“Kamubalemeka Lyoonse Bantu Bali Boobo”

KUTALIKILA mu 1992, Kabunga Keendelezya kakapa baalu bamwi ibalaaluzyibo alimwi basimide kuti kabagwasyilizya kubeleka milimo iicitwa mumakkomiti aa Kabunga Keendelezya.a (Amubone bupanduluzi buyungizyidwe.) Bagwasyilizi aaba, ‘ibambelele zimbi,’ babeleka mulimo uuyandika kapati kugwasyilizya Kabunga Keendelezya. (Johane 10:16) Balajanika kumiswaangano iicitwa nsondo ansondo yamakkomiti nkobazulilwa. Mulimo wabo ngwakupa twaambo tuli toonse ituyandika alimwi akupa mizeezo iikonzya kugwasya. Kabunga Keendelezya nkekasala iceelede kucitwa, mpoonya bagwasyilizi balagwasyilizya kubona kuti icasalwa kuti cicitwe cacitwa. Bakwesu aaba balilyaabide kubeleka kufwumbwa milimo njobapegwa. Baleenda abakwesu bamu Kabunga Keendelezya kumiswaangano yacooko yaalubazu akumiswaangano yamasi. Alimwi balakonzya kupegwa mulimo wakuswaya mitabi kabali baiminizi bamaofesi mapati.

Mukwesu umwi iwabeleka kali mugwasyilizi kutalikila mu 1992 wakati: “Ciindi nondibeleka milimo njondipedwe, Kabunga Keendelezya kalakonzya kubikkila maano kapati kumilimo iijatikizya zintu zyakumuuya.” Aumbi mukwesu iwabeleka kali mugwasyilizi myaka iili 20 wakati: “Ncoolwe nconditakonzyi kweezyanisya acintu cili coonse ncondakali kukonzya kulangila kucita.”

Kabunga Keendelezya kakabapa mikuli mipati bagwasyilizi aaba alimwi kalalumba akaambo kakubeleka canguzu nkobacita bakwesu aaba. Toonse ‘katubalemeka lyoonse bantu bali boobo.”—Bafilipi 2:29.