Mupainiya Uutayoowi

CIINDI ca Nkondo Yabili Yanyika Yoonse, Mukwesu Elias antoomwe amukaintu wakwe, Josephine, bakali kwiitwa akubuzyigwa-buzyigwa abalupati-pati bamumfwulumende ku Sukabumi, West Java, kumaofesi mapati aaba Kempeitai, bamapulisa bacisi ca Japan ibakali kuyoowegwa kapati. Ba Elias mbabakali bakusaanguna kubuzyigwa-buzyigwa. Bakabuzyigwa mibuzyo iikatazya minji kapati cakutobelana. “Ino Bakamboni ba Jehova mbaani? Sena mulaikazya mfwulumende yacisi ca Japan? Sena nduwe sikutwela?”

Ba Elias bakavwiila kuti: “Tuli babelesi ba Leza Singuzuzyoonse alimwi kunyina cibi ncotwacita pe.” Mupati wamapulisa wakakwempa panga kubwaanda litegwa samurai akweezyeka mukwesu Elias.

Wakaambila mukwesu cabukali kuti: “Sena ulizyi kuti inga ndakujaya lino aawa?” Ba Elias bakabikka mutwe wabo aatebulu lyamuofesi akupaila mumoyo. Nokwakainda ciindi, mupulisa wakaseka akwaamba kuti: “Toyoowi akuyoowa!” Mpoonya wakaita ba Josephine. Nzyobakaamba ba Josephine zyakeendelana azyakaamba ba Elias, aboobo mupati wabamapulisa cabukali wakaamba kuti: “Tamuli basikutwela pe. Kamuzwaawa, kamuya!”

Nokwakainda myezi iili mbwiibede, “bakwesu babeji” bakabatamikizya ba Elias, eelyo bakaangwa. (2 Kor. 11:26) Kwamyezi minji, bakali kulya buyo zyakulya nzyobakali kugomenena mumupaipi wantolongo imwiinda tombe. Nokuba boobo, basikunjizya muntolongo tiibakacikonzya kuzungaanya lusyomo lwabo. Ba Josephine nobakacikonzya kubaswaya, ba Elias bakabaambila cakupetekezya muzipulo zyantolongo kuti: “Utapengi pe. Kufwumbwa naa bandijaye naa bandaangulule, ndilazumanana kusyomeka kuli Jehova. Inzya, balakonzya kundigusya oomuno kandili mutunta pele ikutali kandili muntu uutasyomeki.”

Nokwakainda myezi iili cisambomwe kabali muntolongo, ba Elias bakaliiminina kumbele lya Nkuta Mpati yaku Jakarta, eelyo bakaangununwa.

Nokwakainda myaka iili 30 kuzwa leelyo mfwulumende ya Indonesia noyakaulesya alimwi mulimo wa Bakamboni ba Jehova, loya wacilikiti ca Manado, North Sulawesi, wakaita ba Elias kuofesi yakwe. Wakababuzya kuti: “Sena ulizyi kuti Bakamboni ba Jehova bakalesyegwa?”

Ba Elias bakaingula kuti: “Inzya.”

Loya ooyo wakababuzya kuti: “Sena lino ulilibambilide kucinca cikombelo cako?”

Ba Elias bakooka akutalika kulyuuma acamba canguzu. Bakaamba ajwi lipati kuti: “Mulakonzya kuugusya moyo mucamba cangu, pele tamukonzyi kundipa kuti ndicince cikombelo cangu.”

Loya ooyo wakaambila ba Elias kuti bazwe akuunka alimwi tanaakabapenzya kabili pe.

Mu 2000, ba Elias bakafwa kabajisi myaka yakuzyalwa iili 85, kabaubelekede cabusungu mulimo wabupainiya kwamyaka iibalilwa ku 60.