Sena Bbaibbele Lilijisi Makani Aamasimpe Kujatikizya Buumi bwa Jesu?

Bwiinguzi bwamu Bbaibbele

Luka, mulembi wa Bbaibbele wakaamba boobu kujatikizya cibalo cakwe cabuumi bwa Jesu: “Ndakaziccililizya zyintu zyoonse kuzwa kumatalikilo cakulomya.”​—Luka 1:3.

Bamwi baamba kuti zibalo izyaamba buumi bwa Jesu izilembedwe mumabbuku aa Makani Mabotu​—nzyobakalemba ba Matayo, Maako, Luka, a Johane, ibakali kupona ciindi eeco zyakacincwa mumwaanda wamyaka wane.

Nokuba boobo, cibeela cimwi ciyandika kapati ca Makani Mabotu aa Johane cakajanika mu Egepita matalikilo aakuma 1900. Lino ciitwa kuti Papyrus Ryland 457 (P⁵²) alimwi ciliyobwedwe mulaibbulali iitegwa John Rylands ku Manchester, England. Cijisi majwi aali mulugwalo lwa Johane 18:31-33, 37, 38 muma Bbaibbele aamazuba aano.

Eeli ndepepa lyamakani lyakaindi lizyibidwe lya Magwalo aa Banakristo aa Chigiliki. Basyaazibwene banji basyoma kuti lyakalembwa kuma 125 C.E., kakwiindide buyo myaka misyoonto naa naakamana buyo kulembwa magwalo aakusaanguna. Majwi aali mucibeela eeci aleendelana aali mumapepa aakazoolembwa musyule.