Ino Bbaibbele Lyaamba Nzi Kujatikizya Kubikkwa Bulowa?

Bwiinguzi bwamu Bbaibbele

Bbaibbele lyaamba kuti tatweelede kulya bulowa. Aboobo, tatweelede kuzumina kulya naa kubikkwa bulowa noziba zibeela zipanga bulowa. Amubone magwalo aaya aatobela:

• Matalikilo 9:4. Nolyakainda Zambangulwe, Leza wakazumizya Nowa amukwasyi wakwe kuti kabalya nyama, pele wakabalailila kuti tabeelede kulya bulowa. Leza wakaambila Nowa kuti: “Pele tamweelede kulya nyama antoomwe abuumi bwayo, nkokuti bulowa bwayo.” Mulawo ooyu ulabeleka kubantu boonse kuzwa nowakabikkwa akaambo kakuti bantu boonse nduzubo lwa Nowa.

• Levitiko 17:14. “Mutalyi bulowa bwamulenge naba omwe, nkaambo mubulowa bwakwe mobubede buumi bwamulenge. Kufumbwa uubulya ulatandwa muciinga cakwe.” Leza ubona kuti buumi buli mubulowa alimwi mbubwakwe. Nokuba kuti mulawo ooyu wakapegwa buyo kucisi ca Israyeli, cilalibonya kuti Leza ulaubikkila maano mulawo uukasya kulya bulowa.

• Milimo 15:20. ‘Amubutantamuke bulowa.’ Leza wakabapa mulawo Banakristo nguwenya ngwaakapede Nowa. Makani aakaindi atondezya kuti Banakristo bakusaanguna bakali kukaka kulya bulowa nokuba kububelesya mubusilisi.

Nkaambo nzi Leza ncatupede mulawo wakuti katubutantamuka bulowa?

Kuli bumboni kuzwa kuli basyaazibwene mumakani aabusilisi ibutondezya kuti kuli ntenda mukubikkwa bulowa. Nokuba boobo, kaambo kayandika kapati nkakuti Leza wakatulailila kuti tubutantamuke bulowa akaambo kakuti ncobwiiminina cilisetekene kulinguwe.​—Levitiko 17:11; Bakolose 1:20