Bakwesu Bapya Bobilo Bamu Kabunga Keendelezya

MU OCTOBER 5, 2024, kumuswaangano waamwaka, kwakapegwa cakwaambilizya caalubazu icakali kwaamba kuti Mukwesu Jody Jedele alimwi a Mukwesu Jacob Rumph basalwa kuba mu Kabunga Keendelezya ka Bakamboni ba Jehova. Bakwesu aaba bobilo bamubelekela Jehova cakusyomeka kwamyaka minji.

Mukwesu Jedele wakazyalilwa mu Missouri, ku U.S.A. alimwi wakakomenena mukasimpe. Mukwasyi wakwe wakali kukkala afwaafwi acilawo icakabulide basikumwaya. Akaambo kaceeci, wakazyibana abakwesu abacizyi ibakali kuzwa mumasena ayiindene-indene aamucisi ibakali kuboola kukambaukila nkuko. Luyando alimwi alukamantano lwabo zyakamukulwaizya kapati. Wakabbapatizyigwa mu October 15, 1983 kacili mukubusi. Wakatalika kuukkomanina kapati mulimo wakukambauka naakamanizya cikolo. Kumane wakatalika bupainiya bwaciindi coonse mu September 1989.

Ciindi Mukwesu Jedele naakacili mukubusi, bazyali bakwe bakali kuunka anguwe alimwi amucizyi wakwe kuyooswaya ku Beteli. Kuswaya ooku kwakabagwasya kulibikkila mbaakani yakuyoobelekela ku Beteli alimwi bakaizuzikizya. Mukwesu Jedele wakatalika kubeleka ku Beteli yaku Wallkill mu September 1990. Wakasaanguna kubelekela mu Dipatimenti Iisalazya kumane kumbele mu Dipatimenti ya Medical Services.

Aciindi eeco, kwakali mbungano zinji izyakali kubelesya mwaambo waci Spanish izyakali kuyandika bakwesu banji. Aboobo Mukwesu Jedele wakasangana imwi yambungano eezyo akutalika kwiiya mwaambo waci Spanish. Mukuya kwaciindi wakazyibana amucizyi wazina lya Damaris, walo iwakali kucita bupainiya bwaciindi coonse mubbazu eelyo. Kumane bakakwatana, mpoonya wakamusangana mumulimo waku Beteli.

Mu 2005 bakazwa a Beteli kutegwa bakalanganye bazyali babo. Aciindi eeco, bakali kubeleka kabali bapainiya baciindi coonse. Mukwesu Jedele wakali kugwasyilizya kuyiisya lya Cikolo Camulimo Cabapainiya akubelekela mu Kkomiti ya Hospital Liaison alimwi amu Regional Building Committee.

Mu 2013, Mukwesu a Mucizyi Jedele bakatambwa alimwi ku Beteli akaambo kamayake aakali ku Warwick. Kuzwa leelyo, bakali kubelekela ku Patterson aku Wallkill. Mukwesu Jedele wakabeleka mu Dipatimenti ya Local Design/Construction alimwi amu Hospital Information Services. Kumane mu March 2023, wakasalwa kuba sikugwasyilizya mu Kkomiti Yamulimo. Ayeeya milimo yoonse njaakabeleka, wakaamba kuti: “Ciindi nowapegwa mulimo mupya ulakonzya kuyoowa. Pele ikuti eeci cacitika, weelede kusyoma Jehova nkaambo ngonguwe uukonzya kupa kuti ucite kufwumbwa ncayanda.”

Mukwesu Rumph wakazyalilwa mu California, ku U.S.A. Naakacili mwana, banyina tiibakacisungweede pele bakali kusolekesya kumuyiisya kasimpe. Alimwi mwaka amwaka, wakali kubaswaya bakaapanyina ibakali Bakamboni basyomeka. Bakaapanyina bakamugwasya kuba aluyandisisyo lwakuyanda kwiiya zinji kujatikizya Bbaibbele cakuti naakajisi myaka iili 13 wakalomba kutalika kwiiya Bbaibbele. Aboobo mu September 27, 1992, wakabbapatizyigwa kacili mukubusi. Cikkomanisya ncakuti banyina bakaba basungu alimwi. Kunze lyaboobo, bausyi alimwi abanabokwabo bakazumanana kuyaambele akubbapatizyigwa.

Naakacili mukubusi, Mukwesu Rumph wakali kubona bapainiya mbobakakkomene. Aboobo naakamanizya cikolo, wakatalika bupainiya bwaciindi coonse mu September 1995. Mu 2000, wakaunka ku Ecuador kuyoobelekela kubusena bubulide. Okuya wakaakubonana amupainiya wazina lya Inga iwakali kuzwa ku Canada, kumane bakakwatana. Nobakamana kukwatana, bakatalika kubelekela mudolopo limwi mu Ecuador mwalo imwakali kabunga kasyoonto kabasikumwaya. Mazuba aano, yakaba mbungano iicita kabotu.

Mukuya kwaciindi, Mukwesu a Mucizyi Rumph bakasalwa kuba bapainiya baalubazu akubeleka mumulimo wamubbazu. Mu 2011 bakatambwa kunjila cikolo ca Gileadi kkilasi namba 132. Nobakamana Cikolo ca Gileadi, bakabeleka mumasena aayindene-indene aamunyika alimwi akupegwa milimo yiindene-indene mbuli mulimo waku Beteli, mulimo wabumisyinali amulimo wamubbazu. Kunze lyaboobo, Mukwesu Rumph wakaba acoolwe cakuba mwiiyi wa Cikolo Cabakambausi ba Bwami.

Akaambo kabulwazi bwa COVID-19, Mukwesu a Mucizyi Rumph bakapiluka ku United States. Mpoonya bakatambwa kuyoobelekela ku Beteli yaku Wallkill kwalo Mukwesu Rumph nkwaakatambula lwiiyo lwamu Dipatimenti ya Mulimo. Kumbele, bakatumwa alimwi kumutabi waku Ecuador, kwalo Mukwesu Rumph nkwaakali kubelekela mu Kkomiti Yamutabi. Mu 2023 bakapiluka alimwi ku Warwick. Mu January 2024, Mukwesu Rumph wakasalwa kuba sikugwasyilizya mu Kkomiti Yamulimo. Ayeeya milimo njaakapegwa, Mukwesu Rumph wakaamba kuti: “Icipa mulimo kuba waalubazu tabuli busena pe, pele mbantu mbobeleka limwi.”

Eelo kaka tulabalumba bakwesu aaba babeleka canguzu alimwi ‘tulabalemeka lyoonse bantu bali boobo!’—Flp. 2:29.