LAIBBULALI YAA INTANETI ya Watchower
Watchtower
LAIBBULALI YAA INTANETI
Chitonga
  • BBAIBBELE
  • ZYAKAMWAIGWA
  • MISWAANGANO
  • ijwyp cibalo 11
  • Mbuti mbondikonzya kuleka kusumpya kucita zyintu?

Kunyina vidiyo aawa mpomwasala.

Vidiyo yakaka kulila.

  • Mbuti mbondikonzya kuleka kusumpya kucita zyintu?
  • Bakubusi Balabuzya
  • Tutwe Twamakani
  • Makani Aakozyenye
  • Mulimo nuulibonya kuti ulakatazya.
  • Nomulimvwa kuti taakwe cimukulwaizya kubeleka.
  • Nomujisi bubi.
  • Cikonzya Kutugwasya Kutegwa Katutasumpyi Kucita Zintu
    Buumi Amulimo Wesu wa Bunakriskusikila—Kabbuku Kamuswaangano—2022
  • Ino Mbuti Mbondikonzya Kucibelesya Kabotu Ciindi?
    Bakubusi Balabuzya
  • Sena Inga Ndazwidilila Alwiiyo Lwakuyiila Aŋanda?
    Bakubusi Balabuzya
  • Mukumwaya Ooku
    Sinsimuka!—2013
Amubone Azimwi
Bakubusi Balabuzya
ijwyp cibalo 11

BAKUBUSI BALABUZYA

Mbuti mbondikonzya kuleka kusumpya kucita zyintu?

Sena lyoonse mulamuka kutalika kubeleka milimo alimwi akulemba homuweki? Mweelede kuleka kusumpya kucita zyintu! Cibalo eeci cilamugwasya kuleka kusumpya kucita zyintu, noliba leelyo

  • mulimo nuulibonya kuti ulakatazya.

  • nomulimvwa kuti taakwe cimukulwaizya kubeleka

  • nomujisi kale bubi.

Mwamana kubala cibalo eeci, amwiingule mibuzyo iijatikizya kusumpya kucita zyintu.

Ibbaibbele lilaamba cikonzya kucitika akaambo kakusumpya kucita zyintu. Lyaamba kuti: “Uuyeeya muuwo takonzyi kubyala, ayooyo uulanga mayoba takonzyi kutebula.”—Mukambausi 11:4.

Amulange-lange zyintu zikonzya kupa kuti kube penzi alimwi ancomukonzya kucita kutegwa mucileke kusumpya.

Mulimo nuulibonya kuti ulakatazya.

Kwaamba masimpe—milimo imwi ilakatazya cakuti inga wayanda buyo kwiileka. Njeeyi mizeezo imwi iikonzya kugwasya.

  • Kamwaandaanya mulimo muzibeela zisyoonto-syoonto. Musimbi umwi uutegwa Melissa wakaamba kuti: “Nokuba kuti ndilizyi kuti ndilimukide, ndilasola kumanizya milimo yangu kwiinda mukubeleka mulimo omwe aciindi comwe.”

  • Kamutalika mpoonya-mpoonya. “Kotalika kuubeleka mulimo mbowautambwida buyo, nokuba kuti uyungizya amilimo iimbi njojisi naa kulemba mizeezo iili mbwiibede kotanaluba.”—Vera.

  • Kamulomba lugwasyo. Kulalangilwa kuti bazyali banuo alimwi bamayi banu bakainda mubuyumuyumu buliboobu. Mulakonzya kugwasyigwa kuluzyibo lwabo. Balakonzya kumugwasya kulibambila.

Muzeezo “Kopanga mulongo. Masimpe, eeci caamba kuti weelede kuti kolibambilide kutobela mulongo wako, pele cilagwasya—ulamanizya milimo yoonse aciindi ceelede.”—Abbey.

Nomulimvwa kuti taakwe cimukulwaizya kubeleka.

Kanji-kanji, milimo njomweelede kucita ibikkilizya zyintu zitakukkomanisyi kapati. Aboobo ino ncinzi ncomweelede kucita kuti mulimo ngomuyanda kucita taumukkomanisyi? Amusole nzila eezyi zitobela.

  • Kamuyeeya kaambo ncomweelede kufwambaana kuucita. Mucikozyanyo, amweezyeezye mbomukonzya kukkomana kuti naa mwamana kuubeleka. Musimbi umwi uutegwa Amy, wakaamba kuti: “Ndilimvwa kabotu kuti ndamana kucita cintu cimwi muciindi ceelede alimwi inga ndilimvwa kwaanguluka.”

  • Kamuliyeezya zyintu zikonzya kucitika kuti tiimwaubeleka. Ikuti mwamuka, mupa kuti mukatale kapati alimwi inga capa kuti mwaalilwe kuzwidilila. Bbaibbele lyaamba kuti: “Kufwumbwa cintu muntu ncasyanga, ncencico eeco ncayootebula.”—Bagalatiya 6:7.

  • Amububikke mumizeezo buzuba mbomweelede kumanizya mulimo. Musimbi uutegwa Alicia wakaamba kuti: “Cilandigwasya kuyeeyela mbuli kuti mulimo ulamana buzuba bomwe naa obilo kabutanasika buzuba bwini noweelede kumana. Mpoonya inga ndainduluka kuulanga-langa mulimo kubona naa inga ndasyaalilwa buzuba naa mazuba obilo aakucita zimwi zyintu.”

Muzeezo “Mboyeeya inga capa kuti ukulwaizyigwe. Kolyaambila omwini kuti ulaubeleka mulimo uuyandika kubeleka, alimwi akuti kunyina cikonzya kukulesya. Ikuti ndaamba kuti ndiyanda kucita eeci, ceelede kucitika ncobeni.”​—Alexis.

Nomujisi bubi.

Musankwa uutegwa Nathan wakaamba kuti: “Bunji bwaziindi bantu bandaamba kuti ndilasumpya mulimo, pele aayo taali masimpe! Tabazyi mbondijisi bubi!” Ikuti kamulimvwa mbuli mbwalimvwa Nathan, amusole mizeezo eeyi.

  • Amusaangune kubeleka milimo myuuba-uba.

    Musimbi uutegwa Amber wakaamba kuti: “Muntu umwi wakandaambila kuti ikuti mulimo kautola maminiti aatasiki kuli osanwe, weelede kuucita mpoonya-mpoonya. Eeci cibikkilizya zyintu mbuli bulondo, kwaanzika zisani, kusanzya mitiba, alimwi akutuma fooni.”

  • Amubikke zyintu ziyandika kumbele. Ibbaibbele lyaamba kuti: “Musinizye zyintu ziyandika kapati.” (Bafilipi 1:10) Ino inga mwalubelesya buti lugwalo oolu mubuumi bwanu bwabuzuba abuzuba? Musimbi umwi uutegwa Anna wakaamba kuti: “Ndilabamba mulongo wamilimo yoonse njondijisi alimwi akulemba ciindi noyeelede kamana kucitwa.Pele ciyandika kapati, ndilalemba ciindi nondeelede kuubeleka mulimo umwi aumwi alimwi anondeelede kumana kuucita.”

Sena eeci cilibonya kuti cilakatazya? Amuciyeeyele munzila eeyi! Masimpe ngakuti, kuti mwapanga mulongo, ndinywe mweendelezya ciindi muciindi cakuti ciindi kacimweendelezya. Alimwi eeci inga capa kuti kamutakali kapati. Musimbi umwi uutegwa Kelly wakaamba kuti: “Kuba amulongo kupa kuti kanditalibiliki alimwi kupa kuti zyintu zyeende kabotu.”

  • Mutanyonganizyigwi. Jennifer wakaamba: “Ndilabaambila boonse aŋanda ciindi nendiyanda kutalika mulimo wangu. Ikuti naa kuli ncintu ncobayanda kuti ndicite ndilabalomba kuti bandaambilile limwi kanditanatalika mulimo wangu. Alimwi ndilaizima fooni yangu.”

Muzeezo “Kufwumbwa cintu ncomweelede kucita tacikonzyi kucitika celikke kusikila mane mucicite. Muciindi cakunoolibilika kujatikizya cintu eeco, amucicite kutegwa ciinde. Kwiinda mukucita oobu, mulakonzya kulimvwa kwaanguluka buzuba boonse.”​—Jordan.

Amwiingule mibuzyo iijatikizya kusumpya kucita zyintu

Masimpe naa Nkubeja

  1. Tamweelede kumuka kutalika mulimo.

  2. Bantu bajisi penzi lyakusumpya kucita zyintu balakonzya kucinca.

  3. Mulakonzya kucita kabotu lyoonse nokuba kuti mujisi zinji zyakucita.

  4. Mwakalijana kubazyali banu penzi lyakusumpya kucita zyintu.

Bwiinguzi

  1. Nkubeja. Mulakonzya kuti kamujisi kaambo kabotu kamupa kumuka kutalika. Mucikozyanyo, kutola ciindi cinji kulakonzya kumupa kujana makani manji, kupanga mulongo, naa kusala kabotu.—Njiisyo yamu Bbaibbele: Tusimpi 21:5.

  2. Masimpe. Mulakonzya kuzileka zilengwa zibi. Kaambo kapati nkubikkila maano kububotu buboola akaambo kakuleka zilengwa zibi.—Njiisyo yamu Bbaibbele: Baefeso 4:22, 23.

  3. Nkubeja. Talili lyoonse nomukonzya kucita kabotu. Masimpe ngakuti, kanji-kanji kutegwa muubeleke kabotu mulimo wanu, kuyandika ciindi cinji alimwi akulibambila kabotu.—Njiisyo yamu Bbaibbele: Tusimpi 15:28.

  4. Nkubeja. Nokuba kuti muzyali wanu umwi uvwula kusumpya kucita zyintu, basayaansi tabanazyiba naa penzi ndyobajisi bazyali lyakusumpya lilakonzya kuyambukila mwana.—Njiisyo yamu Bbaibbele: Bagalatiya 6:5.

    Chitonga Publications (1991-2025)
    Log Out
    Log In
    • Chitonga
    • Amutumine Bamwi
    • Makani Ngomuyanda
    • Copyright © 2025 Watch Tower Bible and Tract Society of Pennsylvania
    • Nzyomweelede Kuzumina
    • Mulawo Uujatikizya Kubamba Maseseke
    • Privacy Settings
    • JW.ORG
    • Log In
    Amutumine Bamwi