Sena Bakamboni ba Jehova ma Zionists?

Peepe, tabali ma Zionists. Bakamboni ba Jehova Mbanakristo ibasyoma ncaamba Magwalo. Nokuba kuti zikombelo zimwi ziyiisya kuti lwaanguluko lwaba Juda lwakuba aacisi cabo ku Palestine luyeeme aabusinsimi bwamu Magwalo, pele Bakamboni ba Jehova tabuli mbobatubona twaambo oobo. Tabasyomi kuti eezyi izyakacitika mutwaambo twacisi zyakasinsimwa cacigaminina mu Magwalo. Masimpe ngakuti, Magwalo taasumpuli mfwulumende yabantu imwi aatala amfwulumende zimbi naa kusumpula musyobo umwi wabantu kwiinda misyobo iimbi. Magazini ya Ngazi Yamulindizi ya Bakamboni ba Jehova yakaamba boobu cakutainda mumbali: “Magwalo kunyina naasumpula musemu wa Zionism.”

Bbuku litegwa The Encyclopædia Britannica lipandulula Zionism kuti “nkabunga ka Bajuda kakajisi makanze aakutalisya cisi ca Bajuda ku Palestine akuzumanana kucigwasyilizya.” Ntalisyo yankako iyeeme abukombi alimwi amutwaambo twacisi. Bakamboni ba Jehova tabasumpuli Zionism kuba njiisyo yabukombi, alimwi tabatoli lubazu naaceya mutwaambo twacisi tujatikizya Zionism.

Mbunga ya Bakamboni ba Jehova njabukombi alimwi taisumpuli imbunga yatwaambo twacisi iiliyoonse, kubikkilizya a Zionism. Kutatola lubazu kwa Bakamboni ba Jehova mutwaambo twacisi kulizyibidwe kabotu, alimwi muzisi zimwi Bakamboni balapenzyegwa calunya akaambo kakutatola lubazu mutwaambo twacisi. Tulisinizyide kuti bulikke Bwami bwa Leza mbobuyooleta luumuno lutamani anyika, kunyina kabunga noiba mfwulumende yabantu iikonzya kucita oobo.

Kaambo kapati kujatikizya njiisyo zyabukombi nzyobasyoma Bakamboni ba Jehova, kufwumbwa nkobakkala, nkakutobela milawo yamfwulumende. Tababukili mfwulumende zyabantu alimwi tabatoli lubazu munkondo.