Kaambo Ncotweelede Kuba Abulangizi mu 2023​—Ino Bbaibbele Lyaamba Nzi?

Oobu mbowatalika mwaka wa 2023, toonse tulangila kuti kulatucitikila zintu zibotu swebo amikwasyi yesu. Nkaambo nzi ncotujisi bulangizi?

Bbaibbele lilapa bulangizi

Bbaibbele litwaambila makani mabotu aakuti mapenzi ngotujisi lino ngakaindi buyo kasyoonto alimwi alamana ino-ino. Zintu zyoonse zilembedwe mu Bbaibbele “zyakalembelwa kutuyiisya, kutegwa kwiinda . . . muluumbulizyo lwamu Magwalo tube abulangizi.”​—Baroma 15:4.

• Kutegwa mwiiye zinji kujatikizya zisyomezyo zyamu Bbaibbele, amubale cibalo cakuti “Bulangizi Bwini-bwini Bwabuumi Bubotu Kumbele.”

Bulangizi bukonzya kumugwasya noliba lino

Bulangizi mbolipa Bbaibbele bulakonzya kukozyanisyigwa ‘kungobyo yiimika bwato yabuumi bwesu.’ (Bahebrayo 6:19) Bulangizi oobu butupa kutazungaana. Bulakonzya kutugwasya kuliyumya mumapenzi, kuzilanga kabotu zintu, alimwi akutugwasya kuzyiba mbotukonzya kujana lukkomano lwini-lwini. Mucikozyanyo:

• Amubone bulangizi bwamu Bbaibbele mbobwakagwasya mwaalumi umwi iwakajisi penzi lyakunywa kapati bukoko. Amweebelele kavidiyo kakuti Buumi Mbondakali Kupona Bwakandicima.

• Amubone bulangizi bwamu Bbaibbele mbobukonzya kutugwasya ciindi notwafwidwa muyandwa wesu. Amweebelele kavidiyo kakuti Luumbulizyo Kuli Baabo Bali Mubuumba.

Amuyumye bulangizi bwanu

Bantu banji balangila kucitikilwa zintu zibotu, pele tabasinizyide kuti zintu eezyo ziyoocitika ncobeni. Nokuba boobo, zisyomezyo zyamu Bbaibbele ziliindene. Nkaambo nzi? Akaambo kakuti zisyomezyo eezyi zizwa kuli Jehova Lezaa walo “uutakonzyi kubeja.” (Tito 1:2) Alikke Jehova nguukonzya kuzuzikizya zisyomezyo zyakwe zyoonse, kayi ulakonzya ‘kucita zintu zyoonse nzyayanda kucita.’​—Intembauzyo 135:5, 6.

Twamutamba kuti mulibonene mbobugwasya bulangizi businizyide buli mu Bbaibbele. Mulakonzya kubuyumya kwiinda ‘mukuvwuntauzya cakulomya mu Magwalo.’ (Milimo 17:11) Amulisolele nobeni pulogilamu yesu yaciiyo ca Bbaibbele citabbadelelwi. Amutalike mwaka wa 2023 kamujisi bulangizi bubotu bwakumbele!