Kwaaba Mitabi

MUCIZYI umwi iwakajanika kupulogilamu yakwaaba mutabi ku Madagascar, yalo iyakacitwa mu Mujibelo, mu January  24, 2015 wakaamba kuti: “Ndakkomana kapati.” Walo alimwi abeenzu bamwi ibali 583 bakakkomana kapati kubona ŋanda mpya yakoona iijisi maluumu aali 19 kubikkilizya aŋanda yakulida iyakakomezyegwa alimwi ancikini iyakabambululwa. Kwakayakwa amaofesi ambi mapya aadipatimenti ya Mulimo, ya Accounting alimwi aya Local/Design Construction. Kuyungizya waawo, madipatimenti aa Audio/Video aa Mwaambo Wakutambaika akabambilwa masitudiyo mapya alimwi kwakatalisyigwa adipatimenti iilemba mabbuku aaboofwu iitegwa Braille Transcription Department. Beenzu nobakamana kuswiilila mbowakatalika mulimo wakukambauka mu Madagascar, bakakkomana kuswiilila makani aakwaaba mayake alo aakapegwa aba Mark Sanderson bamu Kabunga Keendelezya.

Myoyo yabantu ba Jehova mu Jakarta ku Indonesia, yakakkala ciindi meenda aamvwula aakapayide naakaceya kakuceede buyo ciindi cisyoonto kuti pulogilamu yakwaaba mayake mapya aamutabi icitwe mu February 14, 2015. Mutabi lino uli aamudadaada omwe waŋanda yamaofesi ndamfwu iijisi midadaada iili 42 kuyamujulu alimwi amidadaada iili 12 muŋanda aimbi ndamfwu yakoona iili afwaafwi. Madipatimenti manji aa Bbeteli ali mumaanda aansaizi aali munsi-munsi. Ba Anthony Morris bamu Kabunga Keendelezya bakapa makani aakwaaba mayake, mpoonya buzuba bwakatobela bantu ibali 15,257 bakabungana kubbuwa lyakuumina bbola kutegwa baswiilile makani ngobakapa aakajisi mutwe wakuti: “Amuzumanane Kuliyumya Mumulimo Mubotu.” Pulogilamu yakamwaigwa aavidiyo kubantu bali 11,189 ibakajanika kumasena aambi aali 41, calo icakapa kuti ube muswaangano ikwakajanika bantu ba Jehova banji kapati mu Indonesia. Mukwesu Ronald Jacka, walo uuli ngumwi wabamisyinali bakusaanguna kuunka ku Indonesia wakaamba kuti: “Ciindi nondakasika mu Indonesia mu 1951, kwakali buyo basikumwaya bali 26 mucisi coonse. Pele sunu, bantu ibainda ku  26,000 bajanika kupulogilamu eeyi yaalubazu. Masimpe Jehova wabalongezya bantu bakwe mu Indonesia!”