Amumugwasye Sikwiiya Bbaibbele Wanu Kusala Kubelekela Jehova

1-2. (a) Nkaambo nzi basikwiiya Bbaibbele bamwi ncobakonzya kuwayawaya kutalika kubelekela Jehova? (b) Ncinzi ncotutiilange-lange mucibalo eeci?

SENA kuli zintu zimwi zyakali kumupa kuwayawaya kuba umwi wa Bakamboni ba Jehova? Sena nkuyoowa kunyemya babelesinyoko, balongwe naa banamukwasyi? Naa sena nkuyoowa kuti inga tiimwacikonzya kupona kweelana azyeelelo zya Leza? Ikuti kacili boobo, nkokuti inga mwabamvwisya basikwiiya Bbaibbele ibawayawaya kutalika kubelekela Jehova.

² Jesu wakalizyi kuti zintu zili boobu zyakali kukonzya kupa muntu kutayaambele kumuuya. (Mt. 13:​20-22) Nokuba boobo, wakazumanana kubagwasya aabo ibakali kuwayawaya kutalika kumutobela. Aboobo wakabagwasya bantu bali boobu (1) kuzyiba zintu izyakali kukonzya kubapa kutayaambele, (2) kutalika kumuyanda kapati Jehova, (3) kucinca zintu nzyobabikkila kapati maano mubuumi, mpoonya (4) kuzunda buyumuyumu. Pele mbuti mbotukonzya kubelesya twaambo ootu ciindi notubelesya bbuku lya Amupone Kukabe Kutamani! kugwasya sikwiiya kutalika kubelekela Jehova?

AMUMUGWASYE SIKWIIYA WANU KUZYIBA ZINTU ZIMUPA KUTAYAAMBELE

3. Ncinzi cakapa kuti cimuyumine Nikodemo kuba sikwiiya wa Jesu?

³ Nikodemo, musololi waba Juda iwakali ampuwo kapati, cakamuyumina kuba sikwiiya wa Jesu. Nikodemo wakamuzyiba Jesu kuti wakali mwiiminizi wa Leza, nokuba kuti kwakaindide buyo myezi iibalilwa ku 6 kuzwa naakatalika mulimo wakwe. (Joh. 3:​1, 2) Pele wakasala kubonana a Jesu cakusisikizya akaambo ‘kakuyoowa ba Juda.’ (Joh. 7:13; 12:42) Ambweni wakali kuyeeya kuti wakali kukonzya kusweekelwa cuuno cakwe ikuti waba sikwiiya wa Jesu.a

4. Mbuti Jesu mbwaakamugwasya Nikodemo kuzyiba Leza ncaakali kuyanda kuti acite?

⁴ Nikodemo wakaluuzyi Mulawo wa Musa, pele wakali kuyandika kugwasyigwa kutegwa azyibe Jehova ncaakali kuyanda kuti acite. Ino Jesu wakamugwasya buti? Jesu wakabandika anguwe nokuba kuti cakali ciindi camasiku. Cakusalazya wakamwaambila Nikodemo ncaakeelede kucita kutegwa abe sikwiiya wakwe. Wakamwaambila kuti wakeelede kweempwa zibi zyakwe, kubbapatizyigwa mumaanzi alimwi akutondezya lusyomo mulinguwe.—Joh. 3:​5, 14-21.

5. Mbuti mbomukonzya kumugwasya sikwiiya wanu kuzyiba zintu zimupa kutayaambele?

⁵ Sikwiiya Bbaibbele inga kaazyi Magwalo, pele inga wayandika kugwasyigwa kuzyiba zintu zimupa kutayaambele. Mucikozyanyo, ambweni mulimo wakumubili naa kukazyigwa abanamukwasyi. Aboobo kutegwa mumugwasye kabotu, amujane ciindi cakuba anguwe. Mulakonzya kumutamba kucakulya naa kuunka kukweendeenda anguwe. Ambweni ciindi nomucita zintu eezyi anguwe, inga camupa kuti aanguluke kumwaambila buyumuyumu mbwajisi calo cikonzya kupa kuti mucikonzye kumugwasya kabotu. Mpoonya amumukulwaizye kupanga kucinca kuyandika, ikutali akaambo kakuyanda kukkomanisya ndinywe, pele akaambo kaluyando ndwajisi kuli Jehova.

6. Ino inga mwamugwasya buti sikwiiya kutalika kubelesya nzyaiya? (1 Bakorinto 16:13)

⁶ Ikuti sikwiiya Bbaibbele kajisi lusyomo lwakuti Jehova ulakonzya kumugwasya kupona kweelana azyeelelo zyamu Bbaibbele, uyoocikonzya kutalika kubelesya nzyaiya. (Amubale 1 Bakorinto 16:13.) Mubwini, mukuli ngotujisi ulikozyenye amukuli ngwajisi mwiiyi wakucikolo. Amuyeeye buyo ciindi nomwakali basicikolo, ino mwiiyi uuli buti ngomwakali kuyanda kapati? Ambweni ngooyo iwakali kumugwasya kuzyiba kuti mulakonzya kuzwidilila. Mbubwenya buyo, mwiiyi wa Bbaibbele uuli kabotu, tayiisyi buyo sikwiiya zintu Leza nzyayanda kuti acite, pele alimwi ulamusyomezya kuti Jehova ulilibambilide kumugwasya kupanga kucinca nkwayandika. Aboobo, mbuti mbomukonzya kuba mwiiyi uuli kabotu?

AMUMUGWASYE SIKWIIYA WANU KUTALIKA KUMUYANDA KAPATI JEHOVA

7. Mbuti Jesu mbwaakabagwasya baswiilizi bakwe kutalika kumuyanda kapati Jehova?

⁷ Jesu wakalizyi kuti kumuyanda kapati Jehova kwakali kuyoobakulwaizya basikwiiya bakwe kubelesya zintu nzyobakali kwiiya. Aboobo kanji-kanji wakali kubayiisya zintu izyakali kuyoobagwasya kutalika kumuyanda kapati Usyi wabo wakujulu. Mucikozyanyo, wakakozyanisya Jehova kumuntu uupa bana bakwe zintu zibotu. (Mt. 7:​9-11) Pele ambweni baswiilizi bamwi ba Jesu tiibakajisi usyi siluyando. Amweezeezye buyo mbobakalimvwa ciindi Jesu naakaamba cikozyanyo causyi siluyando walo iwakatambula mwanaakwe wakazangide. Tacidoonekwi buya kuti eeci cakabagwasya kuzyiba kuti Jehova ulabayanda kapati alimwi ulayanda kubagwasya.—Lk. 15:​20-24.

8. Ino inga mwamugwasya buti sikwiiya Bbaibbele wanu kutalika kumuyanda kapati Jehova?

⁸ Mulakonzya kumugwasya sikwiiya Bbaibbele wanu kutalika kumuyanda kapati Jehova kwiinda mukukankaizya bube bubotu mbwajisi ciindi nomumuyiisya. Ciindi cili coonse nomwiiya anguwe, amumugwasye kumvwisya nzyaiya mbozitondezya kuti Jehova ulatuyanda. Mpoonya ciindi nomubandika makani aajatikizya cinunuzyo, amumugwasye kubona mbocikonzya kumugwasya lwakwe kumugama. (Rom. 5:8; 1Joh. 4:10) Aboobo ciindi sikwiiya nabona Jehova mbwamuyanda, awalo ulakonzya kutalika kumuyanda kapati.—Gal. 2:20.

9. Ncinzi cakagwasya mwaalumi wazina lya Michael kutalika kubelekela Jehova?

⁹ Amumvwe cakuluula camwaalumi uutegwa Michael waku Indonesia, walo iwakakomezyegwa mukasimpe pele tanaakabbapatizyidwe aciindi eeco. Naakajisi myaka iili 18, wakaunka kucisi cimbi akutalika mulimo wakweenzya matilaki. Mukuya kwaciindi wakapiluka ku Indonesia kuyookwata, pele wakazumanana kubekela kucisi cimbi icakali kulamfwu amukwasyi wakwe. Aciindi eeci, mukaintu wakwe amwanaakwe musimbi bakatalika kwiiya Bbaibbele akuyaambele. Kumane nobakafwa banyina, wakajokela ku Indonesia kuyoolanganya bausyi alimwi wakatalika kwiiya Bbaibbele. Ciindi nobakali kubandika cibeela cakuti “Amwiiye Zinji” muciiyo 27 cabbuku lya Amupone Kukabe Kutamani!, Michael zyakamusika amoyo nzyaakali kwiiya. Naakazinzibala kuyeeya kujatikizya mbocakamucisa kapati Jehova kubona Mwaanakwe kapenga, wakatalika kulila. Nkaambo wakazyiba kuti Jehova alimwi a Jesu balamuyanda kapati. Aboobo kutegwa atondezye kulumba, wakacinca bukkale bwakwe akubbapatizyigwa.

AMUMUGWASYE SIKWIIYA KUCINCA ZINTU NZYABIKKILA KAPATI MAANO MUBUUMI

10. Ino Jesu wakabagwasya buti basikwiiya bakwe kucinca zintu nzyobakali kubikkila kapati maano mubuumi? (Luka 5:​5-11) (Amubone acifwanikiso.)

¹⁰ Tiicakatola ciindi kuli basikwiiya kuzyiba Jesu kuti ngo Mesiya wakasyomezyedwe, pele bakali kuyandika kugwasyigwa kutegwa mulimo wakukambauka baubikke mubusena bwakusaanguna. Mucikozyanyo, Petro a Andreya bakali kale basikwiiya ba Jesu kwaciindi cili mbocibede naakabatamba kuti batalike kumutobela. (Mt. 4:​18, 19) Bakali kucita makwebo aakuzuba nswi antoomwe a Jakobo a Johane alimwi makwebo aaya akali kweenda kabotu. (Mk. 1:​16-20) Pele Petro a Andreya bakaleka kucita makwebo aaya kutegwa bamutobele Jesu. Alimwi tacidoonekwi buya kuti bakapanga bubambe bwakuti kabacikonzya kulanganya mikwasyi yabo. Pele ncinzi cakabakulwaizya kusiya makwebo aabo? Cibalo cijanika mubbuku lya Luka citwaambila kuti Jesu wakacita maleele alo aakayumya lusyomo lwabo lwakuti Jehova wakali kunoobalanganya.—Amubale Luka 5:​5-11.

11. Mbuti mbotukonzya kubelesya zintu zyakatucitikila mubuumi kuyumya lusyomo lwasikwiiya wesu?

¹¹ Tatukonzyi kucita maleele mbuli mbwaakacita Jesu, pele tulakonzya kwaamba zyakuluula zyalo zitondezya Jehova mbwabagwasya aabo ibabikka kuyanda kwakwe mubusena bwakusaanguna. Mucikozyanyo, mulakonzya kwaamba Jehova mbwaakamugwasya ciindi nomwakatalika kujanika kumiswaangano. Ambweni kubeleka ovataimu kwakali kukonzya kupa kuti kamutajaniki kumuswaangano. Aboobo, mwakali kuyandika kubandika abasikumulemba mulimo kujatikizya makani aaya. Amumupandulwide sikwiiya mbolwakayuma lusyomo lwanu akaambo kakubona mbwaakamugwasya Jehova ciindi nomwakabikka kuyanda kwakwe mubusena bwakusaanguna mubuumi bwanu.

12. (a) Nkaambo nzi ncotweelede kuunka abasikumwaya baindene-indene kuciiyo cesu ca Bbaibbele? (b) Ncinzi cimbi ncomukonzya kubelesya kugwasya sikwiiya wanu kubikka Jehova mubusena bwakusaanguna? Amupe cikozyanyo.

¹² Sikwiiya wanu alimwi ulakonzya kugwasyigwa kwiinda mukumvwa Banakristo bamwi mbobakacinca zintu nzyobakali kubikka mubusena bwakusaanguna mubuumi bwabo. Aboobo mulakonzya kutamba bakombinyoko ibazwa mubukkale bwiindene-indene kutegwa bamusangane ciindi nomwiiya asikwiiya wanu. Mulakonzya kubalomba kuti bapandulule mbobakakaiya kasimpe alimwi ancobakacita kutegwa babikke mulimo wa Jehova mubusena bwakusaanguna mubuumi bwabo. Kuyungizya waawo, amweebelele mavidiyo aali mucibeela cakuti “Amwiiye zinji” mpoonya ikuti kakuyandika, amwaayebelele ayaayo aajanika mucibeela cakuti “Amuzyibe zinji” mubbuku lya Amupone Kukabe Kutamani! Mucikozyanyo, ciindi nomwiiya ciiyo 37, mulakonzya kwaamba njiisyo ziyandika kapati izijanika muvidiyo yakuti Jehova Uyootupa Nzyotuyandika.

AMUMUGWASYE SIKWIIYA WANU KUZUNDA BUYUMUYUMU

13. Ino Jesu wakabagwasya buti basikwiiya bakwe kulibambila kukazyigwa naa kupenzyegwa?

¹³ Cakwiinduluka-induluka, Jesu wakaambila basikumutobela kuti bakali kuyookazyigwa naa kupenzyegwa abantu bambi nobaba bacibbululu buya. (Mt. 5:11; 10:​22, 36) Mpoonya kumamanino aamulimo wakwe, wakabaambila kuti bakali kukonzya kujaigwa akaambo kakukomba Jehova. (Mt. 24:9; Joh. 15:20; 16:2) Aboobo, wakabaambila kuti bakeelede kucenjela ciindi nobakali kucita mulimo wabo. Wakabaambila kuti tiibakeelede kukazyanya amuntu uuli woonse iwakali kukazya nzyobasyoma, akuti bakeelede kucenjela kujatikizya zintu nzyobakali kwaamba kutegwa bazumanane kukambauka.

14. Ino inga twamugwasya buti sikwiiya kulibambila kupenzyegwa naa kukazyigwa? (2 Timoteyo 3:12)

¹⁴ Tulakonzya kumugwasya sikwiiya wesu kwiinda mukumwaambilila limwi zintu nzyakonzya kulangila kubabelesinyina, balongwe alimwi abanamukwasyi akaambo kakuti wiiya Bbaibbele. (Amubale 2 Timoteyo 3:12.) Mucikozyanyo, tulakonzya kumwaambila kuti babelesinyina bamwi balakonzya kumufwubaazya akaambo kakuti usola kupona kweelana anjiisyo zyamu Bbaibbele. Mpoonya bamwi nobaba bacibbululu, balakonzya kuzikazya zintu nzyaiya mu Bbaibbele. Ikuti kumatalikilo kwini twamwaambilila limwi nzyakonzya kulangila, ciyoomugwasya kuzyiba ncayelede kwaamba naa kucita mubukkale oobo.

15. Ncinzi cikonzya kugwasya sikwiiya Bbaibbele kuliyumya ciindi nakazyigwa abanamukwasyi?

¹⁵ Ikuti sikwiiya Bbaibbele kakazyigwa abanamukwasyi, amumugwasye kuzyiba kaambo ncobamukazyila. Ambweni balakonzya kuyeeya kuti Bakamboni bayiisya zintu zyakubeja naa mbantu babi. Nobaba bamukwasyi wa Jesu tiibakakkomene akaambo kazintu nzyaakali kucita. (Mk. 3:21; Joh. 7:5) Aboobo, amumugwasye sikwiiya Bbaibbele wanu kuba muntu uukkazika moyo alimwi mupampu ciindi nabandika abanamukwasyi naa abantu bambi buyo.

16. Mbuti mbotukonzya kugwasya sikwiiya Bbaibbele wesu kubelesya bupampu ciindi naambila bamwi nzyasyoma?

¹⁶ Tulakonzya kumugwasya sikwiiya kuzyiba kuti, nociba ciindi banamukwasyi nobatondezya luyandisisyo, inga cabota kutabaambila twaambo tunji aciindi comwe. Nkaambo ikuti wacita oobo, balakonzya kunyongana alimwi inga capa kuti ciindi ciboola bakawayewaye kubandika anguwe. Aboobo, amumukulwaizye kubelesya bupampu kwiinda mukubaambila twaambo tusyoonto buyo kutegwa bazumanane kuba aluyandisisyo lwakuyoobandika alimwi. (Kol. 4:6) Sikwiiya ooyo ulakonzya kucita oobo ambweni kwiinda mukubakulwaizya kuunka awebbusaiti yesu ya jw.org. Kucita boobo, kulakonzya kubagwasya kwiiya zinji kujatikizya Bakamboni ba Jehova aciindi cabo beni.

17. Ino inga mwamugwasya buti sikwiiya kwiingula mibuzyo iijatikizya Bakamboni ba Jehova? (Amubone acifwanikiso.)

¹⁷ Mulakonzya kubelesya cibeela cakuti “Mibuzyo Iivwula Kubuzyigwa Kujatikizya Bakamboni ba Jehova” icijanika a jw.org, kugwasya sikwiiya kubona mbwakonzya kulibambila kwiingula mibuzyo munzila ngubauba, yalo njobakonzya kubuzya bacibbululu naa babelesinyina. (2Tim. 2:​24, 25) Kuyungizya waawo, kumamanino aacibeela cimwi acimwi, amwiinduluke cibeela cakuti “Bamwi Baamba Kuti” naa “Umwi Inga Wabuzya Kuti” icijanika mubbuku lya Amupone Kukabe Kutamani! Mpoonya amumukulwaizye kucita citondezyo kutondezya mbwakonzya kubapandulwida bamwi kwiinda mukubelesya majwi aakwe. Alimwi mutawayiwayi kumwaambila mwayandika kubambulula. Masimpe, kucita citondezyo anguwe kulakonzya kumugwasya kwiiminina nzyasyoma cabusicamba.

18. Mbuti mbomukonzya kukulwaizya sikwiiya kuba sikumwaya uutanabbapatizyigwa? (Matayo 10:27)

¹⁸ Jesu wakakulwaizya basikwiiya bakwe kukambauka makani mabotu kubuleya. (Amubale Matayo 10:27.) Ciindi sikwiiya natalika kukambauka kuŋanda aŋanda, uyoobona Jehova mbwakonzya kumugwasya calo ciyoopa kuti atalike kumusyoma kapati. Pele mbuti mbomukonzya kumugwasya kuba ambaakani yakuba sikumwaya uutanabbapatizyigwa? Ciindi nokwaambilizyigwa kuti kunooli bukambausi bwaalubazu mbuli kutamba bantu ku Ciibalusyo naa kumuswaangano wacooko, amumugwasye sikwiiya kubona nzyakonzya kucita kutegwa ayelele kuba sikumwaya uutanabbapatizyigwa. Mpoonya amumwaambile kaambo bamwi ncobabona kuti ncuubauba kutalika kukambauka lyabukambausi bwaalubazu. Mbaakani imwi njakonzya kulibikkila, nkutalika kupa makani mucikolo kutegwa aiye mbwakonzya kuzipandulula kabotu nzyasyoma.

AMUTONDEZYE KUTI MULAMUSYOMA SIKWIIYA WANU

19. Ino Jesu wakatondezya buti kuti wakali kubasyoma basikwiiya bakwe? Ino inga twamwiiya buti?

¹⁹ Katanafwa akujokela kujulu, Jesu wakaambila basikwiiya bakwe kuti bakali kuyooba antoomwe alimwi. Pele balo tiibakazyiba kuti wakali kupandulula kuti bakali kuyoowunka kujulu. Nokuba kuti tiibakazimvwisya zintu zyoonse, Jesu wakali masimpe kuti bakali kuyanda kukkomanisya Jehova. (Joh. 14:​1-5, 8) Wakalizyi kuti bakali kuyandika ciindi kutegwa bazimvwisye zintu zimwi kubikkilizya abulangizi bwakuunka kujulu. (Joh. 16:12) Mbubwenya buyo, andiswe tulakonzya kutondezya kuti tulabasyoma basikwiiya besu kuti balayanda kumukkomanisya Jehova.

20. Ino mucizyi umwi waku Malawi wakatondezya buti kuti wakali kumusyoma sikwiiya wakwe?

²⁰ Tweelede kuzumanana kuba alusyomo lwakuti sikwiiya wesu ulayanda kucita ciluzi. Amumvwe cakuluula camucizyi Chifundo waku Malawi. Wakatalika kwiiya Bbaibbele kubelesya bbuku lya Amupone Kukabe Kutamani! amukaintu uucili mwana-mwana wazina lya Alinafe iwakali kuzulilwa kucikombelo ca Katolika. Nobakamana kwiiya ciiyo 14, mucizyi Chifundo wakabuzya Alinafe kujatikizya mbwaakali kwaabona makani aakubelesya mituni mubukombi. Alinafe wakanyema kapati akwaamba kuti: “Eeco ncakulisalila!” Mucizyi Chifundo wakayeeya kuti Alinafe ulacileka kwiiya. Pele cakukkazika moyo mucizyi Chifundo wakazumanana kwiiya a Alinafe kajisi lusyomo lwakuti mukuya kwaciindi uyookabona kaambo. Nokwakainda myezi misyoonto, mucizyi Chifundo wakabuzya Alinafe mubuzyo uujanika muciiyo 34 wakuti: “Kusikila waawa, ino kwiiya Bbaibbele alimwi akuzyiba Leza wakasimpe Jehova kwamugwasya buti?” Mucizyi Chifundo wakaamba mbwaakaingula Alinafe naakati: “Wakaamba twaambo tunji tubotu tukulwaizya kubikkilizya akaambo Bakamboni ncobatacitili zintu nzyolikasya Bbaibbele.” Tiilyakalampa, Alinafe wakaleka kubelesya mituni alimwi wakeelela kubbapatizyigwa.

21. Mbuti mbotukonzya kugwasya sikwiiya wesu kusala kubelekela Jehova?

²¹ Nokuba kuti Jehova “nguukomezya,” andiswe kuli mbotukonzya kugwasya kutegwa sikwiiya Bbaibbele ayaambele. (1Kor. 3:7) Tatweelede kugolela buyo aakumuyiisya zintu nzyayanda Jehova kuti acite, pele alimwi tweelede kumugwasya kutalika kumuyanda kapati. Alimwi tweelede kumukulwaizya kutondezya luyando oolo ndwajisi kwiinda mukucinca zintu nzyabikkila kapati maano mubuumi. Kunze lyaboobo, tweelede kumuyiisya kusyoma Jehova ciindi naajana buyumuyumu. Kuyungizya waawo, ciindi notumusyoma sikwiiya Bbaibbele kuti uyanda kukkomanisya Jehova, tulamugwasya kuba abusicamba buyandika kutegwa asale kubelekela Jehova.