Sena Bbaibbele Lilakonzya Kundigwasya Kuti Kandityompedwe?

Bwiinguzi bwamu Bbaibbele

Inzya, akaambo kakuti lugwasyo lubotu luzwa kuli “Leza, ooyo wuumbulizya baabo batyompedwe.”​—2 Bakolinto 7:6.

Leza ncapa kuli baabo batyompedwe

• Nguzu. Leza ‘ulamuumbulizya,’ kutali kwiinda mukugwisya mapenzi aanu oonse, pele kwiinda mukwiingula mipailo yanu nomulomba nguzu kutegwa muliyumye. (Bafilipi 4:13) Mulakonzya kusinizya kuti ulilibambilide kumuswiilila, nkaambo Bbaibbele lyaamba kuti: “Jehova uli afwaafwi kubawizukide mumoyo, ulafutula batete myuuya.” (Intembauzyo 34:18) Mubwini, Leza ulakonzya kumvwa nomulomba lugwasyo nokuba kuti tiimwamwaambila mbomulimvwa.​—Baloma 8:26, 27.

• Zikozyanyo zibotu. Sikulemba Bbaibbele umwi wakapaila kuli Leza kuti: “Kumapenzi malamfu ndakwiilila.” Sintembauzyo ooyu wakaumbulizyigwa ciindi naakatyompedwe kwiinda mukuyeeya kuti Leza ulatulekelela zibi zyesu. Wakaambila Leza kuti: “O Jehova, nowakabika moyo wako kuzibi zyesu, ngwani wakali kunoopona, O Mwami? Pele kulinduwe kuli lulekelelo, kuti uyoowegwe.”​—Intembauzyo 130:1, 3, 4.

• Bulangizi. Kunze lyakutupa luumbulizyo lino, Leza wasyomezya kugwisya mapenzi oonse aapa kutyompwa. Aakuzuzikizya cisyomezyo eeci, “ezyo zyakusaanguna [kubikkilizya akutyompwa] tazikooyooibalukwa limbi nikuba kuyeeyegwa.”​—Isaya 65:17.

Amubone kuti: Nokuba kuti Bakamboni ba Jehova balalumba lugwasyo ndwapa Leza, pele alimwi balayandaula busilisi bwamalwazi mbuli aakutyompwa. (Maako 2:17) Pele Bakamboni ba Jehova tabasumpuli busililisi buli boonse; muntu umwi aumwi weelede kulisalila mumakani aabusilisi.