucitika ikuti baalu nobakakaka kumulekelela sizibi iwakeempwa?

¹⁰ Amweezeezye buyo icakali kukonzya kucitika ikuti baalu nobakakaka kumupilusya mumbungano ooyo sizibi iwakeempwa naa ikuti naakamana kupilusyigwa basimbungano nobakakaka kumutondezya luyando! Wakali kukonzya kutyompwa akaambo ‘kakuusa kapati’ alimwi akulimvwa kuti kunyina naakali kuyoomubelekela kabili Jehova. Mane buya, wakali kukonzya kulimvwa kuti Jehova kunyina naakali kuyoomulekelela, aboobo kucinca kwakali kusowa buyo ciindi.

¹¹ Ciinda kubija ncakuti, ikuti bakwesu abacizyi nobakakaka kumulekelela sizibi ooyo iwakeempwa, cilongwe cabo a Jehova nocakanyongana. Nkaambo nzi? Nkaambo ooku nokwakaba kwiiya Saatani silunya alimwi uutatondezyi luse muciindi cakwiiya Jehova uulekelela basizibi ibeempwa. Munzila imwi, bakali kunoozumina kubelesyegwa a Saatani Diabolosi kutyompya mwaalumi ooyo ikubelekela Jehova.—2Kor. 2:10, 11; Ef. 4:27.

12. Mbuti mbungano mboyakali kukonzya kumwiiya Jehova?

¹² Mbuti mbungano yaku Korinto mboyakali kukonzya kumwiiya Jehova ikutali Saatani? Nkwiinda mukubalekelela basizibi ibeempwa mbubonya Jehova mbwacita. Amubone balembi bamwi ba Bbaibbele ncobakaamba kujatikizya Jehova. Davida wakaamba kuti: “Mubotu alimwi ulilibambilide kulekelela zibi.” (Int. 86:5) Mika wakalemba kuti: “Ino nguni Leza uuli mbuli nduwe, uujatila milandu akulekelela nsotoko?” (Mik. 7:18) Mpoonya Isaya wakaamba kuti: “Simucita zibi aileke nzila yakwe, awalo muntu mubi aileke mizeezo yakwe; aapiluke kuli Jehova, walo uutiimufwide luse, aapiluke kuli Leza wesu, nkaambo uyoomulekelela cakumaninina.”—Is. 55:7.

13. Nkaambo nzi ncocakali kweelela kutawayawaya kumupilusya mumbungano sizibi iwakeempwa? (Amubone kabbokesi kakuti: “Ino mwaalumi Waku Korinto Wakapilusyigwa Lili Mumbungano?”)

¹³ Kutegwa mbungano yaku Korinto imwiiye Jehova, yakeelede kumutambula amaanza obilo mwaalumi ooyo sizibi iwakeempwa alimwi akumutondezya luyando. Kwiinda mukutobela malailile aa Paulo aakuti bamutambule sizibi iwakeempwa, mbungano yakatondezya kuti yakali ‘kumvwida muzintu zyoonse.’ (2Kor. 2:9) Nokuba kuti kwakaindide myezi misyoonto kuzwa ciindi naakagusyigwa mumbungano, lulayo ndwaakapegwa lwakamugwasya kuti ayempwe. Aboobo taakwe kaambo kakali kukonzya kupa baalu kuti bamuke kumupilusya mumbungano.

MBOTUKONZYA KWIIYA BULULAMI ALIMWI ALUSE LWA JEHOVA

14-15. Ncinzi ncotwaiya kujatikizya cakacitika ku Korinto? (2 Petro 3:9) (Amubone acifwanikiso.)

¹⁴ Cibalo icaamba makani mbwaakeendelezyegwa mumbungano yaku Korinto cakabikkilizyigwa mu Bbaibbele kutegwa ‘twiiye.’ (Rom. 15:4) Kwiinda mucibalo eeci, twiiya kuti Jehova tazumizyi kuti aabo bacita zibi zipati alimwi ibateempwi bazumanane kuba mumbungano. Bamwi balakonzya kuyeeya kuti akaambo kakuti Jehova ‘ngusiluse,’ ulakonzya kumuzumizya muntu uuteempwi kuzumanana kuba mumbungano. Pele oobo tabusyi Jehova mbwatondezya luse. Nokuba kuti ngusiluse, tazumini bukkale buli boonse. Zyeelelo zyakwe zijatikizya ciluzi acitaluzi kunyina nozicinca pe. (Jud. 4) Ikuti Jehova wazumizya basizibi ibateempwi kuzumanana kuba mumbungano, oolo talukonzyi kuba luse nkaambo mbungano ilakonzya kuba muntenda.—Tus. 13:20; 1Kor. 15:33.

¹⁵ Nokuba boobo, twiiya kuti Jehova tayandi kuti muntu uuli woonse akanyonyoonwe, pele uyanda kuti boonse bakafwutuke ikuti kacikonzyeka. Aboobo ulatondezya luse kuli baabo ibacinca bukkale bwabo, ibayanda kuba balongwe bakwe alimwi. (Ezk. 33:11; amubale 2 Petro 3:9.) Nkakaambo kaako ciindi mwaalumi waku Korinto naakeempwa akuleka bukkale bwakwe bubyaabi, Jehova wakabelesya Paulo kwaambila mbungano kuti imulekelele mwaalumi ooyu alimwi akumutambula.

16. Ino mulimvwa buti kujatikizya Jehova nomwamana kwiiya cakacitika ku Korinto?

¹⁶ Cikozyanyo cambungano yaku Korinto citondezya kuti Jehova ngusiluyando, mululami alimwi ulabeteka cakutasalulula. (Int. 33:5) Sena eeci tacimupi kuyanda kumutembaula kapati Leza wesu? Kayi toonse buyo tuli basizibi alimwi tuyandika kulekelelwa anguwe. Kunze lyaboobo, tulamulumba kapati Jehova akaambo kakutupa cinunuzyo kutegwa tukonzye kulekelelwa zibi zyesu. Eelo kaka cilaumbulizya kuzyiba kuti Jehova ulabayanda kapati bantu bakwe alimwi uyanda kuti kabakkomene lyoonse mane kukabe kutamani!

17. Ncinzi ciyoobandikwa muzibalo zitobela?

¹⁷ Ikuti muntu umwi wacita cibi mazuba aano, mbuti baalu bambungano mbobakonzya kwiiya luyando lwa Jehova akugwasya muntu ooyo kutegwa ayempwe? Ino basimbungano beelede kucita buti ciindi baalu nobasala kumugusya muntu umwi mumbungano naa kumupilusya? Mibuzyo eeyi iyoobandikwa muzibalo zitobela.