Nkaambo nzi Manyongwe Ankondo Ncozyazumanana?
Bbaibbele lilaamba kaambo ncokuvwulide nkondo alimwi ancozyazumanana.
CIBI
Leza wakalenga bazyali besu bakusaanguna, ba Adamu a Eva, mucinkozya cakwe. (Matalikilo 1:27) Eeci caamba kuti bakali kuyooba abube bwakwe mbuli luumuno alimwi aluyando. (1 Bakorinto 14:33; 1 Johane 4:8) Pele cuusisya ncakuti, bazyali besu bakamuzangila Leza, aboobo bakabisya. Akaambo kaceeci, swebo tobana babo toonse twakakona cibi alimwi alufwu. (Baroma 5:12) Cibi ncotwakakona kubazyali besu bakusaanguna, ncecipa kuti bunji bwaziindi katuyeeya zintu zitali kabotu zyalo zileta nkondo.—Matalikilo 6:5; Marko 7:21, 22.
MFWULUMENDE ZYABANTU
Leza tanaakatulenga kuti katulyeendelezya. Bbaibbele lyaamba kuti: “Muntu weenda tapedwe nguzu zyakusololela noziba ntaamu zyakwe.” (Jeremiya 10:23) Nkakaambo kaako, mfwulumende zyabantu ncozitakonzyi kumanizya manyongwe ankondo.
SAATANI AMADAIMONA AAKWE
Bbaibbele lyaamba kuti: “Nyika yoonse ili mumaanza aamubi.” (1 Johane 5:19) Ooyu “mubi” ngolyaamba Bbaibbele, ngu Saatani Diabolosi alimwi buya mujayi. (Johane 8:44) Walo azilenge zyamuuya zibyaabi eezyi, nkokuti madaimona mbobapa kuti kakuli nkondo amanyongwe munyika.—Ciyubunuzyo 12:9, 12.
Swebo tobantu, tatukonzyi kuzimanizya zintu zileta nkondo amanyongwe, pele Leza ulakonzya kucita oobo.