Ino Kuba Munakristo Caamba Nzi?​—Ino Bbaibbele Lyaamba Nzi?

Mazuba aano, bantu banji munyika yoonse balyaamba kuti Mbanakristo, nokuba boobo, beendelezya bamwi calunya. Ibamwi balaliyanda, tabasyomeki alimwi tabajisi luzyalo. Mpoonya bamwi tabasyomeki kuli yooyo ngobakwetene limwi. Akaambo katwaambo ootu cipa bamwi kulibuzya kuti: ‘Ino kuba Munakristo caamba nzi?’

Ncocaamba kuba Munakristo

Ncuuba-uba kumuntu kulyaamba kuti Munakristo. Pele zinji zijatikizyidwe. Bbaibbele lyaamba kuti, Munakristo ngusikwiiya wa Jesu Kristo. (Milimo 11:26) Jesu lwakwe mwini wakaamba kuti: “Ikuti mwazumanana kuba mujwi lyangu, muli basikwiiya bangu ncobeni.” (Johane 8:31) Masimpe kuti, kunyina muntu uukonzya kumvwida majwi aa Jesu cakulondoka. Pele Munakristo ulasolekesya kutobela njiisyo zya Jesu alimwi akupona kweelana anzizyo mubuumi bwakwe bwabuzuba abuzuba. Atubone zikozyanyo zimwi.

Banakristo balatondezya luyando lwini-lwini

Ncaakaamba Jesu: “Ndimupa mulawo mupya, wakuti muyandane; mbubonya mbondali kumuyanda, amuyandane mbubonya anywebo. Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.”​—Johane 13:34, 35.

Ncaakacita Jesu: Jesu wakali kutondezya luyando kubantu boonse, tacikwe makani abukkale bwabo naa nkobakali kuzwa. Wakali kuponya baciswa, kusanina bakalaanzala akwaaba buumi bwakwe akaambo kabantu.​—Matayo 14:14-21; 20:28.

Ncobacita Banakristo: Banakristo balatondezya luyando kwiinda mukuba baabi, tabasalululi alimwi balalekelela. Kunze lyaboobo, balabagwasya bantu babulide, mpoonya balilyaabide kuliimya zintu zimwi ziyandika kulimbabo kutegwa bagwasye bamwi.​—1 Johane 3:16.

Banakristo balasyomeka

Ncaakaamba Jesu: “Ndime . . . kasimpe.”​—Johane 14:6.

Ncaakacita Jesu: Jesu wakali kusyomeka muzintu zyoonse nzyaakali kwaamba akucita. Kunyina naakali kucitila bamwi cabumpelenge naa kupa bamwi kuti basyome makani aatali aamasimpe. Wakazyibidwe kuti ulasyomeka, noliba leelyo nocakali kumuletela mapenzi.​—Matayo 22:16; 26:63-67.

Ncobacita Banakristo: Banakristo tababeji. Balatela mitelo, tababbi alimwi balabeleka canguzu kumilimo yabo kweelana ambobakapangana asikubalemba mulimo. (Baroma 13:5-7; Baefeso 4:28) Tababanyengeleli bamwi, kubeja mumisunko, naa kulemba makani aataluzi mumapepa aakulembela kunjila mulimo naa muzintu zimwi buyo.​—Bahebrayo 13:18.

Banakristo balaaluzyalo

Ncaakaamba Jesu: “Amuboole kulindime nyoonse nomukatede akulemenwa, eelyo ndilamukatalusya. Amulikulike joko lyangu, mwiiye kulindime, nkaambo ndili mubombe moyo, alimwi ndilalicesya, eelyo mulakatalusyigwa. Nkaambo joko lyangu talikatazyi kunyamuna, alimwi mukuli wangu muuba.”​—Matayo 11:28-30.

Ncaakacita Jesu: Jesu wakali kusikilika alimwi wakali mubombe. Wakali kubayanda bana baniini, kuumbulizya bakali mumapenzi akweendelezya bamwi cabulemu.​—Marko 10:13-15; Luka 9:11.

Ncobacita Banakristo: Banakristo balabandika caluzyalo kuli bamwi; tabali basilunya naa kutundulula bamwi. (Baefeso 4:29, 31, 32) Balababikkila maano bantu akuyandaula nzila yakubagwasya.​—Bagalatiya 6:10.

Banakristo balasyomeka kuli yooyo ngobakwetene limwi

Ncaakaamba Jesu: “Aabo Leza mbaaswaanganya kutabi muntu uubaandaanya.”​—Marko 10:9.

Ncaakacita Jesu: Nokuba kuti Jesu taakakwete, wakakulwaizya banabukwetene kusyomeka kuli yooyo ngobakwetene limwi. (Matayo 19:9) Wakacenjezya kujatikizya micito iikonzya kunyonganya cikwati.​—Matayo 5:28.

Ncobacita Banakristo: Banakristo baleeleba kucita cintu cili coonse citatondezyi bulemu kuli yooyo ngobakwetene limwi. (Bahebrayo 13:4) Banabukwetene baleendelezyanya caluyando acabulemu.​—Baefeso 5:28, 33.