Ino Nguni Uyakwiifwutula Nyika?

Bantu banji balalibilika kujatikizya ibamwi mbobainyonyoona nyika azilenge zipona aalinjiyo. Basyaazibwene bamwi ibalanganya makani aakunyonyooka kwanyika bakaamba kuti bantu bainyonyoona kapati nyika cakuti zilenge zipona ziindene-indene zyaba muntenda yakuloba.

Sena bantu balainyonyoona nyika cakumaninina? Naa kuli ciindi nobayookkala muluumuno azilengwaleza?

Sena bantu balazwidilila mukusolekesya kwabo?

Basyaazibwene banji balaalusyomo lwakuti bantu balakonzya kwiikwabilila nyika akupona muluumuno antoomwe azilengwaleza. Pele basikuvwuntauzya bamwi balakazya akwaamba kuti bantu inga bazwidilila mukwiikwabilila nyika lilikke buyo kuti kwaba kucinca mumbazu zinji aciindi comwe. Kucinca ooko inga kwabikkilizya:

• Kusumpula nzila bantu mbobakwabilila nyika, zisaka naa masamu, mazyiba alimwi alwaanje.

• Kubelesya nzila zimbi mubulimi alimwi amukukwabilila muya ngotuyoya.

• Kucinca mbozipangwa zyakulya kutegwa bantu kabavwula kulya zisyumani kutali nyama answi, mpoonya akuti kabalya buyo zisyoonto akutanyonyoona zyakulya.

• Kuzumina kuti kupona buumi bubotu tacaambi kuba azintu zinji zyakumubili.

Ino muyeeya buti? Sena cilakonzyeka mfwulumende, basimakwebo, abantu buyo kubelekela antoomwe kwiinda mbobali kucita lyoonse kucinca zintu eezyi zyaambwa? Naa muyeeya kuti tacikonzyeki akaambo kakuti bantu bamwi mbasyaacivwulemwangu, mbalyato, akuti tabakwe ndaba aziyoocitika kumbele?​—2 Timoteyo 3:1-5.

Kaambo ncotweelede kuba abulangizi

Bbaibbele lilatusyomezya kuti nyika yesu iyoofwutulwa kumbele. Lilapandulula kaambo bantu ncobatakonzyi kwiifwutula munguzu zyabo, alimwi akwaamba kucinca kwini kweelede kucitwa. Kuyungizya waawo, lilatwaambila kucinca ooko mbokuyoocitika.

Kaambo bantu ncobatakonzyi kwiifwutula nyika munguzu zyabo. Jehovaa Leza wakalenga nyika, akupa bantu mukuli wakwiilanganya. (Matalikilo 1:28; 2:15) Kutegwa bazwidilile mumulimo wabo wakulanganya nyika, bakeelede kutobela busolozi bwa Mulengi wabo amalailile aakwe. (Tusimpi 20:24) Muciindi caboobo, bakamukaka Jehova akusala kulicitila zintu. (Mukambausi 7:29) Munguzu zyabo, bantu tabakonzyi kwiilanganya nyika, alimwi nokuba kuti basola kwiisumpula, tabakonzyi kuzwidilila cakumaninina pe.​—Tusimpi 21:30; Jeremiya 10:23.

Kucinca ikweelede kucitwa. Leza uyanda kuti bantu baleke kwiinyonyoona nyika. (Ciyubunuzyo 11:18) Takacinci mfwulumende naa bantu ibali mukwiinyonyoona nyika, pele uyoobagwisya buya alinjiyo. (Ciyubunuzyo 21:1) Akaambo kaceeci, Jehova waamba kuti: “Amubone! Ndilengulula zintu zyoonse kuti zibe zipya.”​—Ciyubunuzyo 21:5.

Kucinca ooku mbokuyoocitwa. Jehova uyoozigusya mfwulumende zyabantu akubikka mfwulumende yakujulu yiitwa kuti Bwami bwa Leza. Mfwulumende eeyi, iinakweendelezyegwa a Jesu Kristo iyoolela nyika.​—Daniele 2:44; Matayo 6:10.

Bwami bwa Leza buyooyiisya bantu kutobela zyeelelo zya Leza ziluleme. Ikuti bantu bakatobele busolozi bwa Mulengi, bayoocikonzya kupona kabotu azilengwaleza zyoonse. (Isaya 11:9) Bbaibbele lilapandulula mfwulumende ya Leza mboiyakupa kuti balelwa banjiyo bakapone buumi bubotu kapati, ibuumi butakonzyi kupa kuti banyonyoone nyika. Nzyeezyi zintu nzyoiyoocita:

• Kubapa cakulya boonse.​—Intembauzyo 72:16.

• Kubambulula zintu zili anyika.​—Isaya 35:1, 2, 6, 7.

• Kupa kuti bantu abanyama bakkale muluumuno​—Isaya 11:6-8; Hosea 2:18.

• Kulesya ntenda zilicitikila.​—Marko 4:37-41.

Amusyome kuti ino-ino Bwami bwa Leza buyoopa kuti zyoonse eezyi zicitike. Kutegwa muzyibe zinji, amubale cibalo cakuti “Ino Bwami bwa Leza Buyootalika Lili Kweendelezya Nyika?”