Kuvwula Kwabubi Nyika Yoonse​—Ino Bbaibbele Lyaamba Nzi?

Zigwebenga zyanyonyoona ku Haiti. Bantu bapenga kapati akaambo kabugwebenga buli ku South Africa, Mexico akumasi aamwi aali ku Latin America. Nomuba mumasena ibubi mobwaceya, malipooti aabugwebenga apa bantu kulimvwa kutakwabililwa akulibilika kapati.

Ino Bbaibbele lyaamba nzi kujatikizya bubi buliko nyika yoonse?

Bbaibbele ncolyakasinsima kujatikizya bubi

Bbaibbele lyakasinsima kuti bubi bunooli cibeela cacitondezyo “camamanino aabweende bwazintu.” (Matayo 24:3) Ciindi naakali kupandulula zintu zinooli cibeela cacitondezyo eeci, Jesu Kristo wakaamba boobu:

• “Akaambo kakuvwula kwabubi, luyando lwabantu banji luyoomana.”​—Matayo 24:12.

Kuyungizya waawo, Bbaibbele alimwi lyakasinsima kuti “kumazuba aamamanino” kunooli bantu “batalilesyi, bakali, batayandi bubotu.” (2 Timoteyo 3:1-5) Bube butali kabotu oobu bwapa kuti kakuli bubi mbotubona mazuba aano.

Pele kuli kaambo ncotweelede kuba abulangizi. Bbaibbele litusyomezya kuti lino-lino bubi boonse buyoomana.

• “Kusyeede kaindi kaniini buyo, ibantu babi tabakabi limbi pe; uyoolanga nkobakabede, pele tabakabiko pe. Pele babombe myoyo bayookona nyika, eelyo bayoobotelwa kapati muluumuno lunji.”​—Intembauzyo 37:10, 11.

Amwiiye zinji kujatikizya bulangizi ibuli mu Bbaibbele alimwi akaambo ncotusinizyide kuti zintu nzyotubona mazuba aano zizuzikizya businsimi bwamu Bbaibbele. Amubone zibalo zitobela.

“Bulangizi Bwini-bwini Bwabuumi Bubotu Kumbele”

“Ino Citondezyo ‘Camazuba Aamamanino,’ naa ‘Ciindi Camamanino’ Ninzi?”

“Sena Bbaibbele Lyakaambilalimwi Bantu Mbobanikuyeeya Akucita Zintu Mazuba Aano?”