Ino Diabolosi Ulibonya Buti?

Bwiinguzi bwamu Bbaibbele

Diabolosi ncilenge camuuya citalibonyi, icaamba kuti tajisi mubili ngotukonzya kubona.—Baefeso 6:11, 12.

Cifwanikiso cidumide ca Diabolosi kajisi mfwoloko. Ulibonya mbuli kuti nimpongo alimwi ujisi meja amucila.

Basikuzekaula banji badulowa Diabolosi kalibonya mbuli mpongo alimwi kajisi meja, mucila alimwi amfwoloko. Ibamwi basyoma kuti zifwanikiso zili boobo zyakasaanguna kudulowegwa abasikuzekaula ibakali kusyoma twaano twakaindi ibakapona myaka yiinda ku 1000 yainda.

Ino Bbaibbele limupandulula buti Diabolosi?

Bbaibbele limupandulula munzila ziindene-indene Diabolosi. Nzila eezyi zitugwasya kumvwisya bube bwakwe, ikutali mbwalibonya. Nzyeezyi nzila zimwi mbolimupandulula:

Mungelo wamumuni. Ulicengeezya kubapa zintu zibotu bantu kutegwa batobele njiisyo zyakwe kutali zya Leza.—2 Bakorinto 11:14.
Syuumbwa uuvwuluma. Ulabalwana bantu ba Leza cabukali.—1 Petro 5:8.
Simwaaba mupati. Ulayoosya, ulaanguzu, alimwi ulanyonyoona.—Ciyubunuzyo 12:9.

Tupango twamu Bbaibbele tujatikizya Diabolosi

2 Bakorinto 11:14: “Saatani lyoonse ulalicengeezya kuba mbuli mungelo wamumuni.”

Bupanduluzi: Saatani ulicengeezya kuba mubotu kutegwa bantu batobele njiisyo zyakwe muciindi ca Leza.
Baefeso 6:11: “Amusame zilwanyo zyoonse zizwa kuli Leza kutegwa mucikonzye kwiima nji nomukazya bucenjezu bwa Diabolosi.”

Bupanduluzi: Diabolosi ubelesya nzila zyabucenjezu kutegwa bantu baleke kumvwida Leza.
Jakobo 4:7: “Amulibombye kuli Leza; pele amumukazye Diabolosi eelyo ulamutija.”

Bupanduluzi: Muntu ulakonzya kumuzunda Diabolosi kwiinda mukumvwida Leza.
1 Petro 5:8: “Sinkondonyoko, Diabolosi, uyaabweendeenda mbuli syuumbwa wabutambo uuvwuluma, uyandaula muntu ngwatiimene buumbulu.”

Bupanduluzi: Diabolosi ulabasulaika aabo bamumvwida Leza alimwi uyanda kunyonyoona cilongwe cabo.