Mibuzyo Yabasikubala
Ino “muzeezo” nzi Jehova ngwayoobikka ino-ino mubeendelezi bamfwulumende?
Kujatikizya kutalika kwamapenzi mapati, lugwalo lwa Ciyubunuzyo 17:16, 17 lwaamba kuti: “Imeja aali kkumi ngoobona alimwi amunyama uulya, eezyi ziyoomusulaika muvwuule alimwi ziyoomusaala akumusiya mantanda, alimwi ziyoolya nyama yamubili wakwe akumuumpa amulilo cakumaninina. Nkaambo Leza wakacibikka mumyoyo yabo kuti bazwidilizye muzeezo wakwe, inzya, ikuti bazwidilizye muzeezo wabo omwe kwiinda mukupa bwami bwabo kumunyama.” Kaindi mabbuku eesu akali kupandulula kuti “muzeezo” Jehova ngwayoobikka mubeendelezi bamfwulumende ngwakunyonyoona bukombi bwakubeja.
Nokuba boobo, kuli kucinca mukumvwisya kujatikizya lugwalo oolu. “Muzeezo” Jehova ngwayoobikka mubeendelezi bamfwulumende ngwakupa “bwami bwabo kumunyama.” Kutegwa tumvwisye mbobuyoozuzikizyigwa businsimi oobu, tulaingula mibuzyo iitobela.
Mbaani baimininwa azintu zyaambidwe mubusinsimi oobu? “Mukaintu muvwuule” alimwi iwiitwa kuti “Babuloni Mupati”; wiiminina bulelo bwanyika yoonse bwabukombi bwakubeja. “Munyama uusalala pyu” wiiminina mbunga ya United Nations (Lukamantano Lwazisi). Mbunga eeyi yakatalika kubeleka mu 1919 ikutegwa ilete luumuno alimwi aciindi eeco yakali kwiitwa kuti League of Nations (Ciinga Calukamantano Lwazisi). (Ciy. 17:3-5) “Meja aali kkumi” aiminina mfwulumende zyoonse zigwasyilizya munyama.
Ncilongwe nzi ciliko akati kamukaintu muvwuule alimwi amunyama uusalala pyu? Mukaintu muvwuule “ukkede” amunyama uusalala pyu calo icaamba kuti ulamugwasyilizya akusola kumweendelezya.
Ncinzi ciyoocitikila mukaintu muvwuule? Munyama ameja aali kkumi ‘ziyoomusulaika kapati mukaintu muvwuule’ akusaala lubono lwakwe alimwi akutondezya mbwali mubi kapati. Bayoozuzikizya makanze aa Jehova aakumunyonyoona cakumaninina. (Ciy. 17:1; 18:8) Aayo ngaanooli mamanino aabukombi bwakubeja. Nokuba boobo eeci kacitanacitika, Jehova uyoopa kuti kucitike cintu cimwi citanacitikide.
Ncinzi Jehova ncayoopa kuti beendelezi bamfwulumende bacite? Uyoobikka “muzeezo wakwe” mubeendelezi bamfwulumende balo baimininwa ameja aali kkumi kuti ‘bape nguzu zyabo alimwi abweendelezi kumunyama uusalala pyu’ nkokuti United Nations. (Ciy. 17:13) Amuyeeye buyo eeci ncocaamba. Beendelezi bamfwulumende tabakaliyandili buya kupa nguzu alimwi abweendelezi kumunyama ooyu. Pele kweelana abusinsimi mbobutondezya, Jehova nguuyoopa kuti eeci cicitike. (Tus. 21:1; amweezyanisye a Isaya 44:28.) Pele sena eeci ciyoocitika asyoonto-syoonto? Peepe. Ciyoocitika cakutayeeyela alimwi mukulaba kwaliso. Kumane munyama ooyu uuyoopegwa nguzu, uyoozuzikizya makanze aa Jehova aakunyonyoona bukombi bwakubeja boonse.
Ncinzi ncotukonzya kulangila kuti ciyoocitika kumbele? Tatweelede kulangila kumvwa malipooti mumanyuuzi aakuti beendelezi bamfwulumende asyoonto-syoonto batalika kugwasyilizya mbunga ya United Nations. Ncotweelede kulangila ncakuti: Cakutayeeyela, Jehova uyoobikka muzeezo mubeendelezi bamfwulumende wakupa nguzu kumunyama. Caakucitika eeci, tuyoozyiba kuti mapenzi mapati ayanda kutalika. Aboobo calino, “atupakamane akubatama” nkaambo zintu eezyi ziyoocitika ino-ino.—1Tes. 5:6.