Tandilimvwi Kabotu Kujatikizya Buumi Bwangu​—Sena Ndilakonzya Kugwasyigwa Abukombi, Leza, naa Bbaibbele?

Bwiinguzi bwamu Bbaibbele

Inzya. Bbaibbele, ibbuku lyakaindi lijisi busongo, lilapa bwiinguzi kumibuzyo iikatazya mubuumi alimwi lilakonzya kumugwasya kuti mulimvwe kabotu. Amulange-lange mibuzyo imwi njoliingula.

1. Sena kuli Mulengi? Bbaibbele lyaamba kuti Leza “wakalenga zyintu zyoonse.” (Ciyubunuzyo 4:11) Mbwaanga ngo Mulengi wesu, Leza ulizyi nzyotuyandika kutegwa katulimvwa kabotu akujana lukkomano mubuumi.

2. Sena Leza ulandibikkila maano? Bbaibbele talitondezyi kuti Leza tababikkili maano bantu, pele lyaamba kuti: “Tali kulamfwu kuli umwi aumwi wesu.” (Milimo 17:27) Ulabikkila maano kuzyintu zimucitikila alimwi uyanda kumugwasya kuti muzwidilile mubuumi.​—Isaya 48:17, 18; 1 Petulo 5:7.

3. Ino kuzyiba Leza inga kwandigwasya buti kuti ndilimvwe kabotu? Leza wakatulenga katujisi luyandisisyo lwazyintu zyakumuuya, akuyanda kuzyiba ncotuponena. (Matayo 5:3) Luyandisisyo lwesu lulabikkilizya akuyanda kuzyiba Mulengi wesu alimwi akuba acilongwe anguwe. Leza uyookkomana akaambo kakuti muyanda kumuzyiba, nkaambo Bbaibbele lyaamba kuti: “Amuswene kuli Leza, eelyo awalo uyooswena kulindinywe.”​—Jakobo 4:8.

Bantu banji bajana kuti kuba acilongwe a Leza kwasumpula buumi bwabo alimwi kwabapa kuti kabalimvwa kabotu kujatikizya buumi bwabo. Nokuba kuti kuzyiba Leza takukonzyi kupa kuti kamutajani mapenzi, busongo bwakwe buli mu Bbaibbele bulakonzya kumugwasya.

• Kuba alukkomano mumukwasyi.

• Kuba muluumuno abantu.

• Kulwana mapenzi mbuli kulimvwa kutyompwa, kulibilika kujatikizya mali alimwi amalwazi aataponi.

Zikombelo zinji izibelesya Bbaibbele tazitobeli ncoliyiisya. Mukwiimpana, cikombelo cakasimpe, icitobela ncolyaamba Bbaibbele, ciyoomugwasya kumuzyiba Leza.