Sena Amagedoni Iyootalikila Kucisi ca Israel?​—Ino Bbaibbele Lyaamba Nzi?

Bbaibbele lipandulula Amagedoni kuti tiili nkondo iyoobeda kubusena bumwi bwaanyika, pele ninkondo yanyika yoonse yalo inooli akati kamfwulumende zyabantu alimwi a Leza.

• “Majwi aasololelwa amadaimona . . . alaunka kubami bamunyika yoonse kuti ababunganye antoomwe kunkondo yabuzuba bupati bwa Leza Singuzuzyoonse. . . . Lino akababunganya antoomwe kubusena butegwa Amagedoni mu Chihebrayo.”​—Ciyubunuzyo 16:14, 16.

Bbala lyakuti “Amagedoni” lizwa kubbala lya Chihebrayo lyakuti Har Meghid·dohnʹ, ilyaamba “Cilundu ca Megido.” Megido wakali munzi mucooko ca Israyeli yansiku. Akaambo kaceeci, bantu bamwi bayeeya kuti nkondo ya Amagedoni iyoolwaninwa kucisi ca Israel. Nokuba boobo, ku Middle East kunyina busena bupati nkobakonzya kuyoobunganina “bami bamunyika yoonse” alimwi abasikalumamba babo nokuba ku Megido.

Bbuku lya Ciyubunuzyo lyakalembwa “muzitondezyo,” naa mumwaambo wacikozyanyo. (Ciyubunuzyo 1:1) Amagedoni tayaambi busena bumwi bugaminide, pele nciindi zisi zyamunyika yoonse noziyoobungana ciindi camamanino kulwana bweendelezi bwa Leza.​—Ciyubunuzyo 19:11-16, 19-21.