Amubagwasye Aabo Balibambilide Kumvwa Makani Mabotu

1. Ino bantu baindana buti kujatikizya mbobaatambula makani mabotu? (Mil. 13:​47, 48; 16:​14, 15)

BANTU banji mumwaanda wamyaka wakusaanguna bakakatambula kasimpe mbobakaumvwida buyo mulumbe wa Bwami. (Amubale Milimo 13:​47, 48; 16:​14, 15.) Mbubwenya buyo amazuba aano, ibanji balakkomana nobamvwa makani mabotu ciindi cakusaanguna. Nobaba baabo ibatakautambula mulumbe wa Bwami ciindi cakusaanguna, mukuya kwaciindi bakayanda kutalika kwiiya kujatikizya Leza akuyanda kumukomba. Aboobo, ncinzi ncotweelede kucita ikuti twajana bantu balibambilide kumvwa makani mabotu mumulimo wamumuunda?

2. Muunzila nzi mulimo wesu wakugwasya bantu kuba basikwiiya moukozyenye awamulimi?

² Amubone cikozyanyo eeci. Mulimo wesu wakugwasya bantu kuti babe basikwiiya ulakonzya kukozyanisyigwa awamulimi. Ciindi cisyango cimwi nocabizwa, mulimi ulacitebula. Nokuba boobo, ulazumanana kwiitilila nyika alimwi buya ulakonzya kusyanga zisyango zimbi. Mbubwenya buyo, ciindi notwajana muntu uulibambilide kutambula mulumbe wesu, tulamugwasya kuba sikwiiya wa Kristo cakufwambaana. Pele kulibaabo batalibambilide, tulazumanana kubagwasya kubona kuti ncibotu kwiiya kujatikizya Leza a Bbaibbele. (Joh. 4:​35, 36) Aboobo ciindi notwazyiba kuti bantu balayanda kumvwa mulumbe wamu Bbaibbele naa pe, tuyoobona mbotukonzya kubagwasya munzila mbotu. Mucibalo eeci, tulabona ncotukonzya kucita kutegwa tubagwasye aabo balibambilide kumvwa makani mabotu. Kunze lyaboobo, tulabona mbotukonzya kubagwasya kuyumya cilongwe cabo a Jehova alimwi akuba bakombi bakwe.

CIINDI NOTWAJANA BANTU BALIBAMBILIDE KUMVWA MAKANI MABOTU

3. Ncinzi ncotweelede kucita ciindi notwajana bantu balaaluyandisisyo mumulimo wakukambauka? (1 Bakorinto 9:26)

³ Ciindi notwajana bantu balaaluyandisisyo mumulimo wakukambauka, mpoonya-mpoonya tweelede kubagwasya kutegwa batalike kweendela munzila iitola kubuumi. Mubukkale buli boobo, tatweelede kuwayawaya kutalisya ciiyo ca Bbaibbele akubatamba kumiswaangano mulweendo ndomunya lwakusaanguna.—Amubale 1 Bakorinto 9:26.

4. Amwaambe cakuluula camuntu umwi iwakalibambilide kwiiya Bbaibbele mpoonya-mpoonya.

⁴ Kutalisya ciiyo ca Bbaibbele. Bantu bamwi mbotukambaukila balayanda kutalika kwiiya Bbaibbele mpoonya-mpoonya. Mucikozyanyo muli Bwane, mukaintu umwi waku Canada wakaunka akakkocci kakubikkila mabbuku akubweza broshuwa yakuti Amupone Kukabe Kutamani! Kumane mucizyi iwakali akakkocci aako wakamupandulwida kuti ulakonzya kuba aciiyo ca Bbaibbele citabbadelelwi kubelesya broshuwa eeyo. Mukaintu ooyu wakaakkomanina makani aaya cakuti bakapana manamba aamafooni. Buzuba mbubwenya oobo, mukaintu ooyu wakalembela mucizyi kameseji kubuzya nobakali kuyootalika kwiiya. Ciindi naakamwaambila kuti wakali kuyoomuswaya kumamanino aansondo, mukaintu ooyu wakabuzya kuti “Mbuti kujatikizya juunza? Ndinooliko aŋanda.” Aboobo, bakatalika kwiiya muli Bwasanu. Kumane mukaintu ooyu wakajanika kumuswaangano wakumamanino aansondo ciindi cakusaanguna akuzumanana kuyaambele.

5. Mbuti mbotukonzya kubelesya bupampu ciindi notuyanda kutalisya ciiyo ca Bbaibbele? (Amubone azifwanikiso.)

⁵ Kwaamba masimpe, tabali bantu boonse bakonzya kuyanda kutalika kwiiya Bbaibbele mbuli mukaintu uulya. Ibamwi inga bayandika ciindi. Aboobo ciindi cakusaanguna, inga twayandika kutalisya mubandi kwiinda mukubelesya makani ngakkomanina muntu. Nokuba boobo, ikuti katubabona munzila yeelede bantu akubabikkila maano, tulakonzya kutalisya ciiyo ca Bbaibbele muciindi cisyoonto buyo. Pele ncinzi ncotukonzya kwaamba ciindi notuyanda kutalisya ciiyo ca Bbaibbele? Ooyu ngomubuzyo ngobakabuzyigwa bakwesu abacizyi ibacibwene kutalisya ziiyo zya Bbaibbele.

6. Ncinzi ncotukonzya kucita kutegwa mubandi uzumanane ciindi notubandika amuntu uujisi luyandisisyo?

⁶ Bakwesu abacizyi ibakabuzyigwa bakapandulula kuti mumasi amwi cilagwasya kweeleba mabala mbuli aakuti “ciiyo,” “lwiiyo lwamu Bbaibbele” naa “kumuyiisya” ciindi nobapandulula ciiyo ca Bbaibbele. Muciindi caboobo, inga cabota kubelesya mabala mbuli aakuti “mubandi” naa “kuzyiba Bbaibbele.” Mulakonzya kupa kuti mubandi uzumanane kwiinda mukwaamba kuti: “Eelo kaka cilakkomanisya kuzyiba mibuzyo iiyandika kapati kujatikizya buumi mboyiingulwa mu Bbaibbele,” naa kuti “Bbaibbele talili buyo bbuku lyaamba makani aabukombi pele lilakonzya kutugwasya munzila zyacigaminina.” Mpoonya mulakonzya kuyungizya akwaamba kuti: “Tacitoli ciindi cilamfwu, pele mumaminiti buyo aali 10 naa 15 mulakonzya kwiiya zintu ziyandika kapati.” Kwiinda mukucita boobo, mulakonzya kweeleba kubelesya mabala mbuli aakuti “ndaakuboola ndikamujane” naa “tunakwiiya nsondo ansondo,” calo cikonzya kupa sikwiiya kuyeeya kuti kwiiya Bbaibbele cilaminya.

7. Ndilili bamwi nobakakazyiba kasimpe kamu Bbaibbele? (1 Bakorinto 14:​23-25)

⁷ Amubatambe kumuswaangano. Kulibonya kuti muciindi camwaapostolo Paulo, bamwi bakakazyiba kasimpe kamu Bbaibbele ciindi nobakajanika kumuswaangano wa Bunakristo. (Amubale 1 Bakorinto 14:​23-25.) Eeci cilakonzya kucitika amazuba aano. Bunji bwabapya balafwambaana kuyaambele kumuuya ciindi nobatalika kujanika kumiswaangano yesu. Aboobo ndilili nomweelede kubatamba? Mubbuku lyakuti Amupone Kukabe Kutamani! muciiyo 10, kuli cibeela cibikkilizya kutamba bantu kumiswaangano. Pele tamweelede kulindila kuti mane mukasike muciiyo eeco nomuyamubatambe. Muciindi caboobo, kumatalikilo kwini kwamubandi wanu mulakonzya kubatamba kumuswaangano wakumamanino aansondo. Alimwi mulakonzya kubaambila mutwe wamakani aabuleya naa kwaamba kaambo kamwi kali mu Ngazi Yamulindizi Yakwiiya yansondo eeyo.

8. Ncinzi ncotukonzya kumwaambila muntu ciindi notumutamba kumiswaangano yesu? (Isaya 54:13)

⁸ Ciindi notutamba muntu uulaluyandisisyo, tweelede kumupandulwida mbotucita miswaangano munzila yiindene azikombelo zimbi. Mucikozyanyo, ciindi sikwiiya Bbaibbele umwi naakajanika kumuswaangano, wakabuzya bayi bakwe lya Ciiyo ca Ngazi Yamulindizi kuti: “Sena sikusololela ulaazyi mazina aabantu boonse?” Mucizyi wakamupandulwida kuti tulasolekesya kuzyiba mazina aabantu boonse bali mumbungano mbubwenya mbotuzyi mazina aabanamukwasyi. Sikwiiya ooyu wakagambwa kapati nkaambo eeci cakaliindene kapati acakali kucitika kucikombelo nkwaakali kuunka. Kunze lyaboobo, tulakonzya kumupandulwida nzila ayimbi miswaangano yesu mboyiindene. (Amubale Isaya 54:13.) Mucikozyanyo, tulakonzya kumupandulwida kuti tulaswaangana antoomwe kutegwa tukombe Jehova, tuyiisyigwe anguwe alimwi akukulwaizyanya umwi amweenzinyina. (Heb. 2:12; 10:​24, 25) Kucita boobu cipa kuti miswaangano yesu kayeenda kabotu muciindi cakutobela zilengwa. (1Kor. 14:40) Alimwi masena eesu aakukombela inga abambidwe kabotu calo cipa kuti kacuuba-uba kwiiya. Kunze lyaboobo, tatutoli lubazu mumapolitikisi amumanyongwe naa kubona cipani cimwi kuti cilayandika kwiinda cimbi. Aboobo inga cagwasya kumutondezyela limwi sikwiiya kavidiyo kakuti Ncinzi Cicitika ku Ŋanda ya Bwami? Kucita boobu ciyoopa kuti azyibe nzyayelede kulangila aakujanika kumiswaangano yesu.

9-10. Ciindi nomwatamba muntu umwi kumuswaangano, ncinzi ncomweelede kucita kutegwa azyibe kuti kunyina nomuyoomusungilizya kusangana cikombelo canu naa kutola lubazu? (Amubone acifwanikiso.)

⁹ Bamwi balawayawaya kujanika kumuswaangano akaambo kakuyoowa kuti tulabaambila kuti batusangane cikombelo. Amumwaambile muntu ooyo kuti tulakkomana kutambula beenzu akuti kunyina notubasungilizya kutusangana naa kutola lubazu. Mikwasyi ilitambidwe kujanika kubikkilizya abana basyoonto. Lyamiswaangano yesu, bana kunyina nobatambula malailile balikke. Muciindi caboobo, bazyali balakkala akwiiya antoomwe abana babo. Munzila eeyi, bazyali balazyiba bantu ibali abana babo alimwi anzyobayiisyigwa. (Dt. 31:12) Kunyina notwiinzya mbale akulombelela mali. Muciindi caboobo, tutobela mulawo wa Jesu wakuti: “Mwakapegwa kakunyina kubbadelesyegwa, amupe kakunyina kubbadelesya.” (Mt. 10:8) Kunze lyaboobo, mulakonzya kumwaambila muntu ooyo kuti teelede kusama zisani zidula buya kutegwa ajanike kumiswaangano. Nkaambo Leza ulanga moyo kutali muntu mbwalibonya atala.—1Sam. 16:7.

¹⁰ Ikuti naa muntu wajanika kumuswaangano, amucite kufwumbwa ncomukonzya kutegwa alimvwe kwaanguluka. Amumuzyibye kubaalu alimwi akuli basikumwaya bambi. Ikuti wabona kuti watambulwa kabotu, ulalangilwa kuyoopiluka alimwi. Mpoonya lyamuswaangano, ikuti naa katajisi Bbaibbele, amukkale anguwe akumugwasya kumvwisya makani aali mukupegwa alimwi ambotwiiya.

NCOMWEELEDE KUCITA CIINDI NOMWATALISYA CIIYO CA BBAIBBELE

11. Ncinzi ncomukonzya kucita ikutegwa mutondezye kuti mulacilemeka ciindi casikwiiya?

¹¹ Ntwaambo nzi ntotweelede kubikkila maano ciindi notwiiya amuntu? Amucilemeke ciindi casikwiiya. Tacikwe makani ambobacibona ciindi bantu bamucilawo canu, mweelede kusyomeka kuciindi ncomwamvwana. Kuyungizya waawo, cilakonzya kugwasya kufwiinsya mubandi ciindi cakusaanguna. Basikumwaya bacibwene bakaamba kuti ncibotu kufwiinsya mubandi nokuba kuti sikwiiya uciyanda kwiiya zinji. Alimwi tamweelede kuvwuzya zyakwaamba. Muciindi caboobo, amumuleke mukamwiniŋanda kuti aambe mbwalimvwa.—Tus. 10:19.

12. Nimbaakani nzi njomweelede kuba anjiyo ciindi nomwatalisya ciiyo ca Bbaibbele?

¹² Kumatalikilo kwini, mbaakani yanu yeelede kuba yakugwasya sikwiiya wanu kumuzyiba akumuyanda Jehova alimwi a Jesu. Mulakonzya kucita oobo kwiinda mukumwaambila ncolyaamba Bbaibbele muciindi cakwaamba mizeezo yanu. (Mil. 10:​25, 26) Mwaapostolo Paulo wakatusiila cikozyanyo cibotu mumakani aaya. Ciindi naakali kuyiisya, wakabikkila maano kwaamba makani aajatikizya Jesu walo iwakatumwa a Bausyi kutegwa atugwasye kubazyiba alimwi akubayanda. (1Kor. 2:​1, 2) Kunze lyaboobo, wakapandulula mbociyandika kugwasya bantu kuba abube buyandika bwalo ibukozyanisyidwe kungolida, nsiliva alimwi amabwe mayandisi. (1Kor. 3:​11-15) Bube bubotu oobu bubikkilizya lusyomo, busongo, bupampu alimwi akuyoowa Jehova. (Int. 19:​9, 10; Tus. 3:​13-15; 1Pet. 1:7) Aboobo, amwiiye cikozyanyo ca Paulo cakuyiisya kwiinda mukugwasya sikwiiya wanu kuyumya lusyomo lwakwe alimwi akuba acilongwe cimugeme a Usyi wakwe wakujulu siluyando, Jehova.—2Kor. 1:24.

13. Mbuti mbotukonzya kutondezya bube bwakukkazika moyo alimwi akumvwisya ciindi notugwasya bantu bajisi luyandisisyo? (2 Bakorinto 10:​4, 5) (Amubone acifwanikiso.)

¹³ Amwiiye Jesu mbwaakali kuyiisya kwiinda mukuba bantu bakkazika moyo alimwi bamvwisya. Amweelebe kubuzya mibuzyo yalo iikonzya kupa kuti muntu afwe nsoni. Ikuti naa kuli njiisyo njatamvwisyi sikwiiya wanu, tamweelede kuzumanana kwiibandika. Muciindi caboobo, mweelede kuzumanana aciiyo akuyoopilukila kunjiisyo eeyo aciindi cimbi. Muciindi cakumusungilizya kuzumina njiisyo njatamvwisyi, amumupe ciindi kutegwa kasimpe kazumanane kusimpa miyanda mumoyo wakwe. (Joh. 16:12; Kol. 2:​6, 7) Bbaibbele likozyanisya njiisyo zyakubeja kuzintu ziyumu nta zyalo nzyotweelede kumwaya. Mu Chigiriki, Bbaibbele likozyanisya njiisyo eezyi kungazi njumu yalo njotweelede kunyonyoona. (Amubale 2 Bakorinto 10:​4, 5). Tacikonzyi kuba cuuba-uba kuli sikwiiya kuleka kusyoma njiisyo nzyaali kusyoma kwaciindi cilamfwu. Aboobo, tweelede kusaanguna kumugwasya sikwiiya kuyaka ngazi mpya nkokuti kusyoma muli Jehova. Kwiinda mukucita boobo, ciyoomuubila sikwiiya kucileka kusyoma njiisyo zyakwe zyakaindi.—Int. 91:9.

CIINDI BAPYA NOBAJANIKA KUMISWAANGANO

14. Mbuti mbotweelede kubeendelezya bapya ibajanika kumiswaangano yesu?

¹⁴ Jehova uyanda kuti katutondezya luyando kubantu boonse tacikwe makani acisi nkobazwa, zilengwa naa mali ngobajisi. (Jak. 2:​1-4, 9) Aboobo, mbuti mbotukonzya kutondezya luyando kubantu ibajanika kumiswaangano yesu?

15-16. Mbuti mbotukonzya kugwasya bapya kulimvwa kwaanguluka nobajanika kumiswaangano yesu?

¹⁵ Bantu bamwi balajanika kumiswaangano yesu akaambo kakuyanda kubona cicitika naa ambweni muntu wakubusena bumwi wakabakulwaizya kuti bakajanike. Aboobo, tatweelede kuwayawaya kubandika abaabo ibajanika kumiswaangano yesu. Pele tweelede kubatambula amaanza obilo kakunyina kubapa kulimvwa kutaanguluka. Amubalombe kuti mukkale limwi alimwi akubelesya Bbaibbele abbuku liyiigwa antoomwe ambabo naa kubapa zyabo zibageme. Kunze lyaboobo, amuyeeye nzila azimbi mbomukonzya kubapa kulimvwa kwaanguluka. Mwaalumi umwi iwakaswaide ku Ŋanda ya Bwami wakaambila mukwesu iwakamutambula kuti tanaakaangulukide akaambo kambwaakasamide. Pele mukwesu wakamupa kulimvwa kwaanguluka kwiinda mukupandulwida kuti Bakamboni ba Jehova bali buyo mbuli bantu boonse. Mukuya kwaciindi, mwaalumi ooyo wakabbapatizyigwa pele tanaakaluba mukwesu mbwaakamupa kulimvwa kwaanguluka. Aboobo, ciindi notutondezya kuti tulababikkila maano bapya, tweelede kucenjela kuti tiitwababuzya mibuzyo yalo iikonzya kubapa kufwa nsoni naa iitatujatikizyi.—1Pet. 4:15.

¹⁶ Kunze lyaboobo, tulakonzya kubapa kulimvwa kwaanguluka munzila aimbi. Mucikozyanyo ciindi notubandika ambabo, notupa bwiinguzi alimwi anotujisi cibeela caamba bantu batali Bakamboni naa zintu nzyobasyoma, tweelede kutondezya bulemu. Tweelede kweeleba kubelesya mabala aakonzya kubatyompya naa aakonzya kubapa kulimvwa kuti tubasampaula buya. (Tit. 2:8; 3:2) Mucikozyanyo, tatweelede kusampaula zintu nzyobasyoma. (2Kor. 6:3) Bakwesu ibajisi coolwe cakupa makani aabuleya beelede kucenjela kujatikizya makani aaya. Alimwi beelede kubabikka mumizeezo baswiilizi ibatali Bakamboni kwiinda mukupandulula twaambo ntobatakonzyi kumvwisya.

17. Ino tweelede kuba ambaakani nzi ciindi notujana bantu ‘ibalibambilide’ kumvwa makani mabotu mumulimo wamumuunda?

¹⁷ Mbobuceda, mulimo wesu wakugwasya bantu kuba basikwiiya ulaindila kubinda alimwi tulazumanana kujana bantu ‘ibali amyoyo mibotu, ibalibambilide kutambula buumi butamani.’ (Mil. 13:48) Ciindi notwajana bantu bali boobu, tatweelede kuwayawaya kutalisya ziiyo zya Bbaibbele alimwi akubatamba kumiswaangano yesu. Kwiinda mukucita boobo, tuyoobagwasya kutalika kweendela ‘munzila iitola kubuumi.’—Mt. 7:14.