Ncinzi Bbaibbele Ncolyaamba Kujatikizya Nzala Iiliko Mazuba Aano?

“Kunyina nzala.” Majwi aaya atondezya mbaakani njobajisi baleli bamunyika yoonse kutegwa bamane penzi limwi lipati ndyobajisi bantu, nkokuti kubapa zyakulya boonse munyika. Pele sena kuli ciindi nzala noiyakumana? Ino Bbaibbele lyaamba nzi?

Bbaibbele lyakasinsima kujatikizya nzala iiliko mazuba aano

Bbaibbele lyakasinsima kuti kunooli nzala mumazuba eesu, mumazuba ngoliita kuti ‘mazuba aamamanino.’ (2 Timoteyo 3:1) Leza taali nguwe uupa kuti kakuli nzala, pele wakatucenjezya kujatikizya njiyo. (Jakobo 1:13) Amubone businsimi bobilo bwamu Bbaibbele.

“Kuyooba nzala . . . mumasena aaindene-indene.” (Matayo 24:7) Businsimi oobu bwamu Bbaibbele bwakasinsima kuti kunooli nzala mumasena manji. Mulipooti yakapegwa ino-ino kuzwa kubantu balanganya makani aajatikizya mbozipangwa akumwaigwa zyakulya bakati: “Bukkale bwakubula zyakulya, kubula zyakulya zili abusani naa zikkwene buyaabwiindila.” Mamiliyoni aabantu muzisi zinji tabakonzyi kujana zyakulya nzyobayandika. Cuusisya ncakuti banji balafwa akaambo kanzala.

‘Ndakabona ibbiza lisiya, alimwi ooyo wakatantide alindilyo wakajisi cikkelo mujanza lyakwe.’ (Ciyubunuzyo 6:5) Mubusinsimi oobu, bbiza lyacikozyanyo alimwi ayooyo uutantide alindilyo ziiminina nzala mumazuba aamamanino.a Cikkelo icili mumaanza aayooyo uutantide alindilyo ncakupimina cakulya kutegwa aumwi kajana nokuceya buyo. Ciindi sibbiza ooyu nayenzya, kuli jwi lyaambilizya kuti mweelwe wazyakulya unooli atala alimwi lilabacenjezya bantu kuzibelesya kabotu zyakulya nzyobajisi. (Ciyubunuzyo 6:6) Eeci citondezya nzala iiliko mazuba aano, ciindi mabbiliyoni aabantu nobatakonzyi kujana zyakulya naa kujana zyakulya zijisi busani.

Mboiyoomana nzala

Basyaazibwene baamba kuti kuli zyakulya zinji kapati zyalo zikonzya kusanina bantu boonse ibali aanyika. Aboobo, ino ncinzi cipa kuti kakuli penzi yazyakulya? Alimwi ino Bbaibbele lyaamba kuti Mulengi wesu Jehova,b uyoocita nzi kumana mapenzi aaya?

Penzi: Mfwulumende kunyina nozikonzya kumana bucete alimwi akutalulama izipa bantu kuti kabali anzala.

Mboliyoomana: Mfwulumende yabantu iitalondokede iyoonjililwa busena amfwulumende iilondokede, nkokuti Bwami bwa Leza. (Daniele 2:44; Matayo 6:10) Mazuba aano, bantu banji bacete balapenga kujana zyakulya, pele mubweendelezi bwa Bwami bwa Leza zintu ziyoocinca. Bbaibbele lilaamba kujatikizya Jesu Kristo, Mwami wa Bwami bwa Leza kuti: “Uyoovwuna mucete uukwiilila lugwasyo, uupengede alimwi amuntu uuli woonse uutajisi mugwasyi. . . Kuyooba maila manji anyika; atala lyamalundu ayoovwula citaambiki.”​—Intembauzyo 72:12, 16.

Penzi: Nkondo zileta lunyonyooko akupa kuti cikatazye kujana mali, calo cipa kuti cibayumine bantu kujana zyakulya nzyobayandika.

Mboliyoomana: “[Jehova] uyoomanizya nkondo munyika yoonse mboizulwa. Ibuta ulabutyolaula alyalo sumo ulalipwayaula; inkalaki zyankondo ulazyuumpa amulilo.” (Intembauzyo 46:9) Leza uyoonyonyoona zilwanyo zyankondo alimwi abantu bapa kuti kakuli nkondo. Akaambo kaceeci, tacinookatazyi kujana zyakulya. Bbaibbele lisyomezya kuti: “Balulami bayoozwidilila, alwalo luumuno luyoovwula.”​—Intembauzyo 72:7.

Penzi: Kucinca kwambowuunga muwo antenda zilicitikila zyanyonyoona zisyango alimwi akujaya zivwubwa.

Mboliyoomana: Leza uyakweendelezya zilengwaleza, akupa kuti zisyango kazimena kabotu. Bbaibbele lyaamba kuti: “[Jehova] ulabatamika guwo pati; mayuwe aamulwizi alaumuna wi. . . Ulasandula cimpayuma kuba zizyiba zyamaanzi zijisi matete, anyika njumu kuba tusensa twamaanzi. Ulapa kuti aabo bafwide nzala bakkale ooko. . . Balasyanga mbuto mumyuunda akulima myuunda yamisaansa eeyo iizyala micelo minji.”​—Intembauzyo 107:29, 35-37.

Penzi: Basyaacivwulemwangu alimwi abasimakulo bapanga zyakulya zitali kabotu naa bapa kuti zyakulya kazitasiki kubantu bayandika zyakulya eezyo.

Mboliyoomana: Bwami bwa Leza buyoogusya kutasyomeka koonse alimwi abasimakulo. (Intembauzyo 37:10, 11; Isaya 61:8) Bbaibbele lipandulula Jehova Leza kuti ‘ulabacitila cabululami aabo bauninwa, ooyo uubapa cakulya aabo bafwide nzala.’​—Intembauzyo 146:7.

Penzi: Cipaanzi catatu cazyakulya munyika yoonse cilanyonyooka naa kusweeka mwaka amwaka.

Mboliyoomana: Mubweendelezi bwa Bwami bwa Leza, aabo banoolanganya zyakulya banoozibikkila maano. Ciindi naakali aanyika, Jesu tanaakali kusowaila zyakulya. Mucikozyanyo, aciindi cimwi wakasanina bantu basika ku 5,000 camaleele. Kumane, wakalailila basikwiiya bakwe kuti: “Amubwezelele bufwefwelenga boonse bwasyaala, kutegwa kutabi cinyonyooka.”​—Johane 6:5-13.

Akaambo kakuti Bwami bwa Leza buyoogusya zintu zipa kuti kakuli nzala, bantu boonse bayookkomana azyakulya zibotu alimwi zijisi busani. (Isaya 25:6) Kutegwa mwiiye kujatikizya Bwami bwa Leza nobuyoocizuzikizya eeci, amubone cibalo cakuti “Ino Bwami bwa Leza Buyootalika Lili Kweendelezya Nyika?”