Amusyome Kuti Jehova Ulamuyanda

1. Nkaambo nzi ncomwakalyaaba kumubelekela Jehova? (Amubone acifwanikiso.)

SENA mulayeeya ciindi nomwakalyaaba kumubelekela Jehova? Mwakapanga cakusala eeco akaambo kakuti mwakamuzyiba alimwi akumuyanda. Tacidoonekwi buya kuti aciindi eeco, mwakamusyomezya kuti kucita kuyanda kwakwe cinooli ncecintu ciyandika kapati mubuumi bwanu alimwi akuti muyoozumanana kumuyanda amoyo wanu woonse, buumi bwanu boonse, mizeezo yanu yoonse alimwi anguzu zyanu zyoonse. (Mk. 12:30) Kuzwa ciindi eeco, luyando ndomujisi kulinguwe lwakomena kapati. Aboobo, mbuti mbomukonzya kwiingula ikuti muntu umwi wamubuzya kuti, “Sena muli masimpe kuti mulamuyanda Jehova?” Kakunyina kuwayawaya, mulakonzya kwiingula kuti, “Ndilamuyanda kapati kwiinda muntu uuli woonse naa cintu cili coonse.”

2-3. Ncinzi Jehova ncayanda kuti tusyome? Ncinzi ncotutiibandike mucibalo eeci? (Jeremiya 31:3)

² Ino inga mwaingula buti ikuti muntu umwi wamubuzya kuti, “Sena muli masimpe kuti Jehova ulamuyanda?” Sena mulakonzya kuwayawaya kwiingula, kamuyeeya kuti ambweni tamweeleli kuyandwa a Jehova? Mucizyi umwi iwakali kulimvwa kutayandwa ciindi naakali mwana wakaamba kuti: “Ndilizyi kuti ndilamuyanda Jehova amoyo wangu woonse alimwi tandidooneki kujatikizya makani aaya. Pele kanji-kanji, inga ndiladooneka kuti naa walo ulandiyanda.” Aboobo ncinzi cikonzya kumugwasya ikuzyiba kuti Jehova ulamuyanda ncobeni?

³ Jehova uyanda kuti musyome kuti ulamuyanda. (Amubale Jeremiya 31:3.) Bwini mbwakuti nguwakamukwela kulinguwe. Mpoonya ciindi nomwakalyaaba akubbapatizyigwa, wakamupa cipego cakwe ciyandisi, nkokuti luyando lwakwe lutamani. Eeci caamba kuti ulamuyanda kapati alimwi takamusiyi pe. Akaambo kakuti Jehova ulijisi luyando lutamani kubabelesi bakwe boonse basyomeka kubikkilizya andinywe, ubabona kuba mbuli ‘lubono lwakwe luyandisi.’ Aboobo mulakonzya kuba masimpe kuti mulayandika kapati kulinguwe. (Malk. 3:17) Jehova uyanda kuti mulimvwe mbwaakalimvwa mwaapostolo Paulo. Nkaambo wakalisinizyide kuti Jehova ulamuyanda kapati cakuti wakalemba kuti: “Ndilisinizyide kuti lube lufwu, naa buumi, naa bangelo, naa mfwulumende, naa zintu ziliko lino, naa zilangilwa kumbele, naa nguzu, naa zintu zili mujulu, naa zili ansi, naa cilenge cimbi cili coonse tazikonzyi pe kutwaandaanya kuluyando lwa Leza.” (Rom. 8:​38, 39) Mucibalo eeci, tulabandika kaambo ncotukonzya kusyoma kuti Jehova ulatuyanda alimwi acikonzya kutugwasya kutegwa tucite boobo.

KAAMBO NCOTWEELEDE KUSYOMA KUTI JEHOVA ULATUYANDA

4. Mbubeji nzi Saatani mbwayanda kuti tusyome?

⁴ Ikuti katusyoma kuti Jehova ulatuyanda, tuyoocikonzya kwiima nji akukazya “bucenjezu” bwa Saatani. (Ef. 6:11) Makanze aa Saatani ngakutulesya kubelekela Jehova. Aboobo uyoosolekesya kucita kufwumbwa ncakonzya kutegwa aazuzikizye makanze aakwe. Nzila imwi mbwacita oobo nkwiinda mukutupa kuyeeya kuti Jehova tatuyandi. Pele ooko nkubeja. Bbaibbele likozyanisya Saatani kuli syuumbwa. (1Pet. 5:​8, 9) Basyuumbwa inga balayanda kujata banyama ibalibonya kubula nguzu alimwi ibatakonzyi kulikwabilila. Mbubwenya buyo, Saatani ulatulwana ciindi notutyompedwe, notukatede naa kuusa akaambo kazintu zibyaabi izyakatucitikila kaindi, mapenzi ngotujisi lino naa kulibilika akaambo kazintu ziyoocitika kumbele. (Tus. 24:10) Saatani uyeeya kuti ulakonzya kututyompya akutupa kuti tucileke kumubelekela Jehova. Pele tulakonzya ‘kumukazya’ alimwi anzila zyakwe zyabucenjezu nzyabelesya kwiinda mukucita kufwumbwa ncotukonzya kusinizya kuti Jehova ulatuyanda.—Jak. 4:7.

5. Nkaambo nzi ncociyandika kapati kusyoma kuti Jehova ulatuyanda?

⁵ Ikuti katusyoma kuti Jehova ulatuyanda, cilongwe ncotujisi anguwe ciyooyuma. Nkaambo nzi ncotwaambila boobu? Jehova wakatulenga munzila yakuti katucikonzya kutondezya luyando alimwi akulimvwa kuyandwa. Ciindi umwi naatutondezya luyando, andiswe inga tulakulwaizyigwa kucita mbubonya kulinguwe. Aboobo ikuti twasyoma kuti Jehova ulatuyanda, ciyootukulwaizya kuti andiswe tumuyande kapati. (1Joh. 4:19) Alimwi notuzumanana kumuyanda kapati, awalo uyoozumanana kutuyanda. Nkaambo Bbaibbele lyaamba kuti: “Amuswene kuli Leza, eelyo awalo ulaswena kulindinywe.” (Jak. 4:8) Pele ino inga twasinizya buti kuti Jehova ulatuyanda?

NCINZI CIKONZYA KUMUGWASYA KUSINIZYA KUTI JEHOVA ULAMUYANDA?

6. Ikuti kamutasinizyide kuti Jehova ulamuyanda, ncinzi ncomukonzya kucita?

⁶ Amuzumanane kupaila kuli Jehova kutegwa amugwasye kubona kaambo ncamuyandila. (Lk. 18:1; Rom. 12:12) Buzuba abuzuba, amupaile kuli Jehova ziindi zinji kutegwa amugwasye kubona mbwalimvwa kujatikizya ndinywe. Zimwi ziindi, mulakonzya kulimvwa bubi kapati cakuti cilakonzya kumuyumina kusinizya kuti Jehova ulamuyanda. Pele kamuyeeya kuti walo mupati kwiinda moyo wanu. (1Joh. 3:​19, 20) Ulimuzyi kabotu kwiinda mbomulizyi nobeni alimwi ulabona zintu nzyomutakonzyi kubona. (1Sam. 16:7; 2Mak. 6:30) Aboobo mutawayiwayi ‘kumwaambila zyoonse’ zili mumoyo wanu alimwi akumulomba kuti amugwasye kusinizya kuti ulamuyanda. (Int. 62:8) Mpoonya amucite zintu kweelana amipailo yanu kwiinda mukucita zintu zitobela.

7-8. Mbuti bbuku lya Intembauzyo mbolitugwasya kusinizya kuti Jehova ulatuyanda?

⁷ Amuzisyome Jehova nzyaamba. Jehova wakasololela balembi ba Bbaibbele kumupandulula bwini mbwabede. Mucikozyanyo, amubone nzila mbotu Davida mbwaakamupandulula Jehova. Wakalemba kuti: “Jehova ulaafwaafwi abaabo batyompedwe mumoyo; aabo bapengede mumizeezo ulabafwutula.” (Int. 34:18) Masimpe kuti ciindi nomutyompedwe, mulakonzya kulimvwa kuti kunyina uukonzya kumvwisya mbomulimvwa alimwi akumugwasya. Pele Jehova usyomezya kuti muziindi zili boobo ulaafwaafwi kapati andinywe akaambo kakuti ulibwene kuti muyandika kugwasyigwa anguwe. Mu Intembauzyo iimbi, Davida wakalemba kuti: “Kobikka misozi yangu munkomo yako yacikutu.” (Int. 56:8) Aboobo eeci caamba kuti Jehova ulamubona ciindi nomuuside alimwi anomupenga. Ulamubikkila maano kapati. Alimwi ciindi nomupenga, awalo cilamucisa kapati mumoyo. Mbubwenya dosi lyameenda kuzwa munkomo yacikutu mboliyandika kapati kuli silweendo uuli mucimpayuma, ayalo misozi yanu ilayandika kapati kuli Jehova. Alimwi ulayeeya ciindi cili coonse nomuli mumapenzi anomulila. Alimwi Davida wakaambila Jehova kuti: “Ulizizyi kabotu nzila zyangu zyoonse.” (Int. 139:3) Aboobo, nokuba kuti Jehova ulabona zintu zyoonse zijatikizya ndinywe, pele ubikkila kapati maano kuzintu zibotu nzyomucita. (Heb. 6:10) Nkaambo nzi? Akaambo kakuti ulalumba kapati kukusolekesya kuli koonse nkomucita kutegwa mumukkomanisye.a

⁸ Kwiinda mumagwalo aaya aawumbulizya aajanika mu Jwi lyakwe, Jehova munzila imwi umwaambila kuti: “Ndiyanda kuti uzyibe mbondikuyanda kapati alimwi ambondikubikkila maano kapati.” Mbubwenya mbotwaiya kale, Saatani usumpula bubeji bwakuti Jehova tatuyandi. Aboobo ikuti zimwi ziindi mwatalika kudooneka naa ncobeni Jehova ulamuyanda, amulibuzye kuti, ‘Ino nguni ngondiyanda kusyoma? Sena ndiyanda kusyoma Saatani ‘usyi wabubeji’ naa Jehova “Leza wakasimpe”?’—Joh. 8:44; Int. 31:5.

9. Ino Jehova ubasyomezya nzi aabo bamuyanda? (Kulonga 20:​5, 6)

⁹ Amuzinzibale kuyeeya Jehova mbwalimvwa kujatikizya baabo bamuyanda. Amubone Jehova ncaakaambila Musa alimwi abana Israyeli. (Amubale Kulonga 20:​5, 6.) Jehova usyomezya kuti uyoozumanana kutondezya luyando kuli baabo bamuyanda. Mbwaanga ulasyomeka, tulakonzya kuba masimpe kuti kunyina nayakwaalilwa kutondezya luyando kuli baabo bamuyanda. (Neh. 1:5) Aboobo ikuti zimwi ziindi mwatalika kudooneka kuti naa ncobeni Jehova ulamuyanda, amulibuzye kuti, ‘Sena mebo ndilamuyanda Jehova?’ Mpoonya amuyeeye kujatikizya kaambo aaka: Ikuti kamumuyanda alimwi akusolekesya kucita kufwumbwa ncomukonzya kutegwa mumukkomanisye, nkokuti mulakonzya kuba masimpe kuti awalo ulamuyanda kapati. (Dan. 9:4; 1Kor. 8:3) Munzila imwi, ikuti kamutadooneki kuti mulamuyanda Jehova, nkokuti andinywe tamweelede kudooneka kuti ulamuyanda. Aboobo mulakonzya kuba masimpe kuti lyoonse unoomuyanda alimwi kunyina naayoomusiya pe.

10-11. Ino Jehova uyanda kuti kamucibona buti cinunuzyo? (Bagalatiya 2:20)

¹⁰ Amuzinzibale kuyeeya kujatikizya cinunuzyo. Cipaizyo cacinunuzyo ca Jesu Kristo, ncecipego ca Leza cipati ciinda zyoonse. (Joh. 3:16) Pele sena cinunuzyo ncipego canu kumugama? Inzya. Kamuyeeya zyakamucitikila mwaapostolo Paulo. Wakacita zintu zibyaabi kapati katanaba Munakristo. Alimwi nociba ciindi naakaba Munakristo, wakeelede kuzumanana kukulwana kulezya kwakwe. (Rom. 7:​24, 25; 1Tim. 1:​12-14) Nokuba boobo, wakali kubona cinunuzyo kuba cipego cakwe kumugama kuzwa kuli Jehova. (Amubale Bagalatiya 2:20.) Kamuyeeya kuti Jehova wakasololela mwaapostolo Paulo kulemba majwi aaya mu Jwi lyakwe Bbaibbele kutegwa twiiye kuli ncaakalemba. (Rom. 15:4) Majwi ngaakalemba Paulo atondezya kuti Jehova uyanda kuti kamubona cinunuzyo kuba cipego canu kumugama kuzwa kulinguwe. Ikuti mwazumanana kubona cinunuzyo munzila eeyi, ciyoomugwasya kusinizya kuti Jehova ulamuyanda kapati.

¹¹ Eelo kaka tulamulumba kapati Jehova akaambo kakutuma Jesu anyika kuti azootufwide! Pele alimwi Jesu wakaboola anyika kutegwa azikwaambile bamwi kasimpe kujatikizya Leza. (Joh. 18:37) Kasimpe aako kalabikkilizya Jehova mbwabayanda kapati bana bakwe.

JESU MBWAMUGWASYA KUSINIZYA KUTI JEHOVA ULAMUYANDA

12. Nkaambo nzi ncotukonzya kuzisyoma Jesu nzyaakaamba kujatikizya Jehova?

¹² Ciindi naakali anyika, Jesu wakamupandulula kabotu Jehova mbwabede. (Lk. 10:22) Tulakonzya kuzisyoma Jesu nzyaakaamba kujatikizya Jehova. Nkaambo nzi? Nkaambo kayi walo wakakkala a Jehova kujulu kwamyaka minji katanaboola anyika. (Kol. 1:15) Jesu ulizyi kabotu walo mbobamuyanda kapati Bausyi alimwi wakalibonena Bausyi mbobabayanda bangelo alimwi abantu basyomeka. Pele ino Jesu wakabagwasya buti bamwi kusinizya kuti Jehova ulabayanda?

13. Ino Jesu uyanda kuti katumubona buti Jehova?

¹³ Jesu uyanda kuti katubona Jehova mbuli mbwacita walo. Mu Mabbuku aa Makani Mabotu, Jesu wakaamba Jehova kuti ngu “Taata” kwaziindi ziinda ku 140. Alimwi ciindi naakali kubandika abasikumutobela, wakali kubelesya mabala aakuti “Uso” naa “Uso wanu wakujulu.” (Mt. 5:16; 6:26) Katanaboola anyika Jesu, babelesi basyomeka bakali kwiita Jehova kuti ‘Singuzuzyoonse,’ ‘Mupatikampatila,’ ‘Mulengi Mupati’ alimwi amazina aambi aabulemu. Pele Jesu kanji-kanji wakali kwiita Jehova kuti “Taateesu.” Bbala eeli litondezya kuti Jehova uyanda kuti babelesi bakwe kabalimvwa kuyandwa anguwe mbubwenya mwana uuyandwa kapati abausyi mbwalimvwa. Aboobo Jesu wakali kuyiisya kuti Jehova ulatuyanda mbubwenya usyi mubotu mbwabayanda bana bakwe. Lino atulange-lange zikozyanyo zyobilo Jesu naakabelesya bbala eeli kupandulula Jehova.

14. Mbuti Jesu mbwaakatondezya kuti umwi aumwi wesu ulayandika kapati kuli Taateesu wakujulu? (Matayo 10:​29-31) (Amubone acifwanikiso.)

¹⁴ Kusaanguna, amubone Jesu ncaakaamba kulugwalo lwa Matayo 10:​29-31. (Amubale.) Tutiiti, ntuyuni tusyoonto kapati tutakonzyi kumuyanda naa kumukomba Jehova. Pele Taateesu ulakabikkila maano katiiti kamwi akamwi alimwi ulazyiba nociba ciindi nokawa aansi. Ikuti Jehova katubikkila maano tuyuni ootu tusyoonto kapati, nkokuti tulakonzya kuba masimpe kuti ulatubikkila maano swebo notumubelekela akaambo kakuti tulamuyanda. Jesu alimwi wakaamba kuti Taateesu ulaazyi masusu umwi aumwi wesu ngajisi. Aboobo ikuti naa Jehova kabikkila maano kutuntu tusyoonto kujatikizya ndiswe, tulakonzya kuba masimpe kuti ulatubikkila maano kapati. Cilisalede kuti Jesu uyanda kuti tusinizye kuti tulayandika kapati kuli Taateesu wakujulu.

15. Ino majwi aa Jesu aajanika kulugwalo lwa Johane 6:44 amwaambila nzi kujatikizya Taateesu wakujulu?

¹⁵ Amubone cikozyanyo cabili Jesu naakabelesya bbala eeli lyakuti “Taata.” (Amubale Johane 6:44.) Taateesu wakujulu ngowakamukwela kukasimpe. Nkaambo nzi? Akaambo kakuti wakabona bube bumwi bubotu mulindinywe. (Mil. 13:48) Ciindi Jesu naakali kwaamba majwi aajanika kulugwalo lwa Johane 6:​44, kweelede kuti wakali kwaamba majwi aa Jehova aajanika kulugwalo lwa Jeremiya 31:3. Kulugwalo oolu, Jehova wakaambila bantu bakwe kuti: “Ndakukwelela kulindime aluyando lutamani [naa, ndazumanana kukutondezya luyando lutamani].” (Jer. 31:3; bupanduluzi buyungizyidwe; amweezyanisye a Hosea 11:4.) Amuyeeye buyo eeci ncocaamba. Taateesu wakujulu lyoonse ulabona bube bubotu mulindinywe bwalo mbomutakonzyi kubona.

16. (a) Ncinzi Jesu ncasola kutwaambila? Nkaambo nzi ncotweelede kumusyoma? (b) Ncinzi cikonzya kutugwasya kusinizya kuti Jehova ngo Taateesu wiinda kubota? (Amubone kabbokesi kakuti “Taata Uukonzya Kutugwasya Toonse.”)

¹⁶ Kwiinda mukwaamba Jehova kuti ngu Taateesu, Jesu munzila imwi usola kutwaambila kuti: “Jehova tali buyo Usyi wangu, pele ngu Usyi wanu andinywe. Aboobo ndimwaambila kuti ulamuyanda kapati alimwi ulamubikkila maano umwi aumwi wanu.” Aboobo ikuti zimwi ziindi kamudooneka kuti naa Jehova ulamuyanda, amulibuzye kuti, ‘Sena tandeelede kwaasyoma majwi aa Mwana uubazyi kabotu Bausyi alimwi lyoonse iwaamba zyamasimpe?’—1Pet. 2:22.

AMUZUMANANE KUYUMYA LUSYOMO LWANU LWAKUTI JEHOVA ULAMUYANDA

17. Nkaambo nzi ncotweelede kuzumanana kuyumya lusyomo lwesu lwakuti Jehova ulatuyanda?

¹⁷ Tweelede kuzumanana kuyumya lusyomo lwesu lwakuti Jehova ulatuyanda. Mbubwenya mbotwaiya kale, sinkondoma Saatani ulasolekesya kucita kufwumbwa ncakonzya kutegwa atulesye kumubelekela Jehova. Ujisi makanze aakututyompya. Aboobo, uyoozumanana kutupa kudooneka naa ncobeni Jehova ulatuyanda. Pele tutabusyomi naaceya bubeji bwakwe.—Job. 27:5.

18. Mbuti mbomukonzya kuyumya lusyomo lwanu lwakuti Jehova ulamuyanda?

¹⁸ Kutegwa muyumye lusyomo lwanu lwakuti Jehova ulamuyanda, amuzumanane kupaila kulomba kuti amugwasye kulibona mbwamubona. Amuzinzibale kuyeeya tupango twamu Bbaibbele itupandulula Jehova mbwababikkila kapati maano aabo bamuyanda. Kamuyeeya kuti lyoonse Jehova ulamuyanda ooyo uumutondezya luyando. Alimwi mutalubi kuti wakamupa cinunuzyo kacili cipego canu kumugama. Kunze lyaboobo, amwaasyome majwi aa Jesu aakuti Jehova ngu Uso wanu wakujulu. Mpoonya ikuti umwi akamubuzye kuti: “Sena muli masimpe kuti Jehova ulamuyanda?” Kakunyina akudooneka muyoomwiingula kuti: “Inzya ulandiyanda, alimwi buzuba abuzuba ndilasolekesya kucita zintu zitondezya kuti ndilamuyanda.”