Ndinyomenena Muntu Ngotukozyenye Limwi Zizo—Sena Eeci Caamba Kuti Ndinoonana Abantu Mbondikozyenye Zizo?
Peepe!
Bwini: Bunji bwaziindi, kunyomenena muntu ngomukozyenye zizo ncintu buyo cicitika kwaciindi cisyoonto.
Oobu mbwaakaamba Lisette, uujisi myaka iili 16 yakuzyalwa iwakali kunyomenena musimbinyina aciindi cimwi. Wakaamba kuti: “Kwiinda mukwiiya sayaansi (biology) kucikolo, ndakaiya kuti mumyaka yabukubusi, mubili ulacinca-cinca kapati. Ndiyeeya kuti, ikuti bakubusi banji nibalizyi zinji kujatikizya mibili yabo, nibalizyi kuti kunyomenena muntu ngomukozyenye zizo nkwaciindi buyo cisyoonto alimwi tabeelede kulimvwa kuti banoonana abantu mbobakozyenye zizo.”
Bakubusi boonse beelede kusala—kuzumina muzeezo wanyika uunyongene uujatikizya koonana kwabantu bajisi zizo zikozyenye naa kutobela nzila mbotu kapati yakulilemeka iili mu Jwi lya Leza
Pele ino kuti kunyomenena muntu ngomukozyenye zizo kwalibonya kuti kwazumanana? Sena caamba kuti Leza ngusilunya akaambo kakwaambila muntu uunyomenena muntu ngobakozyenye zizo kuti atoonani awalo?
Ikuti naa mwaingula kuti inzya kumubuzyo wamamanino, mweelede kuzyiba kuti kuyeeya kuli boobo kuyeeme amizeezo mibi yakuti bantu beelede koonana kufwumbwa ciindi nobayanda kucita oobo. Leza kwiinda mu Bbaibbele ulabalemeka bantu kwiinda mukubaambila kuti balakonzya kusala kuti batatobeli kulombozya kwabo kwakuyanda koonana kutali kabotu.—Bakolose 3:5.
Ncolyaamba Bbaibbele ncamaano. Liile kulailila baabo balombozya koonana amuntu ngabakozyenye zizo kucita cintu ceelede mbubwenya mbuli baabo banyomenena muntu ngobaindene zizo, nkokuti ‘kutija bwaamu.’ (1 Bakorinto 6:18) Masimpe ngakuti, mamiliyoni aabantu ibalombozya koonana abantu mbobaindene zizo ibayanda kutobela zyeelelo zyamu Bbaibbele balalilesya nokuba kuti balajana masunko aasiyene-siyene. Aabo balombozya koonana amuntu ngobakozyenye zizo balakonzya kucita mbubwenya kuti kabayanda ncobeni kukkomanisya Leza.—Deuteronomo 30:19.