Sena Leza Inga Wayiingula Mipailo Yangu?

Bwiinguzi bwamu Bbaibbele

Inzya, inga wayiingula. Bbaibbele alimwi azyintu zicitikila bantu mubuumi zitondezya kuti Leza ulaingula mipailo. Bbaibbele lyaamba kuti: “Bamuyoowa [Leza], ulabacitila mbobayanda; ulaswiilila cililo cabo akubafutula.” (Intembauzyo 145:19) Kutegwa Leza ayiingule mipailo yanu, ciyeeme kapati alindinywe.

Leza ncayanda kuli baabo bapaila kulinguwe

• Tweelede kupaila kuli Leza, ikutali kuli Jesu, Mariya, basaante, bangelo, naa zitondezyo. Jehova Leza alikke ngo ‘sikuswiilila zikombyo.’​—Intembauzyo 65:2.

• Tweelede kupaila kweelana akuyanda kwa Leza, naa kweelana azyeelelo zyakwe zijanika mu Bbaibbele.​—1 Johane 5:14.

• Tweelede kupaila kwiinda muzyina lya Jesu, calo citondezya kuti tulamulemeka. Jesu wakaamba kuti: “Kunyina uuboola kuli Taata ccita kuti wainda mulindime.”​—Johane 14:6.

• Tweelede kupaila calusyomo, akulomba kuti atuyungizyile lusyomo ikuti kakuyandika.​—Matayo 21:22; Luka 17:5.

• Tweelede kulicesya akupaila camoyo woonse. Bbaibbele lyaamba kuti: “Jehova ulisumpukide, nekubaboobo ulibabwene abaniini.”​—Intembauzyo 138:6.

• Tweelede kuzumanana. Jesu wakati: “Amuzumanane kulomba, eelyo muyoopegwa.”​—Luka 11:9.

Leza nzyatabikkili maano kuli baabo bapaila kulinguwe

• Musyobo naa cisi nkomuzwa. “Leza tasalululi, pele muzisi zyoonse kufwumbwa muntu uumuyoowa akucita ziluleme ulatambulwa kulinguwe.”​—Milimo 10:34, 35.

• Kukkala naa kwiimikila munzila iilibedelede. Mulakonzya kupaila kuli Leza nokuba kuti mulikkede, mulivwunteme, mulifwugeme, naa kamwiimvwi.​—1 Makani 17:16; Nehemiya 8:6; Daniele 6:10; Maako 11:25.

• Kufwumbwa naa mupaila cakupozya naa cakaumuumu. Leza ulaingula noiba mipailo yakaumuumu njobatamvwi bamwi.​—Nehemiya 2:1-6.

• Kufwumbwa naa zyintu nzyomulibilika nzipati naa nzisyoonto. Leza umukulwaizya ‘kuwaala makatazyo aanu oonse kulinguwe, nkaambo ulamubikkila maano.’​—1 Petulo 5:7.