Sena Diabolosi Nkwali Ncobeni?
Bwiinguzi bwamu Bbaibbele
Inzya, Diabolosi nkwali ncobeni. Ngo “mweendelezi wanyika,” icilenge camuuya cakazoobija akuzangila Leza. (Johane 14:30; Baefeso 6:11, 12) Bbaibbele lilamwaamba mbwabede Diabolosi kwiinda mukubelesya mazyina aaya:
Sataani, ilyaamba kuti “Sikukazya.”—Jobu 1:6.
Diabolosi, ilyaamba kuti “Sikubejekezya.”—Ciyubunuzyo 12:9.
Nzoka, ilibelesyegwa mu Bbaibbele kwaamba “Sikweena.”—2 Bakolinto 11:3.
Sikusunka.—Matayo 4:3.
Sikubeja.—Johane 8:44.
Tali njiisyo naa bube bwabubi
Bamwi bayeeya kuti Saatani Diabolosi ninjiisyo naa mbube buli mukati kesu. Pele mu Bbaibbele kuli cibalo caamba mubandi Leza ngwaakajisi a Saatani. Mbwaanga Leza ulilondokede, kunyina naakali kunga wabandika acibeela cibyaabi icili mulinguwe. (Deuteronomo 32:4; Jobu 2:1-6) Mbubwenya buyo, Saatani wakamusunka Jesu, uutajisi cibi. (Matayo 4:8-10; 1 Johane 3:5) Aboobo, Bbaibbele litondezya kuti Diabolosi nkwali ncobeni ikutali kuti mbube buyo bwabubi.
Sena tweelede kugambwa akaambo kakuti bantu banji tabasyomi kuti Diabolosi nkwali ncobeni? Peepe, akaambo kakuti Bbaibbele lyaamba kuti Saatani ubelesya nzila zyabucenjezu kuzuzikizya makanze aakwe. (2 Batesalonika 2:9, 10) Nzila imwi njabelesya kapati njakupa bantu kusyoma kuti tako.—2 Bakolinto 4:4.
Makani aamwi aakubeja kujatikizya Diabolosi
Makani aakubeja: Lucifer ndizyina limbi lya Diabolosi.
Makani aamasimpe: Ibbala lya Chihebrayo lisandululwidwe kuti “Lucifer” muma Bbaibbele amwi lyaamba “ntanda.” (Isaya 14:12) Tupango tweengelede tutondezya kuti bbala eeli lyaamba bulelo, naa mulongo wabami ba Babuloni, Leza mbaakali kuyoonyonyoona akaambo kakulisumpula. (Isaya 14:4, 13-20) Ibbala lyakuti “ntanda” lyakali kubelesyegwa kusampaula Babuloni naakazundwa.
Makani aakubeja: Leza ubelesya Saatani kubeteka bantu.
Makani aamasimpe: Diabolosi ngusinkondonyina wa Leza, kutali mubelesi wakwe. Saatani Diabolosi ulabakazya akubabejekezya bantu babelekela Leza.—1 Petulo 5:8; Ciyubunuzyo 12:10.