Mibuzyo Yabasikubala

Mulembi wa Tusimpi 30:​18, 19 wakaamba kuti ‘bweende bwamusankwa amusimbi’ ‘bulakatazya kumvwisya.’ Ncinzi ncaakali kupandulula?

Majwi aaya alabakatazya banji kumvwisya kubikkilizya abasikwiiya zyamu Bbaibbele bamwi. Mu Bbaibbele lya Busanduluzi bwa Nyika Mpya, tupango ootu twaamba kuti: “Kuli zintu zyotatwe nzyonditakonzyi kuzyiba [naa, “zindigambya kapati,” bupanduluzi buyungizyidwe] azintu zyone nzyonditamvwisyi: Bweende bwasikwaze mujulu, bweende bwanzoka amwala, bweende bwabwato mulwizi alimwi abweende bwamusankwa amusimbi.”—Tus. 30:​18, 19.

Kaindi twakali kusyoma kuti majwi aakuti ‘bweende bwamusankwa amusimbi’ akali kwaamba cintu cimwi citali kabotu. Nkaambo nzi? Akaambo kakuti mutupango tumwi mucaandaano eeci kwaambwa zintu zibi zyalo zitaambi kuti “mbubo twakkuta.” (Tus. 30:​15, 16) Mpoonya kapango 20 kaamba kujatikizya ‘mukaintu simamambe’ walo waamba kuti kunyina cibi ncaacita. Aboobo twakali kuyeeya kuti majwi aaya aamba cintu cikonzya kucita cintu cimwi kakunyina bamwi kuzyiba. Twakali kusyoma kuti mbubwenya sikwaze mbwauluka kapati kuya mujulu, inzoka mboyeenda amwala, bwato mbobweenda mulwizi, musankwa ulakonzya kucita cintu cimwi kakunyina bamwi kuzyiba ncaacita. Kweelana atwaambo twaambwa atala aawa, twakali kusyoma kuti majwi aakuti ‘bweende bwamusankwa amusimbi’ aamba cintu cimwi citali kabotu, nkokuti musankwa iweena musimbi akoona anguwe.

Pele kulibonya kuti kuli twaambo tweelede kutupa kusyoma kuti tupango ootu twaamba cintu cimwi cibotu. Mulembi wakali kupandulula buyo zintu izyakali kumugambya.

Malembe aakaindi aa Chihebrayo atondezya kuti tupango ootu twaamba cintu cimwi cibotu. Kweelana abbuku lyakuti Theological Lexicon of the Old Testament, ibbala lya Chihebrayo ilyakasandululwa kuti “nzyonditamvwisyi” kulugwalo lwa Tusimpi 30:​18, “lyaamba zintu zigambya naa zilibonya kuti tazikonzyeki.”

Syaazibwene Crawford H. Toy wakuyunivesiti ya Harvard ku United States awalo wakapandulula kuti tupango ootu twamu Bbaibbele tatwaambi cintu cimwi citali kabotu. Wakaamba kuti: “Mulembi wakali kusola buyo kupandulula mbozyakali kugambya zintu eezyi.”

Aboobo ncamaano kwaamba kuti majwi aali ku Tusimpi 30:​18, 19 apandulula zintu zigambya naa nzyotutakonzyi kumvwisya. Mbubwenya mbuli mulembi wa Bbaibbele, andiswe tulagambwa sikwaze mbwauluka kapati kuya mujulu, inzoka mboyeenda cakufwambaana amwala nokuba kuti taijisi maulu, bwato bulema mbobweenda mulwizi alimwi amusankwa amusimbi mbobakonzya kutalika kuyandana akukkala antoomwe calukkomano.