Cakacitika Cakabagambya Kapati

Muzyali uuli alikke wazina lya Desicar wakali kuyanda kuyungizya mulimo wakwe wabukambausi kwiinda mukuba mupainiya waciindi coonse. Ukkala kucisi cijisi buyumuyumu bwamali, nkokuti cisi ca Venezuela. Nokuba boobo, wakalikanzide kucita bupainiya, aboobo wakatalika. Eeci cakamukkomanisya kapati, pele mukubula coolwe bulwazi bwa COVID-19 bwakatalika.

Kumatalikilo aabulwazi bwa COVID-19, ba Desicar bakajisi buyumuyumu bwakubelesya nzila zipya zyabukambausi. Cakali kubakatazya kulemba magwalo. Alimwi tiibakali kukonzya kubelesya videoconferencing mubukambausi akaambo kakuti kubelesya intaneti kwakali kudula mucilawo cabo. Bakaamba kuti: “Ndakatyompwa. Mukulaba kwaliso zintu zyakacinca, tiindakacili kukambauka mbuli lyoonse. Ndakalimvwa kuti bupainiya bwandaalila.”

Mpoonya, mu January 2021, baku ofesi yamutabi ya Bakamboni ba Jehova baku Venezuela bakazumizya kuti kube bukambausi bwaalubazu. Aboobo kwakapangwa bubambe bwakuti kakupegwa makani aabuleya aa Bbaibbele munsondo zyoonse zili 5 zyamumwezi muma radio station aali 60 alimwi ama channel aa TV aali 7. Bakamboni bakakulwaizyigwa kutamba bantu bayanda kuti kabeebelela alimwi akuswiilila. Bakumutabi alimwi bakali kutumina bakwesu abacizyi mibuzyo amagwalo aakali kweendelana amakani aamunsondo eeyo, alo ngobakali kuyoobelesya nobakali kulemba magwalo alimwi akutuma mafooni. Kuyungizya waawo, bakwesu abacizyi bakakulwaizyigwa kubelesya tugwalo twaafooni mubukambausi, yalo yakali nzila mpya yabukambausi kuli Bakamboni banji ku Venezuela.

Ba Desicar bakakkomana kapati kutola lubazu mumulimo ooyu. Nokuba kuti tiibakaningaibelesyede kale nzila yakulemba tugwalo twaafooni, bakasala kuti baisole. Pele bakali kuyandika lugwasyo. Ba Desicar bakaamba kuti: “Ndinyina luzyibo lwakubelesya tekkinoloji.” Aboobo bakalomba mwanaabo musimbi kuti abayiisye. Tiilyakalampa, ba Desicar bakatalika kutola lubazu mumulimo ooyu.

Kwiinda mukutuma mameseji, ba Desicar bakatamba beenzinyina kuswiilila makani aakalekkoodwa kale. Cakacitika cakabagambya kapati. Bunji bwabantu ba Desicar mbobakatamba bakaaswiilila makani akubuzya mibuzyo. Bamwi tiibakacikonzya kuswiilila pele bakababuzya ba Desicar cakaambwa mumakani. Ba Desicar bakaamba kuti: “Ndakalemba twaambo tupati-pati akubapa. Kunyina nindakacitide kale nyendo zyakupilukila zisika ku 5 mumwezi, pele kumamanino aamulimo waalubazu ooyu, ndakapanga nyendo zyakupilukila zili 112!”a

Alimwi ba Desicar bakatamba bacizyi babo ibatakali basyomi, balo ibakali kukkala munsi-munsi ambabo kuti baswiilile makani a radio yabo. Ba Desicar bakati: “Cakandigambya kuti bacizyi bangu bakazumina. Aboobo, lyoonse mu Nsondo aciindi ca 08:00 hrs, ndakali kuunka muŋanda yabo kutegwa tuswiilile antoomwe. Bakali kubuzya mibuzyo minji, ciindi capulogilamu alimwi anoyamana.” Aaba bacizyi babo bakajanika ku Ciibalusyo calufwu lwa Jesu alimwi bakazumizya ba Desicar kubelesya fooni yabo yuunka aintaneti mubukambausi.

Ba Desicar bakaamba kuti: “Ndilamulumba kapati Jehova. Alimwi ndilabalumba baalu bamumbungano ibakandikulwaizya. Bakandigwasya kubukulusya lukkomano lwangu mubukambausi.” (Jeremiya 15:16) Ba Desicar bazumanana kucita bupainiya alimwi akupilukila kuli baabo bakatondezya luyandisisyo mbobakali kujana kwiinda mukulemba mameseji.