Sena Leza Nguwakalenga Diabolosi?

Bwiinguzi bwamu Bbaibbele

Ibbaibbele litondezya kuti Leza taakwe naakalenga Diabolosi pe. Muciindi caboobo, wakalenga cilenge cakazooba Diabolosi. Kujatikizya Leza, Ibbaibbele lyaamba kuti: ‘Milimo yakwe yoonse ililuleme, nkaambo inzila zyakwe zyoonse zililuzi. Ngu-Leza uusyomeka uutakwe cibi; uliluleme, uliluzi.’ (Deuteronomo 32:3-5) Kuzwa kukaambo aaka, tulakonzya kuba masimpe kuti Saatani Diabolosi cimwi ciindi wakalilondokede alimwi wakaliluleme, wakali umwi wabana ba Leza, bangelo.

Kulugwalo lwa Johane 8:44, Jesu wakaamba kuti Diabolosi “kunyina naakakakatila mukasimpe,” kupandulula kuti cimwi ciindi Saatani wakali kwaamba masimpe alimwi taakajisi cibi.

Nokuba boobo, mbubwenya mbuli bangelo abantu mbobakalengwa kabali basongo, mungelo iwakazikuba Saatani Diabolosi wakajisi lwaanguluko lwakusala cibotu alimwi acibi. Kwiinda mukusala nzila ikazyanya a Leza alimwi akweena banabukwetene bakusaanguna kumusangana, wakalipanga kuba Saatani, kupandulula “Sikukazya.”—Matalikilo 3:1-5; Ciyubunuzyo 12:9