Sena Kuli Mfwulumende Iitazungaani Iikonzya Kweendelezya Nyika Yesu?​—Ino Bbaibbele Lyaamba Nzi?

Mfwulumende zyamunyika yoonse zizwide manyongwe. Naaba masi aalibonya kuti ajisi mfwulumende zitakonzyi kuzungaana ali mumanyongwe aaletwa abasimapolitikisi, kuzundana mumavooti, kukazyanya kwazipani alimwi amazwanga.

Bbaibbele lyaamba kuti kuli mfwulumende yomwe iitakonzyi kuzungaana. Ambweni mwakaimvwa kale mfwulumende eeyi. Jesu Kristo wakayaamba mumupailo wakwe wacikozyanyo.

• “Aboobo mboobu mbomweelede kupaila: “‘Taateesu ooli kujulu, alisalazyigwe zina lyako. Abuboole Bwami bwako. Akucitwe kuyanda kwako ansi aano mbubonya mbuli kujulu.’”​—Matayo 6:9, 10.

Ino Bbaibbele lyaamba nzi kujatikizya Bwami oobu?

Bwami nimfwulumende iitakonzyi kuzungaana

Bwami oobu bulalela kujulu.

• Mfwulumende eeyi Jesu wakayaamba kuti ‘Mbwami bwakujulu.’ (Matayo 4:17; 5:3, 10, 19, 20) Nkakaambo kaako, wakaamba kuti: “Bwami bwangu tabuli bwanyika eeyi.”​—Johane 18:36.

Bwami oobu buyoonjila mubusena bwamfwulumende zyabantu.

• Bbaibbele lyaamba kuti: “Bwami oobo . . . buyoopwayaula akumanizya mami aaya oonse [aabantu], mpoonya bwalo bulikke buyakwiima nji mane kukabe kutamani.”​—Daniele 2:44.

Bwami oobu, ibunooyendelezyegwa a Jesu Kristo tabukanyonyoonwi pe.

• Bbaibbela lyaamba kuti: “Bweendelezi bwakwe mbweendelezi bwalyoonse alyoonse oobo ibutakamani, abwalo bwami bwakwe mbwami butakanyonyoonwi.”​—Daniele 7:13, 14.

Kunooli luumuno akuliiba Bwami bwaakutalika kweendelezya.

• Bbaibbele lyaamba kuti: “Bayookkala umwi aumwi munsi lyamusaansa wakwe amunsi lyamukuyu wakwe, alimwi takukabi muntu naba omwe uuyoobayoosya.”​—Mika 4:4.

Amwiiye zinji kujatikizya Bwami

Jesu naakali anyika, wakaaba ciindi cakwe “kukambauka makani mabotu aa Bwami.” (Matayo 9:35) Alimwi wakasinsima kuti:

• “Makani mabotu aa Bwami aaya ayookambaukwa munyika yoonse kuti bukabe bumboni kumasi oonse, mpoonya mamanino ayoosika.”​—Matayo 24:14.

Mazuba aano, makani mabotu aa Bwami alakambaukwa mumasi aainda ku 240. Twamutamba kuti mwiiye zinji kujatikizya Bwami oobu akubona mbomukonzya kugwasyigwa abweendelezi bwambubo.

Amweebelele vidiyo yakuti Ino Bwami Bwa Leza Ninzi?