Ibakali Bamasiite Kaindi Baba Banabokwabo Beni-Beni Kumuuya

Ba Felisa: Ndakakomenena ku Spain mumukwasyi uupengede. Bamukwasyi wangu bakali kukomba ku Katolika, alimwi bakali kubikkila maano kumakani aabukombi. Akati kababbululu bangu ibali 13, bamwi bakali bapaizi naa kubeleka kucikombelo. Beeninyina abamaama bakali bapaizi alimwi bakali kuyiisya acikolo caba Katolika. Nobakafwa ba Paapa John Paul II bakabalemeka kutegwa bakabe basaante kumbele. Bataata bakali kubeleka mulimo wakupanga-panga zintu zyalubulo, pele baama bakali kubeleka mumyuunda. Twakazyalwa katuli 8 mumukwasyi wesu alimwi mebo ndendime mupati.

Nondakali amyaka yakuzyalwa iili 12, kwakabuka nkondo mu Spain. Noyakamana nkondo, bataata bakaangwa akaambo kakuti mfwulumende tiiyakali kwiiyanda mizeezo yabo. Cakali kubakatazya bamaama kujana cakulya cinji cakuti toonse tukkute kabotu-kabotu. Aboobo bakatuma bana bokwesu basimbi botatwe, Araceli, Lauri, alimwi a Ramoni kuti bakakkale abamasiite kuŋanda yabamasiite (convent) mudolopo lya Bilbao. Ooko banabokwesu basimbi bakali kukonzya kuba acakulya cikkwene.

Ba Araceli: Aciindi eeco ndakali amyaka yakuzyalwa iili 14, Lauri wakali amyaka iili 12 mpoonya Ramoni wakali amyaka iili 10. Twakali kuuyeeya mukwasyi wesu kapati. Kuŋanda yabamasiite, mulimo wesu wakali wakusalazya. Nokwakainda myaka yobilo, bamasiite bakatutuma kuŋanda mpati yabamasiite ku Zaragoza iyakali kulanganya bantu bacembeede. Twakali kubeleka canguzu muncikini alimwi eeci cakali kutupa kukatala kapati.

Ba Felisa: Ciindi banabokwesu basimbi nobakaunka ku Zaragoza, bamaama abaayisya ibakali bapaizi ooko bakayeeya kundituma nkukwena ooko. Bakali kuyanda kuti ndizwe munsi-munsi amusankwa iwakali kundiyanda. Ndakali kuyanda kuyookkala kuŋanda yabamasiite nkaambo ndakali kumuyanda Leza. Ndakali kuunka kucikombelo buzuba abuzuba alimwi ndakali kuyanda kuba misyinali waci Katolika mbuli mweenima wakali mu Africa.

Pele kuŋanda yabamasiite, ndakali kulimvwa kuti tiindakali kukonzya kucita zintu nzyondakali kuyanda. Bamasiite tiibakali kundikulwaizya kubelekela Leza mucisi cimbi mbuli mbondakali kuyanda. Aboobo nokwakainda mwaka omwe, ndakajokela kuŋanda kuyoolanganya baayisya ibakali bapaizi. Ndakali kubabelekela milimo yaaŋanda, alimwi twakali kupaila antoomwe kumazuba kubelesya Bulungu. Alimwi ndakali kukkomana kubamba-bamba maluba aamucikombelo akusamika zifwanikiso zya Mariya ‘abasaante.’

Ba Araceli: Ciindi nondakali ku Zaragoza, ndakakonka zikonke zyakusaanguna kutegwa ndibe siite. Mpoonya bamasiite bakasala kuti batwaandaanye abanabokwesu. Aboobo bakandituma kuŋanda yabamasiite ku Madrid mpoonya Lauri bakamutuma kuŋanda yabamasiite ku Valencia. Ramoni wakacaala mu Zaragoza. Ku Madrid, ndakakonka zikonke zyabili kutegwa ndibe siite. Bantu banji mbuli basicikolo alimwi abacembeede bakaboola kuzookkala kuŋanda yabamasiite. Aboobo kwakali milimo minji yakucita. Ndakali kubelekela mucibbadela icakali aŋanda yabamasiite.

Ndakali kulangila buumi bubotu kandili siite. Ndakali kuyeeya kuti twakalikunooba aciindi cinji cakubala akwiiya Bbaibbele. Pele ndakatyompwa. Kunyina wakali kubelesya Bbaibbele naa kubandika kujatikizya Leza naa Jesu. Ndakaiya mwaambo waci Latin, mbobakali kupona “basaante” baci Katolika, alimwi ndakali kukomba Mariya. Pele bunji bwaziindi, twakali kubeleka buyo milimo iitajatikizyi zintu zyakumuuya.

Ndakatalika kutyompwa akulibilika. Ndakalimvwa kuti ndakeelede kubeleka akugwasya mukwasyi wangu muciindi cakubeleka aŋanda yabamasiite kugwasya bantu bambi kuvwuba. Aboobo ndakaambila mupati wabamasiite kujatikizya kaambo aaka akuti ndakali kuyanda kuunka. Pele wakandijalila mumaseelo. Wakali kuyeeya kuti inga wandisungilizya kukkala.

Bamasiite bakandigusya mumaseelo, pele nobakabona kuti ndakacili kuyanda kuzwa aŋanda yabamasiite, bakandinjizya mumaseelo alimwi. Nondakacita oobu ziindi zyotatwe, bakandaambila kuti inga ndaunka ikuti ndalemba kuti: “Ndiyanda kuunka nkaambo ndasala kubelekela Saatani kutali Leza.” Ndakagambwa kapati. Masimpe ndakali kuyanda kuunka, pele cakandaalila kulemba boobu. Kumane, ndakayeeya kuti ndaambaule amupaizi, akumwaambila icakacitika. Bakandilombela kuli babbishopu kutegwa ndijokele kuŋanda yabamasiite ku Zaragoza. Nokwakainda myezi misyoonto buyo, bakandizumizya kuunka. Tiilyakalampa, Lauri a Ramoni abalo bakazwa aŋanda yabamasiite.

BBUKU ILYAKATWAANDAANYA

Ba Felisa: Nokwakainda ciindi, ndakakwatwa akulongela ku Cantabria, cooko cili ku Spain. Ndakacili kuunka kucikombelo lyoonse. Bumwi buzuba mu Nsondo kucikombelo, mupaizi wakaamba cabukali kuti, “Amubone bbuku eeli!” Wakatutondezya bbuku lyakuti The Truth That Leads to Eternal Life. Wakaamba kuti: “Ikuti naa kuli wakamupa bbuku eeli, amundipe naa kulisowa!”

Tiindakalijisi bbuku eeli pe, pele ndakali kuliyanda. Mpoonya nokwakainda mazuba masyoonto, kwakaboola bamakaintu bobilo kuŋanda yangu. Bakali Bakamboni ba Jehova, alimwi bakandipa bbuku eeli. Ndakalibala busiku mbubwenya oobo. Nobakapiluka bamakaintu aaba, bakandibuzya ikuti naa ndakali kuyanda kwiiya Bbaibbele, eelyo ndakazumina.

Ndakali kuyanda kumukkomanisya Leza lyoonse. Mpoonya ndakaiya kasimpe kujatikizya Jehova, eelyo ndakatalika kumuyanda kapati. Ndakali kuyanda kwaambila bantu kujatikizya nguwe. Mu 1973, ndakabbapatizyigwa. Kufwumbwa nocakali kukonzyeka, ndakali kusoleka kwaambila bamukwasyi wangu kujatikizya kasimpe. Pele bamukwasyi wangu, ikwaambisya musyoonto wangu Araceli, bakazumanana kwaamba kuti nzyondakali kusyoma tiizyakaluzi.

Ba Araceli: Akaambo kakuti tiibakandeendelezya kabotu kuŋanda yabamasiite, ndakanyema alimwi tiindakakkomene acikombelo cangu. Pele ndakazumanana kuunka kucikombelo lyoonse mu Nsondo, alimwi ndakali kupaila kubelesya Bulungu buzuba abuzuba. Ndakacili kuyanda kumvwisya Bbaibbele, aboobo ndakamulomba Leza kuti andigwasye. Mpoonya ba Felisa bakandaambila nzyobakaiya. Bakalikkomene kapati kujatikizya nzyobakali kusyoma cakuti ndakayeeya kuti basondoka. Tiindakali kuzizumina nzyobakali kwaamba.

Kumane, ndakajokela ku Madrid kuyoobeleka mpoonya ndakakwatwa. Mumyaka yakatobela, ndakabona kuti bantu ibakali kuunka kucikombelo lyoonse tiibakali kupona kweelana anzyaakali kuyiisya Jesu. Aboobo ndakacileka kuunka kucikombelo. Ndakaleka kusyoma kuti kuli “basaante” naa mulilo wahelo, alimwi tiindakali kusyoma kuti mupaizi inga walekelela zinyonyoono. Ndakazisowa zintu zyoonse izyakali kujatikizya bukombi bwakubeja. Tiindakazyi naa ndakali kucita cintu ciluzi. Ndakalimvwa kutyompwa, pele ndakazumanana kupaila kuli Leza kumwaambila kuti: “Ndiyanda kuti ndikuzyibe. Kondigwasya!” Ndilayeeya kuti Bakamboni ba Jehova bakali kuboola aŋanda yangu ziindi zinji, pele kunyina nondakali kubatambula. Kunyina cikombelo ncondakali kusyoma.

Mwanookwesu Lauri wakali kukkala ku France, mpoonya Ramoni wakali kukkala ku Spain. Muma  1980, bakatalika kwiiya Bbaibbele a Bakamboni ba Jehova. Ndakali masimpe kuti, mbuli ba Felisa, tiibakabona kuti bakali kwiiya zintu zyakubeja zyalo-zyalo. Mukuya kwaciindi, ndakaswaanya ba Angelines basimukoboma, mpoonya twakaba balongwe beni-beni. Abalo bakali Bakamboni ba Jehova. Ba Angelines abalumi babo bakandibuzya ziindi zinji naa ndakali kuyanda kwiiya Bbaibbele ambabo. Bakabona kuti nokuba kuti tiindakali kubikkila maano kujatikizya bukombi, ndakali kuyanda kulizyiba Bbaibbele. Kumamanino ndakabaambila kuti: “Cili kabotu. Ndilazumina kwiiya andinywe lilikke buyo kuti kandibelesya Bbaibbele lyangu!” Ndakajisi Bbaibbele lyabusanduluzi bwa Nácar-Colunga.

KUMAMANINO BBAIBBELE LYAKATUKAMANTANYA

Ba Felisa: Ciindi nondakabbapatizyigwa mu 1973, kwakali Bakamboni babalilwa ku 70 mu Santander, mudolopo lipati lya Cantabria. Twakali kuunka kumasena aali kule kutegwa tukakambauke kubantu boonse muminzi iitalivwulili yamucooko eeco. Aboobo twakali kuunka abbaasi kumane amootokala kuunka kumunzi amunzi.

Mumyaka yakatobela, ndakaiya Bbaibbele abantu banji, alimwi bantu bali 11 bakabbapatizyigwa. Bantu banji mbondakali kwiiya abalo bakali Bakatolika. Ndakeelede kubakkazyikila moyo. Mbubonya mbuli ndime, bakali kuyandika ciindi kutegwa babone kuti nzyobasyoma tiizyakali zyamasimpe. Ndakalizyi kuti lilikke Bbaibbele alimwi amuuya uusalala wa Jehova ngowakali kukonzya kugwasya muntu kucinca mizeezo yakwe alimwi akumvwisya kasimpe. (Bahebrayo 4:12) Balumi bangu, ba Bienvenido, ibakali bapulisa, bakabbapatizyigwa mu 1979, mpoonya abalo bamaama bakatalika kwiiya Bbaibbele kabatanafwa.

Ba Araceli: Ciindi nondakatalika kwiiya Bbaibbele a Bakamboni ba Jehova, ndakalimvwa kuti tiindakali kukonzya kubasyoma. Pele mukuya kwaciindi, ndakaleka kulimvwa boobo. Bakamboni tiibakali kuyiisya buyo Bbaibbele pele bakali kuzilemeka nzyoliyiisya. Lusyomo lwangu muli Jehova alimwi amu Bbaibbele lwakatalika kuyuma, alimwi ndakakkomana. Basimukoboma bamwi bakakubona kucinca ooku alimwi bakandaambila kuti, “ba Araceli, kamuzumanana munzila eeyi njomwasala!”

Ndilayeeya nondakapaila kuti, “Ndalumba, Jehova, akaambo kakutandilekelezya akundipa zyoolwe zinji zyakujana nzyondakali kuyandaula, luzyibo lwini-lwini lwamu Bbaibbele.” Alimwi ndakabalomba ba Felisa kuti bandilekelele akaambo kazintu zitali kabotu nzyondakabaambilide. Kuzwa aciindi eeci, muciindi cakukazyanya, twakali kukkomana kubandika kujatikizya Bbaibbele. Mu 1989, ndakabbapatizyigwa nondakali amyaka yakuzyalwa iili 61.

Ba Felisa: Lino ndili amyaka yakuzyalwa iili 91. Balumi bangu bakafwa, alimwi tandikonzyi kubeleka mbondakali kubeleka kaindi. Pele ndicibala Ibbaibbele abuzuba, alimwi ndilaunka kumiswaangano amubukambausi ikuti ndacikonzya.

Ba Araceli: Cilandikkomanisya kubandika makani aajatikizya Jehova kubapaizi boonse alimwi akuli bamasiite mbondiswaanganya, ambweni akaambo kakuti ndakali siite. Ndakali kuba amibandi iikkomanisya abamwi, alimwi banji bakali kubweza mabbuku amamagazini. Ndilayeeya ikapati mupaizi umwi. Nondakabandika anguwe ziindi zisyoonto buyo, wakazizumina nzyondakali kwaamba. Mpoonya wakandaambila kuti: “Pele ino inga ndaunka kuli aciimo aano? Ino bapaizima alimwi abamukwasyi wangu inga baamba nzi?” Mpoonya ndakaingula kuti: “Ino Leza uyakwaamba nzi?” Wakabona kuti ndakaliluzi alimwi ndakabona kuti wakatyompwa. Aboobo kuboneka kuti tanaakali sicamba cakuti inga wacinca.

Tandikalubi ciindi balumi bangu nobakandaambila kuti bakali kuyanda kuunka kumiswaangano andime. Bakali amyaka yakuzyalwa iili 80 ciindi nobakaboola kumiswaangano ciindi cakusaanguna, alimwi kuzwa ciindi eeco, bakali kujanika kumiswaangano lyoonse. Bakaiya Bbaibbele akutalika kukambauka. Ndilakkomana kapati ndayeeya mbotwakali kubeleka antoomwe mubukambausi. Bakafwa kakusyeede myezi yobilo kuti busike buzuba mbobakeelede kubbapatizyigwa.

Ba Felisa: Ciindi nondakatalika kubelekela Jehova, basyoonto bangu basimbi botatwe bakali kundikazya. Pele mukuya kwaciindi, abalo bakakazumina kasimpe. Masimpe eeci ncimwi cazintu zibotu izyakandicitikila. Kuzwa waawo, twakali kukkomana kuba antoomwe katubandika kujatikizya Leza wesu, Jehova alimwi a Jwi lyakwe! Kumamanino, toonse twakali kukomba Jehova.a