MAKANI AAKULUULA
“Nkondo Njiya Jehova”
MU JANUARY 28, 2010 ndakali mudolopo libotu lya Strasbourg ku France. Tiindakali mudolopo eeli kuyooswaya, pele ndakali umwi wabaabo ibakatumidwe kuyooyiminina lwaanguluko lwa Bakamboni ba Jehova munkuta ya European Court of Human Rights. Mfwulumende ya France yakaamba kuti Bakamboni ba Jehova bakeelede kwiibbadela mali aamutelo aasika ku 64 miliyoni euros ($89,000,000 U.S.). Aboobo twakaunkide kuyooyiminina kuti eeci tacili camumulawo. Pele kaambo kapati ncotwakeelede kuuwina mulandu ooyu nkakuti izina lya Jehova lilemekwe, bantu bakwe bazumanane kuba ampuwo mbotu akumukomba Jehova cakwaanguluka mu France, ikutali akaambo kamweelwe wamali. Cakacitika aciindi eeco cakasinizya kuti “nkondo njiya Jehova.” (1Sam. 17:47) Amuleke ndipandulule.
Makani aaya akatalika mu 1999 ciindi mfwulumende ya France noyakaambila mutabi waku France kuti wakeelede kubbadela mali kuzwa kumali aakasangwa akati kamwaka wa 1993 alimwi awa 1996. Twakatola makani aaya kunkuta zyamu France, pele kunyina naakeendelezyegwa kabotu. Aboobo twakasola kucita apiilu pele kunyina zintu nozyakacinca. Mane buya mfwulumende yakabweza mali kuzwa mubbanki akkaunti yamutabi aayinda ku 4.5 miliyoni euros ($6,300,000 U.S.). Nzila ilikke yakali kukonzya kupa kuti mali aaya apilusyigwe nkutola makani aaya kunkuta ya European Court of Human Rights. Kaatanabetekwa makani aaya, bamunkuta ya European Court of Human Rights bakatwaambila kuti tuswaangane abamaloya bamfwulumende yamu France antoomwe amwiiminizi wamunkuta eeyi, kutegwa babone naa inga twaabamba makani aaya kaatanaunka munkuta mwini.
Pele twakali kuyeeya kuti mwiiminizi wakali kuyootwaambila kuti tubbadele mali aamwi kumfwulumende ya France. Nokuba boobo, twakalizyi kuti kucita boobo tiikwakali kweendelana anjiisyo zyamu Bbaibbele. Nkaambo bakwesu abacizyi bakasanga kutegwa bagwasyilizye ziyandika zya Bwami. Aboobo, zyakusanga eezyi tiizyakali zyamfwulumende pe. (Mt. 22:21) Pele twakajanika kumuswaangano kutondezya kuti tulailemeka milawo yankuta eeyi.
Katuli kumbele aankuta ya European Court of Human Rights mu 2010 abaabo mbotwakaunkide limwi kuyoolanganya makani munkuta
Twakaswaangana kutegwa tubandike muŋanda imwi mbotu yamunkuta. Pele mubandi tiiwakatalika kabotu. Nkaambo mbwaakatalikila buyo kubandika mwiiminizi wankuta ya European Court of Human Rights, wakaamba kuti Bakamboni ba Jehova bakeelede kubbadela mali amwi aamutelo ngoyakali kuyanda mfwulumende ya France. Mpoonya aawo muuya wa Jehova wakatusololela kubuzya kuti: “Sena mulizyi kuti mfwulumende ya France yakatunyanga kale mali aasika ku 4.5 miliyoni euros kuzwa mubbanki akkaunti yesu?”
Eeci cakamupa kulibonya kugambwa kapati. Mpoonya ciindi bamaloya bamfwulumende nobakazumina kuti bakaabweza ncobeni mali, mwiiminizi ooyu wankuta wakacinca mbwaakazyeendelezya zintu. Wakabanyemena bamaloya bamfwulumende akuukosola muswaangano mpoonya aawo. Twakabona kuti Jehova nguwakapa kuti zintu zicince kutegwa tukonzye kuuwina mulandu. Aboobo twakazwa katukkomene kapati akaambo kakubona zintu mbozyakacinca mukulaba kwaliso.
Mu June 30, 2011 nkuta ya European Court of Human Rights yakaambilizya mboyakaakosola makani. Yakaamba kuti mali aamutelo aakeelede kubbadelwa tanaakali aamumulawo akuti mfwulumende ya France yakeelede kwaapilusya mali ngoyakabweza akuyungizya aambi buya atala. Kusala ooku ikwakacitwa kwazumanana kukwabilila bukombi busalala mu France kusikila mazuba aano. Masimpe mubuzyo ngotwatakali kuyeeyela kuti inga twabuzya wakaba mbuli bbwe ilyakajaya Goliati nkaambo wakapa kuti tuuwine mulandu. Nkaambo nzi? Nkaambo mbubwenya Davida mbwaakaambila Goliati, “nkondo njiya Jehova.”—1Sam. 17:45-47.
Eeci tacili ciindi cilikke notwakawina milandu munkuta. Nokuba kuti mfwulumende zilaanguzu alimwi azikombelo zyali kutukazya, twacikonzya kuwina milandu iili 1,225 munkuta zipati zyamuzisi zili 70 amunkuta zipati zili mbozibede zilanganya milandu iicitika mumasi. Kuwina ooku kwakakwabilila lwaanguluko lwesu lwabukombi, kutola lubazu mubukambausi bwakubuleya, kutatola lubazu mumapobwe aatembaula cisi alimwi akukaka kubikkwa bulowa.
Nkaambo nzi ncondakatola lubazu mumakani aamunkuta yaku Europe kakuli ndakali kubelekela ku Maofesi Mapati aa Bakamboni ba Jehova ku New York mu U.S.A.?
NDAKAKOMEZYEGWA ABAZYALI BASUNGU
Bazyali bangu ba George aba Lucille bakali mukkilasi yanamba 12 yacikolo ca Gileadi alimwi ciindi nondakazyalwa mu 1956 bakali kubelekela mu Ethiopia. Bakanduulika zina lyakuti Filipo, izina lyamukambausi wamumwaanda wamyaka wakusaanguna. (Mil. 21:8) Kumane mwaka wakatobela, mfwulumende yakaulesya mulimo wesu mucisi eeci. Nokuba kuti ndakacili mwana, ndilayeeya kabotu-kabotu mukwasyi wesu mbowakali kukomba cakusisikizya. Eeci cakali kundikkomanisya kapati mbwaanga ndakacili mwana. Cuusisya ncakuti, mu 1960 twakatandwa mucisi.
Ba Nathan H. Knorr (kulumwensyi) nobakaswaide mukwasyi wangu mu Addis Ababa, Ethiopia mu 1959
Mukwasyi wesu wakalongela ku Wichita, Kansas mu U.S.A. Pele bazyali bangu bakazumanana kuuyanda mulimo wakukambauka mbubwenya mbobakali kucita kabacili bamisyinali. Bakandiyiisya mebo, mupati wangu musimbi Judy alimwi amusyoonto wangu musankwa Leslie abalo ibakazyalilwa ku Ethiopia kumuyanda Jehova akumubelekela camoyo woonse. Aboobo ndakabbapatizyigwa nondakajisi myaka yakuzyalwa iili 13. Mpoonya nokwakainda myaka yotatwe, mukwasyi wesu wakalongela kubusena kubulide mu Arequipa ku Peru.
Mu 1974 nondakajisi buyo myaka iili 18 yakuzyalwa, mutabi waku Peru wakandisala mebo abakwesu bambi bali 4 kuba bapainiya baalubazu. Twakeelede kukambaukila mumasena aatanakambaukilwa mukati mwini buya mubusena bwamalundu aategwa Central Andes Mountains. Eeci cakali kubikkilizya kukambaukila bantu baambaula mwaambo waci Quechua a Aymara. Twakali kubelesya moota yakajisi kaanda yalo njotwakali kwiita kuti Bwato nkaambo yakali kulibonya mbuli cibbokesi. Ndilayeeya mbocakali kukkomanisya kubelesya Bbaibbele kutondezya bantu aaba kuti ino-ino, Jehova uyoobumana bucete, kuciswa alufwu. (Ciy. 21:3, 4) Alimwi bunji bwabo bakaba bakombi ba Jehova.
Moota iyakali kwiitwa kuti “Bwato,” 1974
MBONDAKATALIKA KUBELEKELA KUMAOFESI MAPATI
Ciindi mukwesu Albert Schroeder wamu Kabunga Keendelezya ka Bakamboni ba Jehova naakaswaide ku Peru mu 1977, wakandikulwaizya kulembela ku Beteli kumaofesi mapati. Aboobo ndakalembela. Tiilyakalampa, mu June 17, 1977 ndakatalika kubelekela ku Beteli yaku Brooklyn. Kwamyaka yiinda ku 4 ndakali kubelekela mudipatimenti Iisalazya aya Maintenance.
Buzuba bwamucado wesu, 1979
Mu June 1978, ndakazyibana aba Elizabeth Avallone kumuswaangano wacooko wamasi iwakali mudolopo lya New Orleans, Louisiana. Abalo bakakomezyegwa abazyali ibakali kumubelekela Jehova camoyo woonse mbubwenya mbuli ndime. Nondakazyibana ambabo, bakali kale bapainiya kwamyaka iili 4 alimwi bakaliyandide kuzumanana kumubelekela Jehova mumulimo waciindi coonse mubuumi bwabo boonse. Aboobo twakazumanana kubandika. Mpoonya kakutanainda ciindi cilamfwu, twakazyibana kabotu akutalika kuyandana. Twakakwatana mu October 20, 1979, akuzumanana amulimo waa Beteli katuli banabukwetene.
Bakwesu abacizyi bamumbungano motwakabede kusaanguna ya Brooklyn Spanish, bakatutondezya luyando kapati. Alimwi twakabeleka mumbungano zimbi zyotatwe mwalo imwakali bakwesu abacizyi ibakazumanana kututondezya luyando akutukulwaizya kuzumanana amulimo wesu waa Beteli. Alimwi tulalumba kapati akaambo kalugwasyo lwabo alugwasyo lwabalongwe besu abanamukwasyi, ibakali kutugwasyilizya kulanganya bazyali besu ibakacembeede.
Bamukwasyi wa Beteli ibakali kuswaangana ambungano ya Brooklyn Spanish, 1986
MBONDAKATALIKA MULIMO WAMU LEGAL DEPARTMENT
Mu January 1982 ndakagambwa nondakaambilwa kuti nditalike kubelekela mu Legal Department a Beteli. Mpoonya nokwakainda myaka yotatwe, ndakalombwa kuti nduunke kuyunivesiti kutegwa ndikaiye akuba loya. Okuya ndakazyiba kuti bantu bamu United States alimwi amuzisi zimbi bakalijisi lwaanguluko lwakucita zintu akaambo kamilandu njobakawina Bakamboni ba Jehova. Milandu eeyi iiyandika kapati yakali kubandikwa mukkilasi.
Mu 1986 nondakajisi buyo myaka iili 30, ndakasalwa kuba mulangizi wa Legal Department. Ndakakkomana kapati akaambo kamulimo ooyu ngondakapegwa, pele aciindi nciconya ndakalibilika nkaambo kwakali zintu zinji nzyondatakazyi alimwi ndakalizyi kuti ooyu tiiwakali mulimo muubauba pe.
Mu 1988, ndakeelela kuba loya uukonzya kwiima munkuta. Pele tiindakabwene lwiiyo oolu mbolwakandinyonganya alimwi acilongwe cangu a Jehova. Lwiiyo lwaatala lulakonzya kupa muntu kutalika kulisumpula akulibona kuti ulayandika kapati kwiinda baabo batalujisi. Nokuba boobo, bakaintu bangu ba Elizabeth bakandigwasya kutalika kucita zintu zyakali kukonzya kupa kuti ndiyumye cilongwe cangu a Jehova, mbubwenya mbondakali kucita kanditanaunka kuyunivesiti. Aboobo mukuya kwaciindi ndakaba acilongwe ciyumu a Jehova alimwi. Kweelana azintu zyakandicitikila, ndakazyiba kuti ikuba aluzyibo lunji tacili ncecintu ciyandika kapati mubuumi. Pele ciyandika kapati calo cikonzya kupa muntu kukkomana, nkuba acilongwe ciyumu a Jehova, kumuyanda kapati alimwi akuyanda bantu bakwe.
KUKWABILILA AKUSITIKIZYA MAKANI MABOTU MUMULAWO
Nondakamana kwiiya kuba loya, ndakatalika kubikkila maano kulanganya izyakali kuyandika a Beteli kweelana amulawo alimwi akwiiminina ziyandika zya Bwami munkuta. Mulimo wangu wakali kukkomanisya pele alimwi kwakali buyumuyumu akaambo kakuti zintu zyakali kucinca cakufwambaana mumbunga yesu. Mucikozyanyo, kaindi kutegwa muntu abweze cakumwaya cesu wakeelede kusanga. Pele mu 1990, Legal Department yakalombwa kuti ipe busolozi kujatikizya mbocakali kukonzya kulesyegwa eeci. Mpoonya kuzwa ciindi eeco, Bakamboni ba Jehova bakaleka kubbadelesya zyakumwaya zyabo. Eeci cakapa kuti mulimo iwakali kucitwa a Beteli amumuunda uubaube alimwi akutabbadela mitelo iitayandiki. Bamwi bakali kuyeeya kuti kucinca ooku kwakali kuyoopa kuti mbunga imaninwe mali alimwi akunyonganya mulimo wakukambauka. Pele oobo tabusyi mbocakaba. Mweelwe wabaabo ibakatalika kubelekela Jehova, wayungizyika kapati kuzwa mu 1990 alimwi mweelwe mupati wabantu balakonzya kuba acakulya cakumuuya kakunyina kubbadela. Ndabona kuti kwiinda mukugwasyigwa a Jehova alimwi abusolozi mbwatupa muzike uusyomeka, capa kuti kucinca kupati kucitika mumbunga kakuzwidilila.—Kul. 15:2; Mt. 24:45.
Tatuwini milandu munkuta akaambo kakuti tujisi bamaloya bali kabotu. Pele kanji-kanji icipa kuti babetesi alimwi abeendelezi kabatugwasya, mbukkale bubotu bwabantu ba Leza. Ndakacibona eeci mu 1998 ciindi bamu Kabunga Keendeelezya botatwe abamakaintu babo nobakajanika kumiswaangano yacooko yaalubazu ku Cuba. Luzyalo lwabo alimwi akulilemeka kabotu, zyakapa bumboni kapati kubeendelezi bamfwulumende kuti tatutoli lubazu mumapolitikisi kwiinda zintu nzyotwakali kubaambila ciindi notwakali kuba amiswaangano ambabo.
Nokuba boobo, zimwi ziindi nzila ilikke iyakali kukonzya kupa kuti kube bululami munkuta ‘nkukwabilila akusitikizya makani mabotu mumulawo.’ (Flp. 1:7) Mucikozyanyo, kwamyaka minji beendelezi baku Europe alimwi aku South Korea, kunyina ncobakazyi kujatikizya lwaanguluko lwesu lwakukaka kucita mulimo wabusikalumamba. Akaambo kaceeci, bakwesu babalilwa ku 18,000 mu Europe alimwi abainda ku 19,000 ku South Korea, bakaangwa akaambo kakuti manjezyeezya aabo tanaakali kubazumizya kutola lubazu mumulimo wabusikalumamba.
Kumane mu July 7, 2011, nkuta ya European Court of Human Rights yakapanga kusala kupati ikwakali kwiitwa kuti Bayatyan v. Armenia. Kusala ooku kwakali kwaamba kuti masi oonse amu Europe akeelede kuzumizya baabo ibakali kukaka kunjila mulimo wabusikalumamba akaambo kabukombi bwabo kucita milimo iimbi iitali yabusikalumamba. Kusala kukozyenye akooku kwakacitwa ankuta iitegwa South Korean Constitutional Court mu June 28, 2018. Notwatakawina ikuti bakwesu bakubusi nobaba basyoonto buyo, nobakatola lubazu mutwaambo twacisi.
Bamu Legal Department kumaofesi mapati alimwi amumitabi nyika yoonse, balabeleka canguzu kwiiminina lwaanguluko lwakukomba Jehova alimwi akukambauka makani mabotu. Tulikkomene kubagwasya bakwesu abacizyi ibakazyigwa amfwulumende. Tacikwe makani tulawina naa pe, twazumanana kupa bumboni kubeendelezi abami alimwi akuli bamasi. (Mt. 10:18) Babetesi, baiminizi bamfwulumende, basimubweza twaambo alimwi abanamaleya, beelede kwaalanga-langa magwalo ngotubikkilizya mumapepa ngotutola kunkuta alimwi anzyotuzubulula ciindi notuli munkuta kutegwa tuliiminine. Cikkomanisya ncakuti, babombe myoyo batuzyiba Tobakamboni ba Jehova akuti nzyotusyoma ziyeeme aa Bbaibbele. Eeci capa kuti bamwi babe bakwesu abacizyi.
NDALUMBA JEHOVA!
Kwamyaka iili 40 yainda, ndajisi coolwe cakubeleka kulanganya makani munkuta antoomwe amitabi yiindene-indene nyika yoonse alimwi akujanika munkuta zipati-pati zinji akubonana ankumekume. Ndilaukkomanina akuulemeka mulimo ngobacita babelesima mu Legal Department kumaofesi mapati alimwi amumitabi nyika yoonse. Masimpe ndalongezyegwa kapati mubuumi.
Ba Elizabeth bali kundigwasyilizya cakusyomeka kwamyaka iili 45 yainda muziindi zili kabotu alimwi azitali kabotu. Akaambo kaceeci ndilabayanda nkaambo balikundigwasya nokuba kuti baciswa bulwazi bubapa kubula nguzu.
Twalibonena kuti kuwina koonse ikwalikucitika, tiikwali kukonzyeka akaambo kanguzu zyesu. Pele mbubwenya mbuli Davida mbwaakaamba, “Jehova ninguzu zyabantu bakwe.” (Int. 28:8) Masimpe, “nkondo njiya Jehova.”